Read Makhuwa-Shirima Ahooleli 11 Bible Online

Ahooleli 11 - Makhuwa-Shirima bible

Ahooleli 11

¹Vano Yefeta, muGiliyade, aari nakhotto ooweraxa. Atithawe yiitthaniwa Giliyade ni amayawe yaari puuta.

²Mwaariye Giliyade aamuyarela anamwane asilopwana ni awosa yunnuwansaaya, yaamoomola Yefeta emweerelaka: “Nyuwo khwamwaakhelaru yoohiyeriwa ya emusaahu, niwoko muri mwaana a muthiyana mukina.”

³Hiiho Yefeta aahaatthawa axunneiye, aniitekiha elapo ya oTobi. Weiwe alavilavi akina yaathukumanano, enamutthara.

⁴Eviraleene ehuhu, awAmoni yaawananaka aYixrayeli,

⁵ahooleli a oGiliyade yaamurowela Yefeta mweelaponi ya oTobi.

⁶Awosa yaamweerela: “Ngweeke, mukhaleke mutokweenaahu a anakhotto weera niwere waawanano awAmoni.”

⁷Yefeta aawaakhula: “Mookithanya mukoomolaka vaate wa atithaka. Vano munkaasera heeni muraanyuno makacamiho?”

⁸Ahooleli a oGiliyade yaamweerela: “Orookhalaru hiiho, hiyo nnoodyoonttelelani: Munihoole weera naawaneno awAmoni ni munookhala mutokweene a ootheene ankhala oGiliyade.”

⁹Yefeta aawaakhula: “Nyuwosa mwakihokoloxa weera kaawaneno awAmoni ni Yave akinnyerera, kinookhala mutokweenaanyu?”

¹⁰Ahooleli a oGiliyade yaamwaakhula: “Yave ti namoonaahu: Ninoopaka yeeyo muhimmaanyu.”

¹¹Vano Yefeta aarowano ahooleli a oGiliyade ni muloko waamukhaliha mutokweene ni muhooleli a anakhotto. Owo aaphitela ohoolo wa Yave oMizepa maswaawe ootheene aahimalaawe.

¹²Vanonto Yefeta aamurumihela anamitthenga mwene a awAmoni ni yookoha ela: “Nootthekenleni eheeni muneeraanyu muniwaneno hiyo?”

¹³Mwene a awAmoni aawaakhula anamitthenga a Yefeta: “aYixrayeli erwaaka wExipitu, yaakuxa elapwaaka okhuma wArenoni mpaka Yaboke, mpakatho oYordanu. Mukihokoloxere ilapo iyo mmuretteleni.”

¹⁴Yefeta aamurumihelatho anamitthenga mwene a awAmoni

¹⁵eeraka: “Masu a Yefeta ti ala: aYixrayeli khayaakunxe elapo ya oMowabe naari ya wAmoni.

¹⁶aYixrayeli erwaaka wExipitu, yeetta munikareni erowaka wa Ephareiya Yooxeera, enaphiya oKadexi.

¹⁷Ehuhuweene yeele aYixrayeli yaamurumihela anamitthenga mwene a awEdomi yeeraka: ‘Munitthunihere ovira elapwaanyu,’ mene mwene a awEdomi khaatthunne. Yaamvekelatho mwene a oMowabe, mene owotho aakhootta. Hiiho aYixrayeli yaakhala oKadexi.

¹⁸Vahoolowaya yaaheetta munikareni exeremaka ilapo sa wEdomi ni oMowabe, mpatta ninkhuma nsuwa wa oMowabe, enakonela okhopela wa wArenoni. Khayaavolowanse oMowabe, niwoko mooloko wArenoni waari mwiinanowaaya.

¹⁹Vanonto, aYixrayeli yaamurumihela anamitthenga Sihoni, mwene a awAmori, mwa yoowo aalamula oHexiboni, emvekelaka: “Munitthunihereke ovira elapwaanyu weera nirowe elapwaahu.”

²⁰Wa soothesene, Sihoni khaakhulenle weera aYixrayeli yaamvira elapwaawe. Aawiitthana anakhottwaawe ootheene othukumana oYahazi, enaawanano aYixrayeli.

²¹Yave, Muluku a aYixrayeli, aamwinnyerera Sihoni ni anakhottwaawe ootheene mmatatani mwa aYixrayeli, ni awo yaangwina. aYixrayeli yaakuxa elapo yootheene ya awAmori yaakhalawo.

²²Yaakuxa elapo yootheene okhuma wArenoni mpaka oYaboke ni okhuma onikareni mpaka oYordanu.

²³Vano, eenre Yave, Muluku a aYixrayeli, awoomolaka awAmori vamaithoni wa aYixrayeli, mulokwaawe, munuupuwela weera munookuxa?

²⁴Nyuwo munookuxa yeeyo mulukwaanyu Kemoxi onoovahaaweni. Hiihotho, nnookuxa yeeyo Yave Mulukwaahu onnivaahaawe.

²⁵Munuupuwela weera nyuwo ti ooreerela ompwaha Balaki, mwaana mulopwana a Zipori, mwene a oMowabe? Owo khatonke onyakulihana hata waawanano aYixrayeli.

²⁶Wookwana iyaakha macira mararu, aYixrayeli yaahaakamela oHexiboni, wAroweri ni mittetthe saarukureenre, vamoha ni isidade sootheene sa mukerekhere wArenoni. Mwahaawaakhenle heeni ehuhuweene yeele yootheene?

²⁷Nkoopakenleni etthu yoonanara, mene munkipakela yoonarara mukiwananaka. Yave ori mphuki athorihe olelo variyari wa aYixrayeli ni awAmoni.”

²⁸Wa soothesene, mwene a awAmoni khaapwatthenle mutthenga Yefeta aamurumihenlaawe.

²⁹Vano Munepa wa Yave waamukhuruwela Yefeta. Aavira oGiliyade ni oManaxe arowaka oMizepa ori oGiliyade ni okhuma vaavaale aahaarowela awAmoni.

³⁰Yefeta aamuroromeliha ni nlipelo Yave eeraka: “Nyuwo mwakinnyerera awAmoni,

³¹akhalaru anaakhume vamulako wa empaaka miyo akiciceeraka ngwaawinanimwaka awAmoni, vano owo anaakhale a Yave. Kinoompaka yooveleela yoohisa.”

³²Yefeta aarowa waawanano awAmoni ni Yave aawinnyerera mmatatanimwawe.

³³Aaphwata isidade miloko miili okhuma wAroweri mpaka amwaattamana a oMiniti, aphiyaka wAbeli-Keramimi. Hiiho aYixrayeli yaahaawina awAmoni.

³⁴Yefeta aakhuvelaawe owaannyawe oMizepa, mwanawe muthiyana aakhumela vamulako aaciceeraka, iinaka oruma wa akarakaxa. Aari mwaana mmoharu. Yefeta khaarino mwaana mukina, hata mulopwana, naari muthiyana.

³⁵Amoonakaru mwanawe, aahaahula soowarasawe akhuwelaka: “Ii! Mwanaka! Koothananiheya ni ooriipiweene murima mwaha wa nyuwo! Koomuroromeliha ni nlipelo Yave etthu kihingweraaka ohikwanihera.”

³⁶Mwaana ole aaweerela: “Tiithi, moomuroromeliha Yave. Mukipakele yeeyo ntoko munroromelinghaanyu, eenre Yave awiinlelaka ikukuttula amwiittanaanyu awAmoni.

³⁷Wa soothesene, mukitthunihere nivekelo nimoha nna: mukihiye wa nyeeri miili weera kirowe mmattumuxani kiinle vamoha ni asikhwaaka, niwoko nkirwa kitheliwa.”

³⁸Yefeta aamweerela: “Oroweke.” Aamutthunihera orowa wa nyeeri miili. Owo ni asikhwaawe akina yaarowa mmattumuxani, eniinlasa niwoko na ohitheliwawawe.

³⁹Siviraleene nyeeri miili aahokoleela wa atithawe ni Yefeta aampakela yeeyo aaroromelinghaawe. Mwaamwali ole aari oowiikosopa. Yaakhumme vaavaale ekhovelelo ya aYixrayeli

⁴⁰asimwali annirowa wookwana mahuku maxexe khula eyaakha weera yamuupuwelele mwaana muthiyana a Yefeta, muGiliyade.