Read Makhuwa-Shirima Ahooleli 13 Bible Online

Ahooleli 13 - Makhuwa-Shirima bible

Ahooleli 13

¹Emaara ekinatho aYixrayeli yaapaka soonanara vamaithoni wa Yave. Tivawo Yave aawinnyerenraawe mmatatani mwa aFilisti wookwana iyaakha miloko mixexe.

²Vano mulopwana mmoha a oZoreya iitthaniwa Manowa, a epuumba ya aDani, aamuthenle mwali eekupa, ni khaarino anamwane.

³Ndyelo a Yave aahiixoonihera wa yoowo, anamweerela: “Nyuwo mwali eekupa muhirino anamwane, mene munoorupala mungyare mwaana mulopwana.

⁴Mwiipasoope weera muhiwure eviinyu naari soowura sikina soohapala ni weera muhiceru yoohitteela,

⁵niwoko munoorupala ni munoomuyara mwaana mulopwana. Mayihaawe ehimetthiwe, niwoko mmiravo anaakhale muNaziri* ootteeliheriwa Muluku okhuma oyariwawawe. Owo anaapacere waatapuxa aYixrayeli mmatatani mwa aFilisti.”

⁶Muthiyana ole aarowa waathalihera sootheene aiyawe eeraka: “Mmoha a Muluku aahoorwa wuuluma ni miyo. Aari oovuwaxa ntoko ndyelo a Muluku. Nkimukonghe aakhumelelaawe owo khakileenle nsinanawe.

⁷Owo ookileela: ‘Munoorupala ni munoomuraya mwaana mulopwana. Muhiwure eviinyu naari soowura sikina soohapala ni muhiceru etthu yoohitteela, niwoko mmiravo owo anaakhale muNaziri* ootteeliheriwa Muluku okhuma oyariwawawe mpaka okhwawawe.’”

⁸Vano Manowa aamvekela Muluku: “Ii! Yave, kinoodyoonttelelani, weera mulopwana a Muluku munirumihenlaanyu, ahokoleele wa hiyo weera anixuttihe yoompakela mwaana aneera ayariwe.”

⁹Muluku aamwiiwa Manowa ni ndyelo a Muluku aahokoleela wuuluma ni muthiyana, owo areene mmatta. Wa soothesene, aiyawe yeera ehikhanlewo.

¹⁰Muthiyana aahaatthimakela aiyawe, anaathalihera: “Mulopwana yoole iixoonihenre wa miyo nihuku nne, ola ori va!”

¹¹Manowa aavenya, anamutthara mwaariye. Aphiyakaru wa mulopwana, aamukoha: “Ti nyuwo muulumme ni mwaaraka?” Owo aamwaakhula: “Ti yoomi.”

¹²Vano Manowa aamukoha: “Yakwaniheriwa maswaanyu, nnimuhuweke hai mwaana? Anaapake eheeni?”

¹³Ndyelo a Muluku aamwaakhula: “Amwaarinyu etthariheke sootheene seiye kaalamulenlaaka.

¹⁴Awo ehiceru yoowiima ya evideira*, ehiwure eviinyu naari soowura sikina soohapala hata ehiceru yoohitteela. Yiiweleleke sootheene kaalamulenlaaka.”

¹⁵Manowa aamweerela ndyelo a Yave: “Nintthuna weera mukhale ni hiyo weera nooreherereleni mwaapuri.”

¹⁶Ndyelo a Yave aamwaakhula: “Hata kikhalaka, nkikhuura etthu, vaheera mwareherere yooveleela yoohisa mumveleelele Yave.” Vano Manowa khaasuwela weera aari ndyelo a Yave.

¹⁷Owo aamukoha ndyelo a Yave: “Nsinani weera noottittimihereleni yaakwaniheriwaka maswaanyu?”

¹⁸Ndyelo aamwaakhula: “Munkohera heeni nsinanaka? Ti nootikhinsa.”

¹⁹Manowa aamukuxa mwaapuri vamoha ni yooveleela ya etrigu, anamveleelela Yave vamwala. Vanonto Yave aapaka etthu yootikhiniheya Manowa ni mwaarawe yoonaka:

²⁰Malumi a mooro yaawelaaya valtaarini* erowaka osulu, ndyelo a Yave aawela vamalumini. Yoonakaru yeeyo, Manowa ni mwaariye yahuuramelasa vathi.

²¹Ndyelo a Yave iixooniheraka wa yaawosa, Manowa aasuwela weera aari ndyelo a Yave.

²²Aamweerela mwaariye: “Nnimookhwa, niwoko noomoona Muluku!”

²³Mwaariye aamwaakhula: “Yave aatthunne oniiva, saano ahaakhenle sooveleelasahu soohisa ni sa etrigu, naari khaanoonihera itthu sootheene iya onoonihenraawe.”

²⁴Muthiyana ole aamuyara mwaana mulopwana, anamutteha Samesoni. Ole aahunnuwa ni Yave aamureeliha.

²⁵Munepa wa Yave waapacera omuhoolela owo areene oManahe-Dani, eriyari ya oZoreya ni wExtawoli.