Read Makhuwa-Shirima Ahooleli 16 Bible Online

Ahooleli 16 - Makhuwa-Shirima bible

Ahooleli 16

¹Nihuku nimoha Samesoni aarowa oGaza, anamoonawo puuta, anaviriha ohiyu ni yoowo.

²Atthu a oGaza yaaleeliwa: “Samesoni ori muumu!” Awosa yaarica nipuro, enangwehererasa ohiyu wootheene vamulako wa esidade. Ohiyu wootheene khayaasunse yeerelanaka: “Oxeexelo, nnoomwiiva.”

³Wa soothesene, Samesoni aakonne paahi mpaka ohiyu eriyari. Aavenya, analipiha ovara masele a mulako wa esidade vamoha ni isereemusaya soopiili, anaphela vamoha ni anampattika. Aathatela sootheene, anarongha mpaka vasulu nttumuxa nri ohoolo wa oHeberoni.

⁴Eviraleene ehuhu, aamusivela muthiyana mmoha aakhala vareyareyani na oSoreki, nsinanawe Delila.

⁵Ahooleli a aFilisti yaarowasa omweerela: “Moone mwawera omuviriyela weera ooleeleni exiiri ya ikurusawe sitokotoko ni moota heeni nneeraahu ningwine nimutthukaka ni nimulamulaka. Khula mutthu a hiyo onimoovahani ixekeli* 1 100.”

⁶Hiiho Delila aamukoha Samesoni: “Dyoontte mukileele sinrweelaayawo ikurusanyu sitokotoko ni moota muneeraanyu mutthukiwe ni mulamuliwe.”

⁷Samesoni aamwaakhula: “Mukina akitthukela miramba sinyowani mithannamiili soohuuma, kinookhala oohilipa antoko mutthu piswa.”

⁸Ahooleli a aFilisti yaamuruuhela miramba sinyowani mithannamiili soohuuma, anamutthukano.

⁹Asilopwana akina yiipithihiweene okwartu, Delila aakhuwela: “Samesoni, aFilisti ahoorweelani!” Wa soothesene, aapasa miramba iye antoko nliinya niikaathiweene mukerekhere mooro. Vano exiiri ya ikurusawe khayooneleliwe.

¹⁰Vanonto Delila aamweerela Samesoni: “Mookipakiha nsikini! Haya, mukileele moota woowootthukani.”

¹¹Owo aamwaakhula: “Mwakitthukano mukilipihaka mikhoyi sihitonke ovareliwa muteko, kinookhala oohilipa antoko mutthu piswa.”

¹²Hiiho Delila aakuxa mikhoyi sihitonke ovareliwa muteko, anamutthukano. Vanonto, asilopwana akina yiipithihiweene okwartu, Delila aakhuwela: “Samesoni, aFilisti ahoorweelani!” Wa soothesene, aapasa mikhoyi iye antoko nliinya.

¹³Vano, Delila aamweerela Samesoni: “Mpaka vano mookipakiha nsikini mukilokotthaka. Mukileele moota woowootthukani!” Owo aamwaakhula: “Nyuwo mwatthava matthuttu mathannameeli a mayihaaka ni maakina ootthava mutthukelelaka ni maakineene, kinookhala oohilipa antoko mutthu piswa.” Vanonto, Samesoni akonaka, Delila aatthavano matthuttu mathannameeli a mayihaawe maakina ootthava,

¹⁴anatthukela vamaakinani vamoha. Aakhuwelatho: “Samesoni, aFilisti ahoorweelani!” Avenyaka mookonani aapasa mayihi vamaakinani iitaphulaka matthuttu.

¹⁵Vano Delila aamweerela: “Ongwereya hai weera munnakisivela muhikiroromelaka miyo? Ela ti emaara yanaararu munkipakihaanyu nsikini muhikileelaka exiiri ya ikurusanyu sitokotoko.”

¹⁶Annahokoleela yookoha emoharu yeela mpaka Samesoni okhulumuwaxa oxumpwa mwaha wa ottaandawulawawe.

¹⁷Hiiho aamuthalihera sootheene: “Nkinametthiwe, niwoko miyo ti muNaziri* okhuma oyariwawaka. Kametthiwa, ikurusaka sinookimalela ni kinookhala oohilipa antoko mutthu piswa.”

¹⁸Delila oonakaru weera aamuthalihera exiiri yootheene, aahaarumihela mutthenga ola ahooleli a aFilisti: “Ngweeketho — ookileela soothesene.” Vano ahooleli a aFilisti yaahokoleela ekuxaleene eparatha*.

¹⁹Amwaatalenleene vaciroroniwawe, aamwiitthana mulopwana mmoha weera ameetthe matthuttu mathannameeli a mayihaawe apaceraka hiiho omulamula. Vano ikurusawe saammalela.

²⁰Aakhuwelatho: “Samesoni, aFilisti aahoorweelani!” Aavenya mookonani iixuupuwelaka: ‘Kinoovenya ntoko imaara sikina ni nkiitapuxe.’ Wa soothesene, khaasuwenle weera Yave aamuhiya.

²¹Vano aFilisti yaamvara, enazoola maithwaawe, enamurongha oGaza. Yaamutthuka ni onyooro wa ebronze* ni yaamulamula opirikixa nxilo mukaliposo.

²²Wa soothesene, mayihaawe yaapacera wunnuwatho.

²³Ahooleli a aFilisti yaathukumana weera empakele yooveleela etokotoko mulukwaaya Dagoni epakaka efesta. Awosa yaaheera: “Mulukwaahu Dagoni ooninnyerera mwiittanaahu, Samesoni.”

²⁴Atthu emoonakaru Samesoni, yaamulapa mulukwaaya yeeraka: “Mulukwaahu Dagoni ooninnyerera mwiittanaahu — yoole aaphwata elapwaahu awiivaka asinkhwiihu ancipale.”

²⁵Awosa murima waatteenleene, yaakhuwela: “Muniruuhele Samesoni weera nimutthekulele.” Vano aaroweliwa Samesoni mukaliposo, ni owo aahaatthekuliha. Emuronghaleene eriyariya ya amarimbu eeli,

²⁶Samesoni aamweerela mmiravo aamvarela ntata: “Okikhavihere paahi waavara amarimbu anlipiha empa ya muluku Dagoni weera kaaphiteere.”

²⁷Empa yaasareya asilopwana ni asithiyana. Ahooleli ootheene a aFilisti yaakhalawotho ni vataratoni yaakhala wookwanaka asilopwana ni asithiyana macira miloko miraru weera etthekulihiwe ni Samesoni.

²⁸Vano Samesoni aamvekela Yave eeraka: “Ii! Yave, Yave! Mukuupuweleleke miyo. Ii! Muluku! Kinoodyoonttelelani weera mukivahe ikuru emaara yookisera ela. Kintthuna waarulela ikukuttula aFilisti niwoko na maithwaaka.”

²⁹Samesoni aahiilipihera mwaamarimbuni muloko neeli a eriyari, mwa yaawo yaalipiha empa ya Dagoni. Aavarenleene amarimbu eeli ale — mukina moono mulopwana ni mukina muthiyana,

³⁰Samesoni aaheera: “Kikhwe vamoha ni aFilisti!” Vano aahaakakha ni ikurusawe sootheene ni empa ya Dagoni yaahaamorela ahooleli ni atthu ootheene yaari mwemmo. Hiiho okhwawawe Samesoni aawiiva atthu ancipale opwaha okumaawe wootheene.

³¹Vahoolowaya axunneiye ni emusi yootheene ya atithawe yaarowa okuxa muttembo. Yaaruuha, enavitha eriyari ya oZoreya ni wExtawoli munihiyeni na atithawe Manowa. Aahaahoolela aYixrayeli wookwana iyaakha miloko miili.