Read Makhuwa-Shirima Ahooleli 17 Bible Online

Ahooleli 17 - Makhuwa-Shirima bible

Ahooleli 17

¹Vano mulopwana mmoha iitthaniwa Mika aakhala mweelaponi ya mmanyaakoni sa wEfrayimi.

²Aaweerela amayawe: “Kookhalano ixekeli* 11 000 seiye sa eparatha* mwiiyeriwaanyu, mwa seiyo kiiwalaaka silapheliwaka. Ti miyo kiiyale.” Vano amayawe yaamweerela: “Yave ooreeliheni, mwanaka!”

³Owo aahokoloxerakaru amayawe ixekeli* 11 000 sa eparatha*, ale yaaheera: “Miyo kinoomutteelihera Yave eparathaaka* weera mwanaka apake ecaambulo yoohaniwa nitho muluku a eyuuma. Miyo kinoohokoloxera weyo.”

⁴Mwanaya aahokoloxerakaru eparatha* amayawe, awo yaakuxa ixekeli* macira meeli sa eparatha*, enamvaha namahana a eparatha* aahanne ele mucaambuloni, ampakakatho muluku a eyuuma ni yeeyo. Vano ecaambulo ele ni muluku oohaniwa ole siikaathiwe mpaani mwa Mika.

⁵Mulopwana ole Mika aakhalano Nipuro Nootteela*. Aapaka mukaandyo wa esaserdoti ni miluku sikina sa emusi, anamukhaliha mmoha a anamwanaawe ntoko musaserdotaawe.

⁶Ehuhuweene yeele aYixrayeli khayaarino mwene — khula mutthu aapaka yeeyo yaamureerela.

⁷Vanonto, mmiravo mmoha muLeevi a oBeteleheemu oYuda aakhala eriyari ya nihimo na aYuda

⁸aavenya esidadeene yeele aasaka nipuro nikina nookhala. Eettaka hiihaale aaphiya elapo ya mmanyaakoni sa wEfrayimi, aneemela vaate wa Mika.

⁹Mika aamukoha: “Munrweela woowi?” Owo aamwaakhula: “Miyo muLeevi a oBeteleheemu oYuda. Kinaasaasa nipuro noomaka.”

¹⁰Mika aamweerela: “Mukhale ni miyo ntoko atithaka ni musaserdotaaka ni kinimoolivani ixekeli* muloko sa eparatha* vayaakhani nitho ikuwo ni sooca.”

¹¹Mmiravo muLeevi aahaakhulela okhala ni yoowo ni aathatuwa ntoko mmoha a anamwanaawe.

¹²Mika aamukhaliha muLeevi ntoko musaserdotaawe ni mmiravo ole aakhala vaatevawe.

¹³Mika aaheera: “Vano koosuwela weera Yave onookoonihera murima wooreera, niwoko muLeevi ola oothatuwa musaserdotaaka.”