Read Makhuwa-Shirima Ahooleli 18 Bible Online

Ahooleli 18 - Makhuwa-Shirima bible

Ahooleli 18

¹Ehuhuweene yeele aYixrayeli khayaarino mwene ni epuumba ya Dani yaasaasa nipuro noowiitekiha, niwoko nlelo yeera ehaakhenle yoohiyeriwaaya variyari wa ipuumba sa aYixrayeli.

²Hiiho aDani yaahaarumihasa anakhotto ooweraxa athanu a oZoreya ni wExtawoli weera yahottele okhala weenraaya. Asilopwana ale yaakhula mahimo ootheene a epuumba. Awo yaahaalamula: “Murowe moone elapo.” Vano asilopwana ale yaaphiyasa mmanyaakoni sa wEfrayimi, enarowasa owannyawe Mika, enavirihawo ohiyu.

³Yaakhuveelaaya vaate wa Mika, yaasuwela nsu na mmiravo muLeevi ole. Yaamwaattamela, enamukohakoha: “Yooruuhaleni taani wenno? Muneerani wenno? Mukhalenle heeni wenno?”

⁴Owo aahaathalihera yeeyo Mika aampakenlaawe amweerelaka: “Owo ookiiwananano okhala musaserdotaawe.”

⁵Awosa yaamvekela: “Dyoontte, munkohe Muluku waneettela nnene mukwaahaahu.”

⁶Musaserdoti* aawaakhula: “Murowe mmuretteleni — mukwaahaanyu wohaakhuleliwa ni Yave.”

⁷Hiiho asilopwana athanu yaattimula, enaphiya oLayixa, weiwo yoonnayawo weera atthu yaari oolipeene, ntoko aSidoni. Yaari ooheeteteya, oomaaleleya, yoonaka mpuha niwoko elapwaaya kheewo yaahaleela. Yaahoonatho weera muloko ole waakhala ottaiwene ni aSidoni ehiiwananaka ni wakhalaru muloko.

⁸Asilopwana athanu ale yaahoolenlaaya oZoreya ni wExtawoli, axunnaya yaahaakoha: “Moonelenle eheeni?”

⁹Awosa yaawaakhula: Nrowe, nawaneno! Nohoona weera elapwaaya ti yooreeraxa. Muhipiseke, muhihovele orowawo weera mwakuxe.

¹⁰Mwaaphiyakawo, munrowa ophwanya muloko oheeteteyaka ni elapo yoothanuwa, mwa yeeyo Muluku owinnyenraaweni. Elapo ehinthowaayaru etthu.

¹¹Vano asilopwana macira mathannamosa a epuumba ya Dani, oolikaneene owana, yaattimula oZoreya ni wExtawoli.

¹²Mmukwahani, yaakonela vakhiviru wa oKiriyati-Yeharimi, oYuda. Tivawo elapo ya mpatta ninkela nsuwa wa oKiriyati-Yeharimi eniitthaniwaaya Mahane-Dani mpaka olelo.

¹³Ovenyera vaavaale yaarowa mmanyaakoni sa wEfrayimi, enaphiya vaate wa Mika.

¹⁴Vanonto, asilopwana athanu yaahottenle elapo ya oLayixa yaaweerela axunnaya: “Nyuwo moosuwela weera emoha ya impasene seiya wookhalamo mukaandyo wa esaserdoti, miluku sikina sa emusi, ecaambulo emoha yoohaniwa ni muluku mmoha a eyuuma? Moosuwela yeeyo entthuneya opaka.”

¹⁵Yaahaattamela, enavolowa mpaani mwa mmiravo muLeevi, vaate wa Mika, enamuulumiha.

¹⁶aDani macira mathannamosa, oolikaneene owana, yaaheemela vamulako.

¹⁷Asilopwana athanu yaahottenle elapo yaavolowasa mpaani, enakuxa ecaambulo, mukaandyo wa esaserdoti, miluku sa emusi ni muluku a eyuuma, musaserdoti* ni anakhotto macira mathannamosa yeemenleene vamulako.

¹⁸Vano asilopwana ale evolowasakaru mpaani mwa Mika weera ekuxe ecaambulo, mukaandyo wa esaserdoti, miluku sa emusi ni muluku a eyuuma, musaserdoti* aahaakohasa: “Mumpakasa eheeni?”

¹⁹Awosa yaamwaakhula: “Mmaaleke, muhilokolole etthu. Munitthare ni mukhale atithihu ni musaserdotaahu. Fataari orumeela epuumba ni nihimo na aYixrayeli ntoko musaserdoti* ohikanle orumeela paahi emusi ya mulopwana mmoha.”

²⁰Vanonto, musaserdoti* aahakalala. Aakuxa mukaandyo wa esaserdoti, miluku sa emusi ni muluku a eyuuma, anarowa vamoha ni yaawosa.

²¹Ewiikaathiki anamwanaaya, mihuwosaya ni soorelasaya ohoolowaya, yaarukunuwa, enattimula.

²²Awosa erakamenleene vaate wa Mika, asilopwana yaattamanne ni Mika yaathukumanyihiwa, enaaphwanyasa aDani.

²³Yeenre yarwaaka ekhuwelaka ottuliwaya, aDani yaarukunuwa, enamukoha Mika: “Makacamiho heeni muraanyuno? Mwaalattulenle heeni asilopwanaanyu weera eniwaneno?”

²⁴Owo aawaakhula: “Mookuxa miluku kipankaaka nitho musaserdotaaka. Kihalanne eheeni? Munkohera heeni: ‘Makacamiho heeni muraanyuno?’”

²⁵Vano aDani yaamwaakhula: “Muhaakhulane ni hiyo weera asilopwana akina oowali ehoowananeni ewiivakani nyuwo ni amusaanyu.”

²⁶Hiiho aDani yaapwaherera ni mukwahaaya, vaheera Mika, oonaka weera yaalipaxa, aarukunuwa, anahokoleela owaani.

²⁷aDani yaakuxa yeeyo Mika aapankaawe vamoha ni musaserdotaawe, enarowano oLayixa, elapo ya muloko wooheeteteya ni wa murettele. Awosa yaawiivasa ootheene ni ekatana, enahisa esidadaaya.

²⁸Khaariwo oowaatapuxasa, niwoko yaakhalasa ottai wa aSidoni ni khayiiwananoru muloko mukina. Esidade yaari mureyareyani naapwaherera mpaka oBeti-Rehobi. aDani yaarasela esidade, eniitekihawo.

²⁹Esidade ele, khalayi yiitthaniwa Layixa, yaattehasa Dani, ettittimiheraka nikholonaya Dani, mwaana mulopwana a Yixrayeli.

³⁰Weiwo aDani yaahiipakelasa miluku sikina ni Yonatani, mwaana mulopwana a Gerxomo, mwaana mulopwana a Moisesi, ni anamwanaawe asilopwana yaari asaserdoti* a epuumba ya Dani mpaka ehuhu muloko waaronghiwaaya elapo ekina.

³¹Yaapwaherera olapa miluku sikina Mika aapankaawe wa ehuhu yootheene Empa ya Muluku yaaraaya oXilo.