Read Makhuwa-Shirima Ahooleli 19 Bible Online

Ahooleli 19 - Makhuwa-Shirima bible

Ahooleli 19

¹Ehuhuweene yeele aYixrayeli khayaarino mwene. Eyo eri hiiho, aakhumelela muLeevi mmoha aamanke mmanyaakoni sa wEfrayimi, mulaponi yoorakamela, aahiixaasera ekuxo oBeteleheemu oYuda.

²Wa soothesene, ekuxo ele khayaaroromeleya. Yaamuthaama ehokoleelaka vaate wa atithaya oBeteleheemu, oYuda. Siviraleene nyeeri mixexe,

³aiyawe yaarowa omviriyela weera ahokolowe. Aamurowano murumeiyaawe ni abuuru eeli. Ekuxo ele yaamvoleiha muLeevi mpaani mwa atithaya ni awo emoonakaru, yaamwaakhela nnene.

⁴Atatawe oowaathelela, yaamunyesereriha weera akhale vaavaale; ni owo aapwaherera okhala ni yaawosa wookwana mahuku mararu acaaka, awuraka ni akonakawo.

⁵Vanihukuni nanaaxexe aapeherera ovenya, mene atithaya ekuxo yaamweerela mukamwenaaya: “Muceeke toko ni vahoolowaya mpwaheke.”

⁶Hiiho ooweeli ale yaakilaathi weera ece ni ewure. Vahoolowaya atithaya ekuxo yaamweerela: “Dyoontte, mukhaleke ohiyu ola muhakalalaka.”

⁷Mulopwana ole avenyaka weera apwahe, atatawe oowaathelela yaamuviriyela weera akonetho ohiyu ole.

⁸Oxeexelo, vanihukuni nanaathanu, owo iirehereraawe weera apwahe, atatawe oowaathelela yaamweerela: “Nrowe nice. Ngweherereke mpaka oxekuwa.” Hiiho ooweeli awo yaahooca.

⁹Vanonto mulopwana ole, ekuxowaawe ni murumeiyaawe yeemenlaaya weera epwahase, atithaya ekuxo yaaweerelatho: “Moone, wohiilaru. Mvirihe ohiyu vaava. Mukhale ni muhakalale. Mpeheraseke omaalo murowaka owaani.”

¹⁰Ahitthunaka ovirihatho ohiyu, mulopwana ole aattimula, anarowa oYebusi (eyo tiiyo oYerusaleemu) vamoha ni abuurwaawe eeli oowiikaatheriwa yookilaathela ni ekuxowaawe.

¹¹Aakhuveela oYebusi ni, weenre wiilaka, murumeiyi aamweerela pwiiyaawe: “Nrowe, neemeleke musidadeni ela ya aYebusi weera nivirihemo ohiyu.”

¹²Pwiiyaawe aamwaakhula: “Hoye, nihivolowe musidadeni yoohikhala yawihu, niwoko amakaaya khaahiyono aYixrayeli. Nrowe oGibeya.”

¹³Aapwaherera weera: “Nrowe, neerereke ophiya oGibeya hoye hoye oRama weera navirihewo ohiyu.”

¹⁴Hiiho yaapwaherera ni nsuwa naaneelela ekhuveelaka oGibeya, elapo ya aBenyamini.

¹⁵Yaavolowasamo weera evirihemo ohiyu. Yaarowa okilaathi vanipuwani na esidade. Wa soothesene, khaawo aalattunle weera yavirihe ohiyu owannyawe.

¹⁶Ohiyu ole namuuluvala a mmanyaakoni sa wEfrayimi aamanke oGibeya aavolowa akutthunleene mmatta. Vano atthu a esidade ele yaari aBenyamini.

¹⁷Awoonaka anamukwaha ereene vanipuwani na esidade, namuuluvala ole aahaakoha: “Munrweela woowi? Munkela woowi?”

¹⁸Owo aamwaakhula: “Nri ni mukwaha ninkhuma oBeteleheemu oYuda nirowaka elapo ya ottai eri mmanyaakoni sa wEfrayimi, mwa weiwo kinkhalaakawo. Kaakenle oBeteleheemu oYuda ni vano kinrowa Empa ya Muluku. Vaheera va khaawo okaakhelenle owannyawe.

¹⁹Nookhalano malaxi ni yooca wa abuuruwaahu ni nookhalano yooca ni eviinyu wa miyo, ekuxowaaka ni wa mmiravo ori ni arumeiyaanyu. Kheewo ennihaleela.”

²⁰Namuuluvala aamweerela: “Ngwe nnene owannyaka. Kinimookhaviherani wa yeeyo muntthunaanyu. Muhivirihe ohiyu vanipuwani na esidade.”

²¹Hiiho aahaarowano owannyawe, anaaciha abuurwaawe. Aarapihaleene inaawosaya, yaahooca ni yaawura.

²²Awosa ehakalalaka hiihaawo, alavilavi akina a esidade yaarica empa. Emanaka nsele na empa, yaamukhuwelela namuuluvala aari muneene a vaate vale: “Munkhumihere vaate mulopwana ovolongwe mpaanimwanyu weera nimukoneno!”

²³Muneene vaate aakhuma, anaweerelasa: “Hoye asinthamwenaaka, dyoontte muhipake yoowuuliha muru eyo. Mulopwana ole mulettwaaka. Muhipake osikineene yoola.”

²⁴Mmoone, ori va mwanaka muthiyana ori mwaamwali oowiikosoopa nitho ekuxowaawe mulettwaaka. Miyo kinimooruuhelasani weera mwaavarele muteko ni mpake ni yaawosa yeeyo muntthunaanyu. Muhimpakele mulopwana ole osikineene yoola.”

²⁵Wa soothesene, asilopwana ale khayaatthunne omwiiwa. Vano muLeevi aakhumihera vaate ekuxowaawe ni awosa yaamukonano empakelaka yoonanara ohiyu wootheene ni oxeexelo yaamuhiya arowaka.

²⁶Oyaaka ni oxa muthiyana ole aahokoleela vaate yaaphiyenraaya apwiyaawe, anamorela vamulako, anakhalawo mpaka oxa.

²⁷Pwiiyaawe avenyakaru oxeexelo ni ahulaka nsele weera apwaheke ni mukwahaawe, aaphwanya ekuxowaawe emorenleene vamulako yookolenleene matataaya vanseleni.

²⁸Owo aaheerela: “Ovenye, nroweke!” Mene khayaakhunle. Vano mulopwana aateexera vabuuruniwawe, anarowa owaani.

²⁹Aphiyaka owaani, aakuxa mwaalo, anameyanya erutthu ya ekuxowaawe mipatta muloko ni miili, anakawela mipatta sootheene sa aYixrayeli.

³⁰Ootheene yoonne yeeyo yaaheera: “Kheenooniwe hata kheeneereye etthu siiyeela okhuma nihuku aYixrayeli yaakhummaaya wExipitu. Muupuwele yeeyo! Mutthokelele! Muhime yooweera!