Read Makhuwa-Shirima Ahooleli 2 Bible Online

Ahooleli 2 - Makhuwa-Shirima bible

Ahooleli 2

¹Ndyelo a Yave aakhumme oGiligali arowaka oBokimi, aneera: “Kohookhumihasani wExipitu ni kaahooruhasani elapo kaaroromelinghaaka ni nlipelo waavaha makholowaanyu. Miyo kaaheera: ‘Nkirwa kiphwata wiiraanawaka ni nyuwo,

²ni nyuwosa khamwiiraanano miloko sa elapo ela, mene mmwaaphwate altaaraaya.’ Muhikiiwelelenle heeni?

³Vanonto kinooleelasani weera nkiwoomolasa ohoolowanyu. Awosa eniikhale amwiittanaanyu ni milukusaya nsikale ntaphananyu.”

⁴Ndyelo a Yave amalihakaru wuuluma, muloko wootheene wa aYixrayeli waahiinla ikuttho.

⁵Vano yaatteha nipuro nne oBokimi ni yaampakelawo sooveleela Yave.

⁶Yoxuwa aalaxerakaru aYixrayeli, awosa yaarowa waakamela elapo, khula epuumba wa yoohiyeriwaaya.

⁷aYixrayeli yaamurumeela Yave mookumini wootheene wa Yoxuwa ni wa ahooleli yaahanle ni okumi ohoolo wa okhwa wa Yoxuwa ni yoonne sooweereya sitokweene sa Yave aaweerelaka aYixrayeli.

⁸Yoxuwa, mwaana mulopwana a Nuni, murumeiyi a Yave, aakhwiiye ni iyaakha ncira ni muloko mmoha.

⁹Atthu yaamvithenle mweelaponi ya yoohiyeriwaawe, oTimenati-Sera, mmanyaakoni sa wEfrayimi, mpatta wa ottuttuwani wa mwaako oGahaxi.

¹⁰Vano emalamanleene makholo a ekhapira yootheene yeele, yaakhumelela ekhapira enyowani yahaamusuwenle Yave, hata yeeyo aapakenlaawe aYixrayeli.

¹¹Vanonto aYixrayeli yaapaka soonanara vamaithoni wa Yave elapaka miluku sikina siniithaniwa aBahali*.

¹²Yaamuhiya Yave, Muluku a makholowaaya, aakhumihanse wExipitu. Yaatthara, enalapa miluku soohiyanahiyana sa miloko saarukureenre, etannyaka isara sa Yave.

¹³Yaamuhiya Yave, enamulapa Bahali* ni miluku sikina siniitthaniwa Axetoroti.

¹⁴Isara sa Yave saahaapattela aYixrayeli ni Owo aawinnyerera mmatatani mwa alavilavi, mwa yaawo yaahuhunle. Owo aawinnyerera wa amwiittana a mukhwipimwaya, wa yaawo aYixrayeli yahaawenraaya waawina.

¹⁵Imaara sootheene aYixrayeli yaarowaaya okhottoni, ntata na Yave nannawiittasa moota wooweera khayaawina, ntoko Yave aawooperenraawe alipelaka. Wannaakhalela othanana otokotoko.

¹⁶Vano Yave aahaakhaliha ahooleli, mwa yaawo yaatapunxe mmatatani mwa yaale yaawanano.

¹⁷Hata hiiho awosa khayaatthunne owiiwa ahooleli, mene yaanlavalava ni miluku sikina elapaka iye. Awosa woowaakuveya yaahiya ephiro makholowaaya yeettaaya. Makholowaaya yaamwiiwelala Yave, mene awosa hoye.

¹⁸Imaara sootheene Yave aarumihelaawe muhooleli, Owo aakhala ni muhooleli aavuluxaka mmatatani mwa amwiittanaaya, muhooleli areene nlelo ni okumi. Yave aahaamorela ikharari mwaha wa wiinlawaya ohoolo wa yaale yaahooxa ni yaathananiha.

¹⁹Vaheera aakhwaawe muhooleli, aYixrayeli yaahokoleela iphiro sootepaxa oopwaha sa makholowaaya, ettharaka, ekokhorelaka ni elapaka miluku sikina. Yannakhootta ohiya mitekosaya soonanara ni iphirosaya yaawaatelelaaya.

²⁰Tivawo isara sa Yave saapattenlaaya aYixrayeli ni Owo aaheera: “Weenre muloko ola onanarihaka wiiraana kaapakenlaaka makholowaaya ni ohikiiwaka,

²¹Miyo nkoomolaru ohoolowaya hata muloko mmoha, mwa yoowo Yoxuwa ohiyalaawe akhwaaka.

²²Miyo nkiwoote murima aYixrayeli weera kiwoone awosa yatthara ephiro ya Yave yeettelaka ntoko yaapankaaya makholowaaya.”

²³Yave aatthunihera weera miloko iye saapwaherenre. Khoomonle khuluwi, khinnyerenre mmatatani mwa Yoxuwa.