Read Makhuwa-Shirima Ahooleli 20 Bible Online

Ahooleli 20 - Makhuwa-Shirima bible

Ahooleli 20

¹Vano aYixrayeli ootheene okhuma oDani mpaka oBerxeba ni wa elapo ya oGiliyade yaahoorwa ni murima mmoha ethukumanaka oMizepa vamaithoni wa Yave.

²Ahooleli a ipuumba sa aYixrayeli ootheene yaakilaathi mmapuronimwaya wa muthukumano wa muloko wa Muluku. Yaakhalawo anakhotto 400 000 ni ikatanasaya.

³aBenyamini yaasuwela weera aYixrayeli yaathukumana oMizepa. Vano aYixrayeli yaakohana: “Yoonanara ela yaakhumelenle hai?”

⁴Hiiho muLeevi, iyawe ekuxo yiiviwe, aaheera: “Miyo va vamoha ni ekuxowaaka naaphiya oGibeya, elapo ya aBenyamini, weera navirihewo ohiyu.

⁵Ohiyuweene yoole, asilopwana a oGibeya yaakirweela, enarica empa yeerelaka okiiva. Yaakoniha ekuxowaaka, enakhwa.

⁶Kaakuxa ekuxowaaka, kinathikilanya mipatta mipatta kirumihelaka khula mpatta wa epuumba ya yoohiyeriwa ya aYixrayeli, niwoko yaapaka etthu ele yoonanara ni yoowuulihaxa muru mweelaponi ya aYixrayeli.

⁷Vano, aYixrayeli ootheene nyuwo muri vaava — muulume ni mphuke.”

⁸Atthu ootheene yaaheemela ni murima mmoha yeeraka: “Ahikhale a hiyo anaatthikele owaani. Hoye, hata mmoha anaahokoleele vaatewawe!

⁹Vanonto, nneeraahu nipakele oGibeya ti ala: ninoomwalamwaxa khula epuumba weera noone eniireereliwe!

¹⁰Nimmwaathanla asilopwana muloko a khula ncira ni ncira a khula macira muloko ni macira muloko a khula atthu macira macireene muloko weera emukuxeke pooso a anakhotto oophiyano oGibeya, elapo ya Benyamini. Weiwo yaapakele aGibeya yeeyo amphwanelaaya niwoko na etthu yoowuuliha muru ela epakeiye oYixrayeli.”

¹¹Hiiho aYixrayeli ootheene yaathukumana ni murima mmoha weera yaawaneno aGibeya.

¹²Ipuumba sa aYixrayeli saahaarumihela anamitthenga epuumba ya Benyamini yeeraka: “Muneera hai mwaha wa etthu ela yoowuuliha muru yeereiye variyariwanyu?

¹³Vano muninnyerere alavilavi awo a oGibeya weera niwiive nimalihaka hiiho yoonanara variyari wa aYixrayeli.” Wa soothesene, aBenyamini khayaatthunne owiiwa axunnaya aYixrayeli.

¹⁴Erweelaka musidadenimwaya aBenyamini yaathukumana oGibeya weera yaawaneno aYixrayeli.

¹⁵aBenyamini yaahaathukumanyiha woowaakuveya anakhotto 26 000 ni ikatanasaya vamoha ni anakhotto macira mathannameeli oothanliwa a yaale yaamanke oGibeya.

¹⁶Variyari wa anakhotto ale yaakhala asilopwana macira mathannameeli ooweraxa yaakhala anoonyootho. Khula mutthu a yaale aangwera ovoonya nluku ni ekwamba woohikuza.

¹⁷aYixrayeli, waahiya aBenyamini, yaahaathukumanyiha anakhotto 400 000 ni ikatanasaya — ootheene ooweraxa owana.

¹⁸aYixrayeli yaarowa oBeteli yaasaasaka miruku sa Muluku. Yaaheera: “Epuumba heeni ya hiyo eniipacere waawanano aBenyamini?” Yave aawaakhula: “Eniipacere ti ya Yuda.”

¹⁹Oxaawaya aYixrayeli yaavenyasa, enakonela vakhiviru wa oGibeya.

²⁰Asilopwana a aYixrayeli yaarowa waawanano aBenyamini eniireherera moota woowaawanano aGibeya.

²¹Nihuku nne aBenyamini yaavenya oGibeya, enawiiva 22 000 aYixrayeli mukhottoni.

²²Wa soothesene, asilopwana a aYixrayeli yaalipiherana, enahokoleelatho mapuroweene yaale a nihuku noopacera.

²³aYixrayeli yaamwaattamela Yave yiinlaka vamaithoniwawe mpaka oxekuwa, emukohaka: “Naawananeketho axunnihu aBenyamini?” Yave aawaakhula: “Nyuwosa mwaawananeke.”

²⁴Vano waaxiiye aYixrayeli yaahaarowela aBenyamini.

²⁵Vanonto, emaara ele, aBenyamini evenyakaru oGibeya weera yaawaneno, yaawiiva aYixrayeli 18 000 — ootheenaawo ni ikatanasaya.

²⁶Vahoolowaya aYixrayeli ootheene, yaarowa oBeteli, enakilaathiwo yiinlaka ohoolo wa Yave. Yaatthuka nihuku nne mpaka oxekuwa empakelaka Yave sooveleela soohisa ni sa murettele.

²⁷aYixrayeli yaamukohasa Yave. Vanonto mmahukuni ale Arka* a Wiiraana a Muluku yaari vaavaale ni

²⁸Pinehasi, mwaana mulopwana a Eleyazari, mwaana mulopwana a Aharoni, ti aarumeelawo. Yaamukoha Yave: “Niroweketho naawananeke axunnihu aBenyamini hoye hoye naari?” Yave aawaakhula: “Murowaseke, niwoko omaalo kinoowinnyerera mmatatanimwanyu.”

²⁹aYixrayeli yaahiipitha erinceene oGibeya.

³⁰Vanihukuni nanaararu yaahaarowelasa aBenyamini, eniireherera waawanano aGibeya ntoko yaapankaaya woopacera.

³¹aBenyamini yaakhuma weera yaawaneno ni yaarakamelihiwa ni esidade. Yaapacera waavulaliha aYixrayeli akina ntoko yaapankaaya woopacera ni asilopwana akina miloko miraru yaahiivelasiwa mmatta ni mmiseweni — mmoha onkela oBeteli ni mukina oGibeya.

³²aBenyamini yeeraaya: “Hiyo naawine ntoko woopacera,” vaheera aYixrayeli yeera: “Nrowe nikhume naarakamelihe esidade naaronghaka mmiseweni.”

³³Asilopwana ootheene a aYixrayeli yaavenyasa mmapuronimwaya, enathataana oBahali-Tamari; vaheera aYixrayeli yiipinthe yaahiithupulula mmapuronimwaya, mpatta ninkela nsuwa oGibeya.

³⁴Vanonto anakhotto macira macireene muloko ooweraxa a aYixrayeli yaapacera owanano oGibeya. Ekhotto ele yaavihaxa, vaheera aBenyamini khayaasuwela weera wohaakhuveela otakhaliwa.

³⁵Yave aahaawina aBenyamini vamaithoni wa aYixrayeli ni nihuku nne aYixrayeli yaawiiva aBenyamini 25 100 — ootheenaawo ni ikatana.

³⁶Vano aBenyamini yaasuwela weera aawiniwa. aYixrayeli yaahaakhwenuwa aBenyamini, niwoko yaaroromela anakhotto ale yiipinthe waattamela oGibeya.

³⁷Yaale yiipinthe woowaakuveya yaatthimakela oGibeya, enavolowa musidade, enamwareela, enawiiva amaki ootheene a mwemmo ni ikatana.

³⁸aYixrayeli yaahiiwanana ni yaale yiipinthe weera yaarowa otthuwiha mwiixi mahutteene musidade,

³⁹ni yoonakaru, aYixrayeli yaamuhokoleela waawanano aBenyamini. aBenyamini yaapacera waavulaliha aYixrayeli ewiivaka wookwanaka asilopwana miloko miraru, eneera: “Hiyo nohaawina ntoko ekwaha yoopacera.”

⁴⁰Wa soothesene, opacerakaru otthuwa mwiixi okhuma musidadeni, aBenyamini yaarukunuwa, enoona mwiixi owelaka osulu.

⁴¹Vano aYixrayeli yaahaarukunuwela, vaheera aBenyamini yaateenguwa esuwelaka weera otakhaliwawaya woophiya.

⁴²Hiiho yaahaatthawasa aYixrayeli ekuxeraka ephiro ya onikareni, mene khayaawenre osemba ekhotto. aYixrayeli yaakhumme musidade yaawiivela vaavaale.

⁴³Yaahaaricasa aBenyamini, enaattharelelasa khayaahaawanne waaphwanya waattamela oGibeya, mpatta ninkhuma nsuwa.

⁴⁴Anakhotto aBenyamini 18 000 yaahookhwa — ootheene ooweraxa.

⁴⁵Awosa erukunuwakaru weera etthawele onikareni wookela Mwala wa Rimoni, aYixrayeli yaawiivasa asilopwana macira miloko mithanu mphironi. Awosa yaahaattharelela aBenyamini mpaka oGidomi, enawiivasa atthu oopwaha macira miloko miili.

⁴⁶Nihuku nenenenne yaahookhwa aBenyamini 25 000 ookuxeene ikatana, ootheenaawo yaari anakhotto ooweraxa.

⁴⁷Wa soothesene, aBenyamini macira mathannamosa yaarukunuwa, enatthawela onikareni erowaka wa Mwala wa oRimoni yaakhanlaayawo nyeeri mixexe.

⁴⁸aYixrayeli yaahokoleela wa aBenyamini, enaviravira isidade sootheene ni ikatana ewiivaka ni asinameene mpaka sootheene yaaphwannyayamo. Yaahisa isidade sootheene yaavinraayawo.