Read Makhuwa-Shirima Ahooleli 4 Bible Online

Ahooleli 4 - Makhuwa-Shirima bible

Ahooleli 4

¹Akhwiyeene Ehudi, aYixrayeli yaapakatho soonanara vamaithoni wa Yave.

²Tivawo Yave aawinnyerenraawe mmatatani mwa Yabini, mwene a oKanaani, aalamula oHazori. Mutokweene a anakhottwaawe aari Sisera aamanke oHaroxeti-Hagoyimi.

³Aarino ikaaro sa iyuuma macira mathannamaxexe annaahooxa woonanara aYixrayeli wookwana iyaakha miloko miili, tivawo aYixrayeli yaamukhuwelenlaaya Yave weera aakhavihere.

⁴Vano ehuhuweene yeele Debora, mprofeeti muthiyana, mwaariye Lapadoti, aari muhooleli a aYixrayeli.

⁵Owo aakilaathi vathi wa Nivare na Debora, eriyari ya oRama ni oBeteli, mmanyaakoni sa wEfrayimi. aYixrayeli yannamwaasaasa weera emuleele sookacamihasaya.

⁶Debora aarumiha wiitthaniwa Baraki, mwaana mulopwana a Abinowami aakhala oKedexi, mweelaponi ya oNafitali, anamweerela: “Yave Muluku a aYixrayeli onoolamulelani: ‘Murowe, mwaathukumanyihe anakhotto macira macireene muloko a aNafitali ni aZebuloni ni mwaaroweno omwaako Tabori.

⁷Miyo kinoomutannya Sisera, mutokweene a anakhotto a Yabini vamoha ni ikaarosawe sa iyuuma ni anakhottwaawe mpaka mooloko Kixoni ni kinoomwinnyererawo mmatatanimwanyu.’”

⁸Baraki aamweerela: “Mwarowa ni miyo, kinoorowa, mene mwaahirowa, nkinrowatho.”

⁹Debora aamwaakhula: “Khaveetthu, kinoorowa, mene musuwele weera mweenre muthanlaka hiiho, nttittimiho khanikhala nawinyu, niwoko Yave onoomwinnyerera Sisera mmatatani mwa muthiyana.” Debora aarowa ni Baraki oKadexi,

¹⁰mwa weiwo owo aawiitthannaawe aNafitali ni aZebuloni. Asilopwana macira macireene muloko yaamutthara Baraki, ni Debora aarowanotho.

¹¹Vanonto, Heberi, muKeni, aamwalamwala ni aKeni akina, ekhapira ya Hobabi, atatawe oowaathelela Moisesi, anakunga eheemaawe vamwirini mutokotoko oZahananimi, waattamela oKedexi.

¹²Sisera eereliwaawe weera Baraki, mwaana mulopwana a Abinowami, aawela vamwaako Tabori,

¹³owo aathukumanyiha ikaarosawe sa iyuuma macira mathannamaxexe ni anakhottwaawe ootheene a oHaroxeti-Hagoyimi mpaka mooloko Kixoni.

¹⁴Debora aamweerela Baraki: “Murowe! Nna nihuku Yave omwinnyerenraawe Sisera mmatatanimwanyu. Yave onrowa muhoolomwanyu!” Hiiho Baraki aakhuruwa mwaako Tabori atthariwaka ni asilopwana macira macireene muloko.

¹⁵Mpuwa moowanani Baraki, Yave aamurukureeriha muru Sisera ni awawe moota wooweera anakhottwaawe ootheene yaakakatthasiwa, ni Sisera aakhuruwa mukaaronimwawe, anatthawa.

¹⁶Baraki aattharelela ikaaro sa ekhotto ni anakhotto mpaka oHaroxeti-Hagoyimi. Anakhotto ootheene a Sisera yaahiiviwa ni ekatana; khaahanleru mutthu.

¹⁷Wa soothesene, Sisera aatthawela muheemani ya Yayeli, mwaara a Heberi, muKeni, niwoko waakhala murettele eriyari ya Yabini, mwene a Hazori, ni nihimo na Heberi, muKeni.

¹⁸Yayeli aamuciceera Sisera, anamweerela: “pwiiyaaka, murwe, mvoloweke muheemanimwaka, muhoove.” Hiiho aavolowa ni Yayeli aamukhuneela ni ekuwo.

¹⁹Sisera aamweerela: “Koovoliwa ntthona, dyoontte mukivahe maahi kiwure.” Yayeli aamuttuula kacikhi a mukaka, anamvaha, anamukhuneela.

²⁰Sisera aamulamulela muthiyana: “Mukhale vamulako wa eheema. Avira mutthu anookohani: ‘Aakhala arimo?’ vano mweereke: ‘Hoye.’”

²¹Vanonto Yayeli mwaara a Heberi, aakuxa ekhomo ya eheema ni enyutto, anamwiitela mpaka omwaattamela Sisera simuttokoneenleene ikhove niwoko na okhulumuwawawe. Aamukhomela mphatamaaru mpaka ophutula wiithela, anakhwa.

²²Baraki avirakawo amwaasaka Sisera, Yayeli aamuciceera. Owo aamweerela Baraki: “Murwe miyo kiwoonihereni mulopwana mummwaasaanyu.” Owo avolowaka muheemani, aamoona Sisera akhwiiyeene ni ekhomo ephutunleene mphatamaaru.

²³Nihuku nenenenne Muluku aangwina Yabini, mwene a aKanaani, ohoolo wa aYixrayeli.

²⁴aYixrayeli yannapwaherera ongwanano Yabini, mwene a aKanaani, mpaka awosa omphwata.