Read Makhuwa-Shirima Ahooleli 5 Bible Online

Ahooleli 5 - Makhuwa-Shirima bible

Ahooleli 5

¹Nihuku nenenenne Debora ni Baraki, mwaana mulopwana a Abinowami, yaahiipasa ecipo ela:

²“Asitokweene a aYixrayeli ehoolelaka ni muloko wiiveleelaka ni otthunawaya, Yave atthapeliwe!

³Mwiiwe nyuwosa mamwene ni nyuwosa alamuli ngwiriyane! “Kinimwiipela Yave, kinimutthapela Yave, Muluku a aYixrayeli, ni icipo.

⁴Ii! Yave Nyuwo mwaakhumaanyu oSeyiri mweettaka okhuma elapo ya wEdomi, etthaya yaatetereya ni erimu yaattonya epula mahutte ettonyaka maahi.

⁵Nyaako saattikinyeya ohoolo wa Yave, Muluku a oSinayi; aani ohoolo wa Muluku a aYixrayeli.

⁶Mmahukuni a Xamegari, mwaana mulopwana a Anati, mweehuhuni ya Yayeli, misewe khasaaviriwa; yaawo yeetta yaavira iphiro sookottoomba.

⁷Khayaawowo anamalima mmittettheni sa aYixrayeli mpaka miyo, Debora, okhumelela, miyo kiri maayi a aYixrayeli.

⁸aYixrayeli ethanlaleene miluku sinyowani, ekhotto yaaphiya vamulako wa esidade ni hata khayooneyaru exikudu* naari nivaka variyari wa aYixrayeli 40 000.

⁹Murimaaka ori ni asitokweene a aYixrayeli; ni oowiixinnyerera munlokoni. Muntthapele Yave!

¹⁰Nyuwosa munaawela abuuru ootteela mukilaathiyeene vasulu wa abuuru, ni nyuwosa muneetta munseweni, muupuwele!

¹¹Mwiiwe okhuwelaxa wa anamamiinela a maahi moowureramo. Awosa aniipa owina wa ekhaikhai wa Yave ni wa asitokweene a aYixrayeli. Vahoolowaya muloko wa Yave waarowa vamulako wa esidade.

¹²‘Mvenye, mvenye, Debora! Mvenye, mvenye ni mwiipe! Mweemele Baraki! Mwaatthuke anamavariwaanyu, mwaana mulopwana a Abinowami!’

¹³Vano yaale yaahanle ni okumi yaarowa wa maneethi; muloko wa Yave waakirweela miyo ntoko anakhotto ooweraxa.

¹⁴Akina yaarweenle wEfrayimi, elapo khalayi yaari ya awAmaleki; Benyamini aari ni muloko wootthanreni nyuwo. Asitokweene yaarweenle oMakiri ni yaawo ankuxa ekopo ya etokweene yaarweenle oZebuloni.

¹⁵Ahooleli a Isakari yaari ni Debora; aani Isakari aari ni Baraki, iixaakuvihaka mpaka oreyareyani. Mweelaponi ya oRubeni waakhala otthokelela otokotoko.

¹⁶Heeni muhanlaanyu owaani ngwiiwaka akukhuli yiitthanaka mihuwosaya? Mweelaponi ya oRubeni waakhala otthokelela otokotoko.

¹⁷aGiliyade yaahala okhopela Yordanu. Heeni aDani ahanlaaya ni makulaaya? Axer aahala mukerekhere ephareiya iitthuuwaka mmuxelonimwaya.

¹⁸aZebuloni yaaleva okumaaya, ntoko yaapankaaya aNafitali mmattumuxani yaawaniwe ekhotto.

¹⁹Mamwene yaahoorwa, enawana. Mamwene a oKanaani yaawana oTahanaki mukerekhere maahi a oMegido, mene khayaakunxeru eparatha* hata soohuhula.

²⁰Okhuma wiirimu ithenyeeri saawana; okhuma mphironimwaya saangwanano Sisera.

²¹Mooloko Kixoni waahaakumburula, aani, mooloko wa khalayi, Kixoni. Weette woolipeene okumaaka!

²²Oruma wa mikhitto sa ikavalu* wannateterexa situphaka khira khira ikavalusaya* soowera. Ndyelo a Yave aaheera:

²³“Woolaphiwa okhale oMerozi ni amakaaya, niwoko khaamukhavihenre Yave, khaamukhavihenre Yave waawanano oolipaxa.”

²⁴Ooreelihiwa akhale Yayeli, mwaariye Heberi, muKeni; ooreelihiwa akhale yoowo variyari wa asithiyana ankhala muheemani.

²⁵Aamvekela maahi ni owo aamvaha mukaka. Aamuruuhela mukaka wootikana mutixelani ya omwene.

²⁶Ntatanawe noothiyana naakuxa ekhomo ni ntatanawe noolopwana naakuxa enyutto ya namuteko. Aamukhomela Sisera; aathorola murwaawe mpaka ophutula mphatamaaru.

²⁷Vanyeettoni sa Yayeli, aahuuwawo, anakhala nwii. Vanyettoni sa Yayeli, aahuuwawo, anakhala nwii. Uuwenlaawewo aahookhwa!

²⁸Amayawe Sisera yannaweha ereene vaxanelani ekhuwelaka wiithela exanela: ‘Ekaarwaawe ya ikavalu* empiseraxani? Ohiniiwanyeela heeni oruma wa ekaarwaawe?’

²⁹Asithiyanaawe anamiruku yannawaakhula, awo epwahereraka wiixeerela:

³⁰‘Weeraka ankhupa ni ankawana soohuhula: mwaamwali mmoha hoye hoye eeli wa khula mulopwana ni soowara sa malepa ntoko soohuhula Sisera; soowara sa malepa ni sooxoriwa, aani sooxoraxoriwa muxiko weera kiware — sootheene iyo ntoko soohuhula.’

³¹Ii! Yave, amwiittanaanyu ootheene ephwatiwe hiiho! Vaheera yaawo anoosivelani ekhaleke ntoko nsuwa naakhumaka ni ikurusaya.” Vahoolowaya elapo yaakhalano murettele wookwana iyaakha miloko mixexe.