Read Makhuwa-Shirima Ahooleli 8 Bible Online

Ahooleli 8 - Makhuwa-Shirima bible

Ahooleli 8

¹Vano awEfrayimi yaamukohasa Gidiyoni: “Nyuwo munipakenleni hiiha? Mwahaaniitthanenle heeni mwaarowaanyu waawanano aMidiyani?” Ni awosa yaamuximwela nnenesene.

²Wa soothesene, owo aawaakhula: “Kheewo kipankaaka yoovirikana ni nyuwosa. Imora sa iwuuva* sa wEfrayimi ti sooreerela opwaha soohepha sootheene sa Abiyezeri.

³Muluku oowinnyerera ahooleli a aMidiyani, Orebi ni Zeebi, mmtatanimwanyu. Yeeyo kiwenraaka opaka khenlikanxereya ni yeeyo mupakansaanyu!” Yiiwakaru maswaawe, yaamaala omuximwelawaya Gidiyoni.

⁴Gidiyoni ni anakhottwaawe macira mararu, ekhulumungweene, yaapwaherera waattharelela, enaphiya muYordanu, enamulapuwa.

⁵Vano oSukota Gidiyoni aaweerela atthu a weiwe: “Kinoovekasani yooca vakhaani wa anakhottwaaka. Asilopwana ala aakhulumuwasa ni miyo nlelo kinimuttharelela Zeba ni Zalemuna, mamwene a aMidiyani.”

⁶Wa soothesene, asitokweene a oSukota yaamweerela: “Nlelo khamumvanre Zeba ni Zalemuna? Nnaavahere heeni yooca anakhottwaanyu?”

⁷Vano Gidiyoni aawaakhula: “Niwoko na yeeyo, Yave aakinnyereraka mmatatanimwaka Zeba ni Zalemuna, kinimwaandakasa irutthusanyu ni nyiiwa ni rupulula a munikareni.

⁸Woovenya vaavaale aarowa oPeniyeli, anaavekela hiihaale, mene awosa yaakhulanse ntoko aSukota.

⁹Aaweerela atthu a oPeniyeli: “Kaahokolowaka oowineene, kinoophwata etoore* ela.”

¹⁰Vano Zeba ni Zalenuma yaari oKarekari vamoha ni anakhotto wookwanaka 15 000 — yaale yaahanle wa anakhotto a miloko sa mpatta ninkhuma nsuwa. Wookwanaka anakhotto 120 000 yaahookhwa.

¹¹Gidiyoni aarowa ephiro ya anamathaamathaama, mpatta ninkhuma nsuwa wa oNoba ni oYogebeha, anaawanano wootutuxereya anakhotto ale.

¹²Zeba ni Zalemuna, mamwene meeli a aMidiyani, yaatthawasa, mene aahaattharelela, anaavara, aawinaka anakhottwaaya ootheene.

¹³Vahoolowaya Gidiyoni, mwaana mulopwana a Yowaxi, aahokolowa okhottoni awelelaka okhatoni wa oHeresi.

¹⁴Aamvara mmiravo mmoha a oSukota, anamukohakoha. Mmiravo ole aamulepela Gidiyoni masina a ahooleli miloko mithannamiili ni athanneeli a oSukota yaari asitokweene a esidade.

¹⁵Vano, Gidiyoni aarowa oSukota, anaweerela asilopwana a weiwe: “Ori va Zeba ni Zalemuna mwa yaala mwaakiveihenraanyu mweeraka: ‘Nlelo khamunaaye omvara Zeba ni Zalemuna? Nnaavahere heeni yooca anakhottwaanyu?’”

¹⁶Owo aahaavarasa ahooleli a esidade ya oSukota, anaattaruxasa ni nyiiwa ni rupulula a munikareni.

¹⁷Aaphwatatho etoore* ya oPeniyeli awiivaka asilopwana a esidadeene yeele.

¹⁸Vahoolowaya aamukoha Zeba ni Zalemuna: “Yaari hai asilopwana nyuwosa ngwiivasiyaanyu oTabori?” Awosa yaamwaakhulasa: “Yaari ntoko nyeenyu, khula mutthu a yaale aalikana mwaana a mwene.”

¹⁹Gidiyoni aawaakhula: “Asilopwana ale yaari axunnaka, ooyariwano xaxaxa ni amaayi amoha. Kinlipela mwa Nsina na Yave: Nyuwosa muurenle okumaaya, miyo nkaawiivasani.

²⁰Vano aaheerela ntthaaranawe, Yeteri: “Owiivase!” Wa soothesene, khaatheteiye ekatana niwoko na woova eenre ayevaka.

²¹Zeba ni Zalemuna yaamweerela Gidiyoni: “Haya, muniive nyeenyuweene, niwoko mulopwana onsuweliwa ni ikurusawe.” Hiiho Gidiyoni aawaattamela, anawiivasa, anakuxa onyooro wa muxiko wa aahaacaaya.

²²aYixrayeli yaamweerela Gidiyoni: “Munilamule — nyuwo, mwaninyu ni musuluwaanyu, niwoko moonitapuxa mmatatani mwa aMidiyani.”

²³Wa soothesene, Gidiyoni aawaakhula: “Miyo nkoolamulasani naari mwanakeene. Ti Yave aneera oolamuleni.

²⁴Kinoovekelasani paahi ha: khula mutthu a nyuwosa akivahe xiveeve a soohuhuliwa.” Vano aYixmayeli yaakhovelela waawara axiveeve a eyuuma yoorikaxa.

²⁵Awosa yaamwaakhula: “Nnimoovahani ni murima wootheene.” Hiiho yaahaatalasa eloona ni khula mutthu aamvonyerawo xiveeve mmoha amukhumihaka moohuhulanimwawe.

²⁶Olemela wa axiveeve a eyuuma yoorikaxa waaphiyera ikiilu* miloko miili sihaalikeleliwaka itthu sooreera soorikaxa sikina iyo hata soowara sookankela yaawaraaya mamwene a oMidiya naari onyooro waari muxiko mwa ahaacaaya.

²⁷Gidiyoni aavarela muteko eyuuma yoorikaxa ele weera ampakele mooxikootti a esaserdoti, aniikaathi esidadaawe wOfera. Vano aYixrayeli ootheene yaararuwasa emulapaka mooxikootti ole. Mooxikootti ole aathatuwa ntapha wa Gidiyoni ni amusaawe.

²⁸Hiiho aMidiyani yaawiniwa ni aYixrayeli ni khayaawenretho olipa. Mookumini wootheene wa Gidiyoni elapo yaakhala ni murettele wa iyaakha miloko mixexe.

²⁹Vano Yeru-Bahali, mwaana mulopwana a Yowaxi, aahokoleela owaani.

³⁰Aarino anamwane asilopwana miloko mithannamiili ootheenaawo ti aayanraawe, eenre aathelaka athiyana ancipale.

³¹Ekuxowaawe yaakhala oXekhemi yaamuyarela mwaana mulopwana, mwa yoowo Gidiyoni aamuttenghaawe Abimeleki.

³²Gidiyoni, mwaana mulopwana a Yowaxi aakhwiiye uuluvalanxeene, anavithiwa onihiyeni na atithawe Yowaxi wOfera wa awAbiyezeri.

³³Akhwaakaru Gidiyoni, aYixrayeli yaapacera waalapatho aBahali*. Yaamukhaliha Bahali-Beriti ntoko mulukwaaya

³⁴emuttiwalaka Yave Mulukwaaya, mwa Yoowo aatapunxe mmatatani mwa amwiittanaaya ootheene a mipatta sootheene.

³⁵Khayaakhalenletho onnene emusi ya Yeru-Bahali, eyo tiiyo Gidiyoni, ettiwalaka mpuha aapakenlaawe aYixrayeli.