Read Makhuwa-Shirima Ethupululo 10 Bible Online

Ethupululo 10 - Makhuwa-Shirima bible

Ethupululo 10

¹Vano kaamoona ndyelo mukina oolipa akhuruwaka wiirimu, areene munihutteni ni muura vamuruwawe. Ekhovaawe yaari ntoko nsuwa, ni nyettosawe saari ntoko amarimbu a mooro.

²Aavarela elivuru ekhaanene yoohuleya mmatatanimwawe. Aahiikaathi mphareiyani nnaawonawe na moono mulopwana ni nnaawonawe nikina vatthayani,

³ni aakhuwela ni nsu ntokotoko naalikana murika wa mwatto. Akhuwelakaru, itari ithannapiili saaruma.

⁴Sirumakaru itari ithannapiili, miyo kaatthuna olepa, mene kaahiiwa nsu nimoha na wiirimu neeraka: “Ngwale seiyo itari ithannapiili sihimalaaya ni muhilepe.”

⁵Vano, ndyelo kaamoonnaaka eemenleene mphareiyani ni vatthayani, aaheemexa ntatanawe na moono mulopwana

⁶ni aamulipela Yoole onkhala wa mahuku oohimala, Yoole opattuxale wiirimu ni sootheene siri mwemmo, elapo ni sootheene siri mwemmo ni ephareiya ni sootheene siri mwemmo, eeraka: “Khoorwa opisatho.

⁷Mahukutho ndyelo anaathanneeli aneeraawe iipe nipalapattanawe nnikwaniheriwe ntikhinelo na Muluku, ntoko Owo aaleenlaawe arumeiyaawe, maprofeeti.”

⁸Vano naakuulumela veeli nsu kiiwalaaka nuulumaka wiirimu, neeraka: “Murowe, mwakuxe elivuru yoohuleya eri mmatatani mwa ndyelo eemenle mphareiyani ni vatthayani.”

⁹Hiiho kaarowa wa ndyelo ni kaamvekela weera akivahe elivuru ekhaanene. Owo aakeerela: “Mukuxeke ni mukhuureke! Eyo eniiwaawihe mmirimanimwanyu, mene eniicoocowe mmwaanomwanyu ntoko oravo.”

¹⁰Kaakuxa elivuru ekhaanene mmatatani mwa ndyelo, kinakhuura. Yaakisiva miyo mmwaanomwaka yoocoocowa, ntoko oravo, mene kikhuurakaru, mmirimwanimwaka waawaawihiwa.

¹¹Vano kaaheereliwa: “Ontthuneya weera nyuwo muthaliheretho mwaha wa miloko, ilapo, muulumo ni mamwene mancipale.”