Read Makhuwa-Shirima Ethupululo 12 Bible Online

Ethupululo 12 - Makhuwa-Shirima bible

Ethupululo 12

¹Ni eneneero etokotoko ni yootikhiniheya yaahooneya wiirimu: muthiyana awanreene nsuwa, ni mweeri vathi wa inaawosawe ni ecireemba ya ithenyeeri muloko ni piili mmurumwawe.

²Owo aarupala ni aakhuwela ni ovoreiya, niwoko aahanle vakhaani oyara.

³Yaahooneya wiirimu eneneero ekina: edrakoni* etokotoko yooxeera yaarino nyuru mithannamiili ni manyaka muloko, ereeneno nyurusaya icireemba ithannapiili.

⁴Mwiilaaya waahiipurulela mpatta wanaararu wa ithenyeeri sa wiirimu. Edrakoni* yaaheemela ohoolo wa muthiyana aahanle vakhaani oyara weera emukhuure mwaana mulopwana ehuhu eeraawe ayariwe.

⁵Owo aamuyanre mwaana mulopwana, mwa yoowo eera alamuleke ilapo sootheene ni ekopo ya eyuuma. Mwanawe aawatuliwa aronghiwaka wa Muluku ni wa ehicaawe.

⁶Muthiyana aatthawela munikareni, wa nipuro aareherereliwaawe ni Muluku weera weiwo acihiwe ni Muluku mahuku 1 260.

⁷Vano, yaakhala ekhotto wiirimu. Mikhayeli ni andyelowaawe yaawana ni edrakoni* ni edrakoni* vamoha ni andyelowaaya yaawanatho.

⁸Khayaawenretho, ni hiiho yaayeleela nipuronaya wiirimu.

⁹Edrakoni* etokotoko yaavonyeriwa vaate, enoweene yeele ya khalayi yiitthaniwa Diyabu*, hoye hoye Satana enlokottha elapo yootheene. Eyo vamoha ni andyelowaaya yaavonyeriwa elapo ya vathi.

¹⁰Kaahiiwa nsu ntokotoko na wiirimu neera: “Vano woophiya ovuluwa, ikuru ni omwene wa Mulukwaahu, ni olamula wa Kristuwaawe, niwoko aavonyeriwa vaate namoothera a axunnihu, mwa yoowo ongwoothera axunnihu ohoolo wa Muluku othana ni ohiyu.

¹¹Awo yaamuwina ni ephome ya Eputtiputthi, ni ni masu a onamoona akhalenlaaya. Awo khayaakhoontte oleva okumaaya asineenaaya.

¹²Tivawo, wiirimu, muhakalale ni yaawotho ankhala mwemmo! Ii! Enoohaawa, elapo ni ephareiya, niwoko Diyabu* ohookhuruwelani nyuwo! Owo oonyoonyiwa vancipale, niwoko oosuwela weera erino ehuhu vakhaani.

¹³Yoonakaru edrakoni* weera yaavonyeriwa vathi, yaapacera omusoonda muthiyana ole aamuyanre mwaana mulopwana.

¹⁴Aavahiwa muthiyana mapupha meeli a xaaka mutokotoko weera owo awere ovava mpaka nipuro aareherereliwaawe munikareni, weiwo eeraawe acihiwe ehuhu, ihuhu ni eriyari ya ehuhu, ottaiwene wa enowa.

¹⁵Vano enowa yaarapheela mmwaanomwaya maahi ntoko mooloko ottuli wa muthiyana weera akumburuliwe ni maahi a mooloko ole.

¹⁶Wa soothesene, etthaya yaamukhavihera muthiyana ole, ehulaka eyanowaaya ni emiraka mooloko yoowo edrakoni* yaarapheiyaaya mmwaanomwaya.

¹⁷Edrakoni* yaamunyoonyeriwa muthiyana ole ni yaavenya weera awane ni yaale a ekhapiraawe, yaawo aniiwelela malamulo a Muluku ni amvarexexa nnenesene onamoona wa Yeesu.

¹⁸Vano edrakoni* yaaheemela mukerekhere ephareiya.