Read Makhuwa-Shirima Ethupululo 13 Bible Online

Ethupululo 13 - Makhuwa-Shirima bible

Ethupululo 13

¹Kaahoona enama ya mmunepani emoha yaakhumale mphareiyani. Yaarino manyaka muloko ni nyuru mithannamiili ni icireemba muloko mmanyakanimwaya, ni khula muru waarino nsina nooveiha.

²Enama ya mmunepani koonnaaka yaalikana ni havara, mene yaarino inaawo ntoko inaawo sa ursu* ni eyano ntoko eyano ya mwatto. Edrakoni* yaavaha enama ele ikurusaya, ehicaaya ni owerawaya otokotoko.

³Muru mmoha wa enama ya mmunepani waavulalihiwa ntoko waari mookhwa, mene nikhwatta na okhwa nne naavolihiwa. Elapo yootheene yaatikhina ni yaatthara enama ya mmunepani.

⁴Yaakokhorela edrakoni* yaavanghaaya ikuru wa enama ele ni yaakokhorelatho enama ele, yeeraka: “Taani onlikana ni enama ya mmunepani? Taani ongwera owanano yeela?”

⁵Enama ele yaavahiwa eyano weera elaleiye masu oowiixoona ni ooveiha, ni ikuru weera elamule nyeeri miloko mixexe ni miili.

⁶Yaahula eyanowaaya weera emuveihe Muluku, ni weera eruwane Nsinanawe ni etabernaakulu* ni yaawo ankhala wiirimu.

⁷Yaavahiwa ikuru weera yaawaneno ekhotto ootteela ni yaawine. Yaavahiwatho ikuru ni ipuumba, miloko, muulumo ni ilapo sootheene.

⁸Atthu ootheene ankhala elapo ya vathi eniilape enama ele, ootheene yaawo masinaaya khaalempwale okhuma ephattuwelo ya elapo mulivuruni ya okumi ya Eputtiputthi yiiviwe.

⁹Yaawo arino maaru, yiiwe!

¹⁰Akhala mutthu onrowa okaliposo, okaliposo anaarowe. Akhala mukina aneera iiviwe ni ekatana, aniiviwe ni ekatana. Va ontthuneya ootteela ovilela moota woororomeleya.

¹¹Vano kaahoona enama ya mmunepani ekina, evenyaka mweelaponi ni manyaka meeli ntoko eputtiputthi, mene yuulumale ntoko edrakoni*.

¹²Yaanyeserera ikuru sootheene sa enama yoopacera mwa nsinanaya, ni yaahaanyeserera atthu ootheene a elapo ya vathi weera elapeke enama yoopacera, mwa yeeyo nikhwattanaya naavolihiwa.

¹³Yaawera opaka ineneero sitokotoko, mpaka yaakuruxa mooro wiirimu mpaka vathi vamaithoni wa atthu.

¹⁴Niwoko na ineneero yaatthuniheriwaaya opaka mwa nsina na enama yoopacera, eyo yaahaalokottha atthu a elapo ya vathi. Yaahaalamulela opaka ecaambulo ya enama yoopacera weera ettittimihe enama ele yaavulalihiwe ni ekatana, nitho yaalamihiwe.

¹⁵Yaavahiwa ikuru weera evahe omumula ecaambulo ya enama yoopacera, moota wooweera eyo ewere wuuluma ni ewiive ootheene yaawo ankhootta olapa ecaambuloweene yeele.

¹⁶Yaahaanyesereratho weera ootheene, asikhaani ni asitokweene, oopuha ni oohaawa, maneethi ni ipottha, yaakhele eneneero emoha muntatani na moono mulopwana, hoye hoye vayuucini

¹⁷weera khaawo eera awere othuma, naari othumiha, ahikhanleno eneneero eri nsina na enama ya mmunepani, hoye hoye nuumuru na nsinanaya.

¹⁸Va sintthuneya miruku. Yoole orino miruku, oonelele nuumuru na enama, niwoko nri nuumuru na mutthu. Nuumurunaya nri 666.