Read Makhuwa-Shirima Ethupululo 14 Bible Online

Ethupululo 14 - Makhuwa-Shirima bible

Ethupululo 14

¹Vano kaaweha, ni ohoolowaka yaaheemela Eputtiputthi vamwaakoni oSiyoni, ni vamoha ni Yeeyo atthu 144 000, vayuuciniwaya yaalempwale nsina na Eputtiputthi ni na Atithaya.

²Kaahiiwa oruma wiirimu ntoko oruma wa maahi mancipale ni etari etokotoko. Oruma kiiwalaaka waari ntoko oruma wa anamakita ewiipaka amakitaaya.

³Awo yaahiipa ecipo enyowani ohoolo wa ehice, ikhalelo ixexe ni asitokweene. Khaawo yaawera oxuttera ecipo ele, ehikhanle atthu 144 000, mwa yaawo yoopoliwe mweelaponi.

⁴Awo ti yaawo ahiivalihale ni asithiyana, niwoko khayaakonanne asithiyana, ni antthara Eputtiputthi weiwo entthunaaya orowa. Yaathummwale variyari wa atthu ni yaavahiwa wa Muluku ni Eputtiputthi ntoko mpatta woopacera wa yaale oororomela.

⁵Hata yoowootha emoha khayaaphwanyiwe mmwaanomwaya — ari oohikhalano nthowa.

⁶Vano kaamoona ndyelo mukina avavaka wiirimu, areeneno masu ooreeraxa oohimala weera aalaleere atthu ankhala elapo ya vathi, wa ilapo, ipuumba, muulumo ni miloko sootheene.

⁷Owo aaheera ni nsu ntokotoko: “Mmoove Muluku ni mumvuwihe, niwoko yoophiya ehuhu ya othorihawawe. Munlape Yoole opanke erimu, etthaya, ephareiya ni anaattuuttu a maahi.”

⁸Ndyelo anaaveeli aamutthara eeraka: “Oomora, oomora Babiloniya mutokweene, owurihale ilapo sootheene eviinyu ya soohaawela sa olavilavaaya!”

⁹Ndyelo anaararu ahaatthara, akhuwelaka ni nsu ntokotoko: “Akhala mukina onlapa enama ya mmunepani ni ecaambulowaaya, ni aakhela eneneerowaaya vayuucini, naari mmatatani,

¹⁰anaawuretho eviinyu ya isara sa Muluku, mwa yeeyo emiiniwe yoohitakanseriwa ekoomixi ya isarasawe. Anaattaruxiwe ni enxofre* emvarela ohoolo wa andyelo ootteela ni Eputtiputthi.

¹¹Mwiixi wa ottaruxiwa wa atthweene yaawo onuutthuwe mahuku ootheene oohimala. Wa ootheene yaawo anlapa enama ya mmunepani ni ecaambulowaaya, ni wa yaale anaakhela eneneero ya nsinanaya, khoowowo wiitthuuwa othana ni ohiyu.

¹²Va ontthuneya weera evilele ootteela aniiwelela malamulo a Muluku, ni animutthara Yeesu moota woororomeleya.

¹³Vano kaahiiwa nsu na wiirimu neeraka: “Mulepe. Ooreelihiwa ti akhwiiye ankhwa mwa Apwiya okhuma vaanaano vaava mpaka ohoolo.” “Aani,” oneera Munepa, “Awo eniyiitthuuwe okhulumuwawaya, niwoko mitekosaya nsaatthare.

¹⁴Kaaweha, ni ohoolowaka naari nihutte nootteela, ni akilaathiyeene munihutteni Mukina oolikana ni Mwaana a mutthu, areeneno vamuruwawe ecireemba ya eyuuma yoorikaxa ni mmatatanimwawe ecikwaakhwa yoowiithaxa.

¹⁵Vano ndyelo mukina aakhuma wa Empa ya Muluku aamukhuwelela ni nsu ntokotoko Yoole aakilaathiye munihutteni, eeraka: “Mukuxe ecikwaakhwaanyu ni muhephe, niwoko ehuhu ya ohepha yoophiya, ni soohepha sa mweelaponi sohiitthwa.

¹⁶Hiiho Yoole aakilaathiye munihutteni aakuxa ecikwaakhwaawe ni aahepha elapo ya vathi.

¹⁷Ndyelo mukina aakhuma wa Empa ya Muluku wiirimu areenenotho ecikwaakhwa yoowiitha.

¹⁸Ni ndyelo mukinatho orino ikuru mmooroni aakhuma valtaarini*, ni aamukhuwelela yoole mukina aarino ecikwaakhwa yoowiitha, eeraka: “Mukuxe ecikwaakhwaanyu yoowiitha ni muthukumanye mikonkha sa iwuuva* sa evideira* sa mweelaponi, niwoko iwuuvasaya sohiitthwa.”

¹⁹Ndyelo aahepha elapo ya vathi ni ecikwaakhwaawe, ni aathukumanya iwuuva*, anavonyera vanipuroni ntokotoko noowaama iwuuva* na isara sa Muluku.

²⁰Iyo saanyikalasiwa vanipuroni nne okerekhere wa esidade, ni yaakhuma ephome vanipuroni nne, wiixerawene wookwana muxiko wa ikavalu*, orakamawaya ikolomeetru* macira mararu.