Read Makhuwa-Shirima Ethupululo 17 Bible Online

Ethupululo 17 - Makhuwa-Shirima bible

Ethupululo 17

¹Mmoha a andyelo yaarino ikoomixi ithannapiili aakaattamela, anakeerela: “Ngweeke, kinoowooniherani othorihiwa wa puuta mutokotoko okilaathiye mmaahini mancipale,

²mwa yoowo mamwene a elapo ya vathi araruwannaayano. Atthu a elapo ya vathi yaahapaliwa ni eviinyu ya oraruwawawe.”

³Vano ndyelo aakikuxa mMunepani akironghaka munikareni. Weiwo kaamoona muthiyana, awenleene enama yooxeera ya mmunepani, esareiyeene masina ooveiha ni yaarino nyuru mitannamiili ni manyaka muloko.

⁴Muthiyana aawanre ikuwo sakanka ni sooxeera, aphwaneliweene eyuuma yoorikaxa, maluku oorikaxa ni oowaaraxa. Aavarela mmatatanimwawe ekoomixi ya eyuuma yoorikaxa, yoosareya sootakhala ni ohitteela wa oraruwawawe.

⁵Vayuuciwawe yaakhala yoolempwa ela: “NTIKHINELO: BABILONIYA MUTOKWEENE, MAAYI A MAPUUTA NI A SOOTAKHALA SA ELAPO.”

⁶Kaahoona weera muthiyana aahapaliwa ephome ya atthu ootteela, ephome ya anamoona a Yeesu. Kimoonakaru, kaatikhinaxa.

⁷Vano ndyelo aakeerela: “Heeni muntikhinaanyu nyuwo? Kinimoothaliherani ntikhinelo na muthiyana ola, ni na enama ya mmunepani erino nyuru mithannamiili ni manyaka muloko owo owenlaawe.

⁸Enama ele moonnaanyu yaari, vanotho kheehiyono, ni ehanle vakhaani okhuruwela ngwiixerani, erooke wooriheyani. Atthu a elapo ya vathi, mwa yaawo masinaaya ahilempwale mulivuruni ya okumi okhuma ephattuwelo ya elapo, eniitikhine yoonaka enama, niwoko eyo yaari, kheehiyono, nitho ehanle orwa.

⁹Va ontthuneya esuwelo ya miruku. Nyuru mithannamiili siri mattumuxa mathannameeli, mwa yaawo muthiyana okilaathenlaawe.

¹⁰Siritho mamwene mathannameeli. Mathanu yaamora, mmoha ookhala ni mukina khanaaye okhumelela, mene aphiya, ontthuneya okhala ehuhu vakhaani.

¹¹Enama ya mmunepani yaari, ni vano kheehiyono, ti mwene anaathannararu. Owo ori a mathannameeli ni anaarowe oriheya.

¹²Manyaka muloko moonnaanyu ari mamwene muloko ahinaaye waakhela olamula, mene eniyaakhele wa ewoora emoha ikuru sa mwene vamoha ni enama ya mmunepani.

¹³Awo arino ohaawela omoharu paahi ni eniivahe ikurusaya ni olamulawaya enama ya mmunepani.

¹⁴Eniiwane ni Eputtiputthi, mene Eputtiputthi eniiwine, niwoko eri Apwiya a asipwiiya ni Mwene a mamwene ni oowiitthaniwaaya, oothanliwaaya ni oororomeleyaaya eniikhale vamoha ni Eyo.”

¹⁵Vano ndyelo aakeerela: “Maahi mancipale moonnaanyu okilaathiyaawe puuta, siri miloko, atthu ancipale, ilapo ni muulumo.

¹⁶Enama ele ni manyaka muloko moonnaanyu eniimuthanye puuta. Iyo nsimuronghe mmilepeni, nsimuhiye oohiwara, nsikhuure erutthwaawe ni nsimuhise ni mooro,

¹⁷niwoko Muluku oohela mmurimanimwaya ohaawela opaka yeeyo ontthunaawe, aakhulelaka ovaha enama ele ikuru iyo sirinaaya weera elamule mpaka ekwaniheriwe masu a Muluku.

¹⁸Muthiyana mmoonnaanyu ti esidade etokweene enaalamula mamwene a elapo ya vathi.”