Read Makhuwa-Shirima Ethupululo 18 Bible Online

Ethupululo 18 - Makhuwa-Shirima bible

Ethupululo 18

¹Vahoolowaya kaamoona ndyelo mukina aakhuruwa wiirimu. Aarino ikuru sitokotoko, ni elapo yaamwaleeliwa ni waarawawe.

²Vano aakhuwela ni nsu noowera, eeraka: “Oomora, oomora Babiloniya mutokweene! Owo oothatuwa nipuro sinkhalaaya minepa soonanara, ntthawelo wa minepa soonanara sootheene, ntthawelo wa ipalame sootheene soohitteela ni soothanyeya,

³niwoko ilapo sootheene soowura eviinyu ya soohaawela sa oraruwawaya. Mamwene a elapo ya vathi aararuwano, ni ananakoso yaareela asineenaaya ni mihakhusawe soowaatta.”

⁴Kaahiiwa nsu nikina wiirimu neeraka: “Muvenye mwa yoowo, mulokwaaka, weera nyuwo muhittheke vamoha ni yoowo, ni weera soohooxa sineera simmorele sihoophwanyeni nyuwo.

⁵Vano, soottheka sa Babiloniya sohaandyeerereya mpaka wiirimu, ni Muluku ohuupuwelela sootakhalasawe.

⁶Munlive ni nikhoobiri nenenenno; munlive veeli wa yeeyo opankaawe, mmwaandyeererele mipatta miili mwa ekoomixaawe mwaneenaawe.

⁷Muringoweene yoowo owo iivuwiheraaweno ni sooreela iivaherenraaweno, vano muvarele muteko muringo owo ophima ottaruxawawe ni soohooxasawe. Mmurimanimwawe owo aamwiivuwiha: ‘Kikilaathiye ntoko pwiyamwene; nkihiyono naamukhweli, ni nkirwa kilalamika.’

⁸Tivawo vanihukuni nimoha paahi soohooxasawe sinoomphiyera: okhwa, olalamika ni etala. Owo anaahisiwe ni mooro, niwoko Apwiya Muluku animuthoriha ti a ikuru sootheene.

⁹Mamwene a elapo ya vathi ararungweno ni apunghe ni mihakhusawe yoona mwiixi wa ohisiwawawe, eniyiinle ni eniilalamike wa yoowo.

¹⁰Oowoopopihiwa niwoko na ottaruxiwawawe, eniikhale ottaiwene ni eniikhuwele yeeraka: “Ii! Ii! Enoohaawa, esidade etokweene, Babiloniya, esidade yoowera! Wa ewoora emoharu woophiya othorihiwawawo!

¹¹Ananakoso a elapo ya vathi eniyiinle ni eniilalamike niwoko na yoowo, eenre ahikhalaka onthumatho soothumihasaya:

¹²soothumiha sa iyuuma soorikaxa, maluku oorikaxa ni maluku oowaaraxa, ekuwo ya eliinyu*, ikuwo sa kanka, saseda* ni sooxeera; moota wootheene wa mwiri woowunkhela; soopakiwa soohiyanahiyana sa maino a etthepo; mwiri woottittimiheyaxa, ebronze*, eyuuma ni maramore*;

¹³soothumiha sa kanela*, sooreerela sooreeraxa, erubani*, makhura oowunkhelaxa, eviinyu, makhura wa sooliveira*, ephepa, etrigu, imombe, ikhondoolo, ikavalu*, ikaaro sa ikavalu*, ni erutthu ni okumi wa atthu.

¹⁴Awo eniyeere: ‘Soopwaha soowiima seiyo waahaawelaawo. Mihakhusawo ni soowaarasawo sootheene soolakaseya. Khasirwa siphwanyiwatho.’

¹⁵Ananakoso a itthusene seiya yaapuhale ni mihakhusawe, eniikhale ottaiwene oowoopopiheya ni ottaruxiwawawe, ni eniyiinle ni eniilalamike,

¹⁶ekhuwelaka: ‘Ii! Ii! Enoohaawa, esidade etokweene, ewanreene ekuwo ya eliinyu*, yakanka ni yooxeera, yaaphwaneliwe ni eyuuma yoorikaxa, maluku oorikaxa ni maluku oowaaraxa!

¹⁷Mwa ewoora emoharu, muhakhu mwincipale ole woohononiwa!’ Anamweettiha a makula ootheene, anamukwaha ootheene a mmakulani, anamiteko a makula ootheene ni ootheene amvara muteko mphareiyani eniikhale ottaiwene.

¹⁸Woowoona mwiixi wa ohisiwawawe, eniikhuwele: ‘Kheetonke okhala esidade ekina yoolikana ni esidade etokotoko ela’!

¹⁹Eniihele ntthupi mmurumwaya, ni eniikhuwele, yiinlaka ni elalamikaka: ‘Ii! Ii! Enoohaawa, esidade etokweene, weiwo ootheene yaarino makula mphareiyani yaapuhaaya ni mihakhusaya! Wa ewoora emoharu eyo yoohononiwa.

²⁰Muhakalale niwoko na yeeyo, wiirimu! Muhakalale, atthu ootteela, arummwa ni maprofeeti! Muluku oothoriha mooteene yoowo ntoko eyo yooreherenraayani.’”

²¹Vano ndyelo oolipaxa mmoha aavenxa nluku ntokotoko naakhala ntoko wunnuwa wa nxilo ntokotoko, anavonyera mphareiyani, aneera: “Ni ikurusene seiya eniivonyeriwe vathi esidade etokweene Babiloniya, weera ehirwe ephwanyiwetho.

²²Khoorwa wiiwiwa mwa weyo oruma wa anamakita ni anacipo, anampetta ni anamwiipa a mapalapatta. Kharwa aphwanyiwa mwa weyo naruso mmoha a yakhalaru eruso. Khoorwa wiiwiwa mwa weyo oruma wa nxilo.

²³Khoorwa waara mwa weyo waara wa onyaari mmoha. Khanirwa niiwiwa mwa weyo nsu na namatthomera, naari namatthomeriwa. Ananakoswaawo yaari asitokweene a elapo ya vathi. Ilapo sootheene saalokotthiwa ni okhwiraawo.

²⁴Mwa yeeyo yoophwanyiwa ephome ya maprofeeti ni ya ootteela ni ya ootheene yiiviwe mweelaponi.”