Read Makhuwa-Shirima Ethupululo 19 Bible Online

Ethupululo 19 - Makhuwa-Shirima bible

Ethupululo 19

¹Vahoolowaya kaahiiwa wiirimu etthu yoolikana ni onyakula wa atthu ancipale, ekhuwelaka: “Haleluya!* Ovuluwa, ovuwa ni ikuru siri sa Mulukwaahu,

²niwoko nthorihelonawe nri na ekhaikhai ni noororomeleya. Owo oomuthoriha puuta mutokweene onanaringhe elapo ya vathi ni oraruwawawe. Aahiinlela ikuhu ephome ya arumeiyaawe.”

³Ni yaakhuwelatho: “Haleluya!* Mwiixi onrwa mwa yoowo onnawela mahuku ootheene oohimala.”

⁴Asitokweene miloko miili naaxexe ni ikhalelo ixexe sa okumi saakokhora ni saamulapa Muluku aakilaathiye vahiceni ni saakhuwela: “Ame*! Haleluya!*”

⁵Vano naarweela vahiceni nsu nimoha, nikhuwelaka: “Munttottopele Mulukwaahu, nyuwo arumeiyaawe ootheene, nyuwo asikhaani ni asitokweene, mummoova!”

⁶Kaahiiwa etthu yoolikana ni onyakula wa atthu ancipale, yoolikana ni oruma wa maahi mancipale ni itari sitokotoko, ekhuwelaka: “Haleluya*, niwoko Apwiya Mulukwaahu a ikuru sootheene anlamula.

⁷Nitteeliwe murima, nihakalale ni nimvuwihe, niwoko yoophiya ehuhu ya othelana wa Eputtiputthi, ni ootthomeriwaaya ohiireherera.

⁸Aavahiwa ekuwo yootteettheya, yoowaara ni yootteela weera aware.” Ekuwo yootteettheya eri miteko sa ekhaikhai sa atthu ootteela.

⁹Ndyelo aakeerela: “Mulepe: Ooreelihiwa ti oowiitthaneliwa efesta ya othelana wa Eputtiputthi.” Aaheeratho: “Ala ti masu a ekhaikhai a Muluku.”

¹⁰Kaamorela inaawosawe weera kimulape, mene owo aakeerela: “Muhipake yeeyo! Kiri murumeiyi ntoko nyuwo, ni ntoko axunninyu anlipihera moota woororomeleya onamoona wa Yeesu. Mmulape Muluku! Vano, okhalela onamoona mwaha wa Yeesu ti othalihera otthuna wa Muluku mmunepani.”

¹¹Kaahoona wiirimu ohuleiyeene ohoolowaka ni ekavalu* yootteela mwa yeeyo Namweettihaaya oniitthaniwa Oororomeleya ni Ekhaikhai. Owo onthoriha ni ongwana ni ekhaikhai.

¹²Maithwaawe ari ntoko malumi a mooro, ni mmurumwawe sookhala icireemba sincipale. Owo ookhalano nsina, mwa nenno khaawo onsuwela, ahikhanle mwaneenaawe.

¹³Aawara mukaandyo omiseriweene ni ephome ni nsinanawe ti Nsu na Muluku.

¹⁴Anakhotto ancipalexa a wiirimu yaamutthara, ewanreene ikuwo sootteettheya, sootteela, ni soohikhala malepa, ni ewenleene ikavalu* sootteela.

¹⁵Mmwaanomwawe enkhuma ekatana yoowiithaxa, mwa yeeyo anaavulaliheno miloko. “Owo anaalamule ni ekopo ya eyuuma.” Owo onnyikala iwuuva* sa eviinyu ya isara sa isikula sa Muluku a ikuru sootheene.

¹⁶Mmukaandyonimwawe ni vatakhwiniwawe noolempwa nsina nna: MWENE A MAMWENE NI APWIYA A ASIPWIIYA.

¹⁷Kaamoona ndyelo eemenleene vansuwani, aakhuwelelaka ni nsu ntokotoko apalame ootheene amvava eriyari erimu: “Ngwe, muthukumane wa efesta etokotoko ya Muluku

¹⁸weera mukhuure enama ya mamwene, asitokweene a anakhotto, alipa a ikuru ni ya ikavalu* ni anamweettihaaya, enama ya ootheene: maneethi ni ipottha, asikhaani ni asitokweene.”

¹⁹Vano kaahoona enama ya mmunepani ni mamwene a elapo ya vathi ni anakhottwaaya, ethukumanneene weera engwanane Yoole aawenle ekavalu* ni anakhottwaawe.

²⁰Enamatho ele yaavariwa, nitho mprofeeti oolokottha aapanke ineneero sootikhiniheya mwa nsinanaya, mwa seiyo owo aalokotthannaawe yaawo yaarino eneneero ya enama ni yaalapa ecaambulowaaya. Ooweeli yaavonyeriwa ereene ni okumi vantthiyani na mooro omvarela ni enxofre*.

²¹Yaawo yaahanle yaahiiviwa ni ekatana yaakhuma mmwaano mwa Yoole aawenle ekavalu*. Ni apalame ootheene yaavona ni enamaaya.