Read Makhuwa-Shirima Ethupululo 20 Bible Online

Ethupululo 20 - Makhuwa-Shirima bible

Ethupululo 20

¹Kaamoona ndyelo akhuruwaka wiirimu, akuxaleene mmatatanimwawe exaavi ya ehime ya moowiixera* ni onyooro mutokotoko.

²Owo aatthuka edrakoni*, enowa ya khalayi eri Diyabu*, Satana, ni aamutthuka iyaakha macira muloko.

³Aamvonyera moowiixera, aawala ni aahiikaathi ewalelo* vasuluwaya, weera hiiho amooceelihe olokottha ilapo mpaka simale iyaakha macira muloko. Vahoolowaya ontthuneya weera owo ataphuliwe wa ehuhu vakhaani.

⁴Kaahoona ihice, mwa seiye yaakilaathenlaaya yaale yaavahiwe ikuru weera ethorihe. Kaahoona okumi wa yaawo yaahitiwe niwoko na onamoona wa Yeesu ni na masu a Muluku. Awo khayaalampe enama, hata ecaambulowaaya ni khayaakhenle eneneerowaaya vayuuci, naari mmatatani. Awo yaavenyerera ni yaalamula vamoha ni Kristu wa iyaakha macira muloko.

⁵Yaale yaahanle a akhwiiye khayaahokoleenle okhala ni okumi mpaka omala iyaakha macira muloko. Wu ti ovenyerera woopacera.

⁶Ooreelihiwa ni ootteela yaawo eniikhale a ovenyerera woopacera. Okhwa wanaaveeli khoonaawera yaawo; awo eniikhale asaserdoti* a Muluku ni a Kristu, ni eniilamule vamoha ni Yoowo wa iyaakha macira muloko.

⁷Saamalaka iyaakha macira muloko, Satana anaataphuliwe otthukiwawawe,

⁸ni anaavenye weera alokotthe ilapo siri mmaloothoni maxexe a elapo, eyo tiiyo Agogi ni Amagogi, weera aathukumanyere ekhotto. Waattawaya ori ntoko muhaava wa mukerekhere ephareiya.

⁹Awo yaaheetteetta mweelaponi yootheene ni yaarukureera ekwarteli ya atthu ootteela, esidade yoosiveleya, mene mooro waakhuruwa wiirimu ni waahaahisa.

¹⁰Diyabu* aalokottha aavonyeriwa vantthiyani na mooro omvarela ni enxofre*, weiwo yaavonyeriwaaya enama ya mmunepani ni mprofeeti oolokottha. Awo eniittaruxiwe othana ni ohiyu mahuku ootheene oohimala.

¹¹Vahoolowaya kaahoona ehice etokoko yootteela, ni Yoole aakilaathiye. Elapo ni erimu yaatthawa vahoolowawe, ni nipuronaya khaniphwanyiwetho.

¹²Kaawoonatho akhwiiye — asitokweene ni asikhaani — yeemenleene ohoolo wa ehice, ni ilivuru saahuleya. Elivuru ekina yaahuleya, elivuru ya okumi. Akhwiiye yaathorihiwa mwaha wa mitekosaya, ntoko saalempwale mulivuruni.

¹³Ephareiya yaahaavaherera akhwiiye yaari mwemmo, ni okhwa ni Hadesi* yaahaavaherera akhwiiye yaari mwemmo, ni khula mutthu aathorihiwa mwaha wa mitekosawe.

¹⁴Okhwa ni Hadesi* saavonyeriwa vantthiyani na mooro. Ntthiya na mooro ti okhwa wanaaveeli.

¹⁵Nsina na mukina nahaaphwanyiwe mulivuruni ya okumi, owo aavonyeriwa vantthiyani na mooro.