Read Makhuwa-Shirima Ethupululo 21 Bible Online

Ethupululo 21 - Makhuwa-Shirima bible

Ethupululo 21

¹Vano kaahoona erimu enyowani, ni elapo enyowani, niwoko erimu ni elapo yoopacera yaavira, ni ephareiya yaahiya okhala.

²Kaahoona esidade yootteela, Yerusaleemu munyowani, yaakhuruwa wiirimu wa Muluku, yoorehereriwa ntoko ootthomeriwa oophwaneliwa wa iyaya.

³Kaahiiwa nsu ntokotoko naarweela vahiceni neeraka: “Vano etabernaakulu* ya Muluku eri ni atthu, ni Owo anaakhale ni yaawo. Awo eniikhale mulokwaawe ni Muluku muneenaawe anaakhale ni yaawo, ni anaakhaletho Mulukwaaya.

⁴Owo anuukutthe mmaithonimwaaya maithori ootheene. Khoorwa okhala okhwa, hata olalamika, hata wiinla, naari ovoreiya, niwoko itthu soopacera soovira.

⁵Yoole aakilaathiye vahiceni aaheera: “Kimpaka sinyowani itthu soothesene!” Nitho: “Mulepe yeeyo, niwoko masu ala ti a ekhaikhai ni oophwanela ororomeliwa.”

⁶Aakeerelatho: “Yoopakiwa. Miyo ti Alfa* ni Omega*, Epacerero ni Emalihero. Wa yoowo anaavoliwe ntthona, nkingwurihe woohiliva maahi a naattuuttu a okumi.

⁷Namawina anaakhele soothesene iya ni Miyo nkikhale Mulukwaawe, ni owo mwanaka.

⁸Anamahovela, oohiroromela, ootakhala, anamwiiva, anamararuwa, akhwiri, atthu oolapa miluku sikina ni anamootha ootheene — nipuronaya nnikhale vantthiyani na mooro omvarela ni enxofre*. Iwo ti okhwa wanaaveeli.”

⁹Mmoha a andyelo athanneeli yaarino ikoomixi ithannapiili soosareya ni soohooxa ithannapiili sookisera aakaattamela, anakeerela: “Ngweeke, kinoowooniherani otthomeriwe, mwaara a Eputtiputthi.”

¹⁰Owo aakikuxa mMunepani, akironghaka omwaako mutokotoko woorakamela osulu ni aakoonihera esidade yootteela, Yerusaleemu yaakhuruwa wiirimu wa Muluku.

¹¹Eyo yaara ni ovuwa wa Muluku, ni waarawaya waari ntoko waara wa nluku noottittimiheyaxa, ntoko nluku na yaspe* ni ekristalo*.

¹²Yaarino exiri etokotoko ni yoorakamelaxa osulu erino milako muloko ni miili, ni andyelo muloko neeli vamulakoni. Mmilakoni yaalempwale masina a ipuumba muloko ni piili sa aYixrayeli.

¹³Saakhala milako miraru mpatta wa ninkhuma nsuwa, milako miraru ottuttuwani wa esidade, milako miraru mpatta wa ohittowaya, ni milako miraru mpatta wa ninkela nsuwa.

¹⁴Exiri ya esidade yaarino mathipelo muloko ni meeli, ni vasuluwaya yaari masina a arummwa muloko neeli a Eputtiputthi.

¹⁵Ndyelo uulumale ni miyo aarino ekopo yoopakeliwa eyuuma yoorikaxa weera aphime esidade, milakosaya ni exiraaya.

¹⁶Esidade yaari ya malootho maxexe, mweerakameloni ni mweekhuveeloni moolikanela. Owo aaphima esidade ni ekopo. Mweerakameloni waari ikilomeetru* 2 200 — mweekhuveeloni ni orakamawaya waalikana ni mweerakameloni.

¹⁷Owo aaphima exiri, ni mwiittaaya waari imeetru* miloko mithannamosa niithanu, ntoko ephimelo ya atthu ndyelo aavarelaawe muteko.

¹⁸Exiri yaapakiwe ni maluku a yaspe*, ni esidade yaapakiwe ni eyuuma yoorikaxa yoowiitthwihaxiwa, yoolikana ni ningaraasi noowiitthwihaxiwa.

¹⁹Mathipelo a exiri ya esidade yaaphwanelihiwa ni moota wa maluku oottittimiheyaxa oohiyanahiyana. Nthipelo noopacera naari yaspe;* nanaaveeli safira;* nanaararu kalsedoniya;* nanaaxexe esmeralda;*

²⁰nanaathanu sardonikisi;* nanaathannamosa yaspe;* nanaathannameeli krisolito;* nanaathannaararu berilo;* nanaathannaxexe topaziyo;* nanaamuloko krisoprazo;* nanaamuloko nimmoha yasinto*, ni nanaamuloko ni meeli ametista*.

²¹Milako muloko ni miili yaakhala maluku oowaaraxa muloko ni meeli, khula mulako waapakeliwe ni nluku noowaaraxa nimoha. Musewe mutokweene wa esidade waapakeliwe ni eyuuma yoorikaxa yoowiitthwihaxiwa, ntoko ningaraasi noowooneela.

²²Nkoonne Empa ya Muluku ekina musidadeni, niwoko Apwiya Muluku a ikuru sootheene ni Eputtiputthi ari empaaya yootteela.

²³Esidade kheenghaawela nsuwa, hata mweeri weera omwaleele, niwoko ovuwa wa Muluku onnamwaleela, ni Eputtiputthi ti onyaaraaya.

²⁴Atthu a ilapo sootheene eniyeette ngwaaranimwaya, ni mamwene a elapo eniiruuhele ovuwawaya esidade ele.

²⁵Maselaaya kheerwa ewaleyatho othana, naari iwe khoorwa okhala ohiyu.

²⁶Ovuwa ni nttittimiho na atthu a ilapo nniruuheliwe esidade ele.

²⁷Mwa yeeyo kheerwa evolowa etthu yoohitteela, hata mukina ompaka etthu yoowuuliha muru, naari yoolokottha, mene paahi yaawo masinaaya alempwale mulivuruni ya okumi ya Eputtiputthi.