Read Makhuwa-Shirima Ethupululo 22 Bible Online

Ethupululo 22 - Makhuwa-Shirima bible

Ethupululo 22

¹Vano ndyelo aakoonihera mooloko wa maahi a okumi, oowaara ntoko ekristalo*, okhumaka vahiceni ya Muluku ni ya Eputtiputthi

²eriyari ya musewe mutokweene wa esidade. Okhopela ni okhopela wa mooloko waakhala mwiri wa okumi, ohephiwaka imaara muloko ni piili sa soowiimasaya, wiimaka khula mweeri wa eyaakha. Makukhu a mwiri mutekwaaya waalamiha atthu a ilapo.

³Khoorwa okhalatho olapha okina. Ehice ya Muluku ni ya Eputtiputthi eniikhale musidadeni, ni arumeiyaawe eniimurumeele.

⁴Awo eniyoone ekhovaawe, ni Nsinanawe nnikhale vayuuciwaya.

⁵Khoorwa okhalatho ohiyu ni khoorwa ohaaweleya waara wa onyaari, naari wa nsuwa, niwoko Apwiya Muluku eniyaamwaleele, ni awo eniilamule mahuku ootheene oohimala.

⁶Ndyelo aakeerela: “Masu ala amphwanela ororomeliwa ni ti a ekhaikhai. Apwiya, Muluku a minepa sa maprofeeti, yaamurumiha ndyelowaaya weera ewoonihere arumeiyaaya itthu sihanle vakhaani okhumelela.”

⁷“Moone, kinrwa vaanaano vaava. Ooreelihiwa ti yaawo anthokorora masu a ethalihero ya otthuna wa Muluku mulivuruni ela.”

⁸Miyo, Yohaane, ti yoole iiwale ni oonne itthusene seiya. Kiiwalaaka ni koonnaaka, kaamorela inaawo sa ndyelo aakoonihenraawe itthu iya weera kimulape.

⁹Mene owo aakeerela: “Muhipake yeeyo! Kiri murumeiyi ntoko nyuwo ni axunninyu, maprofeeti, ni ntoko yaawo anthokorora masu a elivuru ela. Mmulape Muluku!”

¹⁰Vano aakeerela: “Muhiwalele masu a ethalihero ya otthuna wa Muluku ya elivuru ela, niwoko ehuhu yookhuveela.

¹¹Yoowo ompaka yoonanara, atepe opaka yoonanara; yoowo ori mutakhali, atepe okhala mutakhali; yoowo ori a ekhaikhai, atepe okhala a ekhaikhai, ni ootteela atepe okhala ootteelihiwa.”

¹²“Moone kinrwa vaanaano vaava. Ntthuvelonaka nri ni Miyo ni nkimutthuvele khula mutthu mwaha wa yeeyo aapakaawe.

¹³Miyo ti Alfa* ni Omega*, Oopacera ni Ookisera, Epacerero ni Emalihero.

¹⁴Ooreelihiwa ti yaawo ankattha soowarasaya, weera ewere ophiya vamwirini wa okumi, ni weera evolowe musidadeni, eviraka mmilakoni.

¹⁵Omokoni wa esidade ankhala alapwa, akhwiri, anamararuwa, anamwiiva, anamalapa a miluku sikina ni ootheene yaawo ansivela ni ampaka soowootha.

¹⁶Miyo, Yeesu, koomurumiha ndyelowaaka weera oovaheeni onamoona ola wa ikerexa. Miyo ti Mukwankhwaari ni Ekhapira ya Davide, ni Tthanda oowaaraxa.”

¹⁷Munepa ni ootthomeriwa aneera: “Nkarwani!” Ni ootheene yaawo aniiwa yeere: “Nkarwani!” Yoole omvoliwa ntthona, arweeke; ni yoole ontthuna, awureke woohiliva maahi a okumi.

¹⁸Kingwooperera ootheene yaawo aniiwa masu a ethalihero ya otthuna wa Muluku mulivuruni ela: Akhala mukina onaandyeerera etthu wa elivuru ela, Muluku anaamwaandyeerere soohooxa silempwale mulivuruni mu.

¹⁹Akhala mukina omvenxa hata nsu nimoha mwa elivuru ela ya ethalihero ya otthuna wa Muluku, Muluku anaavenxe mpattaawe wa mwiri wa okumi ni wa esidade yootteela, ntoko silempwalaaya mulivuruni mu.

²⁰Yoole onkhalela onamoona mwaha wa itthusene seiya oneera: “Aani, kinrwa vaanaano vaava!” Ame*, nkarwani, Apwiya Yeesu!

²¹Mahala a Apwiya Yeesu ekhale ni ootheene. Ame*.