Read Makhuwa-Shirima Ethupululo 6 Bible Online

Ethupululo 6 - Makhuwa-Shirima bible

Ethupululo 6

¹Kaaweha Eputtiputthi yaahunlaaya ewalelo* yoopacera ya ithannapiili. Vano kaahiiwa ekhalelo ya okumi emoha yeera ni nsu ntoko etari: “Ngweeke!”

²Kaaweha, ni ohoolowaka yaakhala ekavalu* emoha yootteela, ni yoole eettiha aakhalano muupa. Aavahiwa ecireemba ni owo aavenyawo, ntoko namawina oolikana owina.

³Ehulakaru Eputtiputthi ewalelo* yanaaveeli, kaahiiwa ekhalelo ya okumi yanaaveeli yeera: “Ngweeke!”

⁴Vano yaakhuma ekavalu* ekina yooxeera. Yoole eettiha aahaakhela ikuru weera avenxe murettele wa elapo ya vathi, ni awere weera atthu yiivaneke. Aavahiwa ekatana etokotoko.

⁵Ehulakaru Eputtiputthi ewalelo* yanaararu, kaahiiwa ekhalelo ya okumi yanaararu yeera: “Ngweeke!” Kaaweha ni ohoolowaka yaakhala ekavalu* yooriipa. Yoole eettiha aakhalano mmatatani muringo.

⁶Vano kaahiiwa etthu yaalikana ntoko nsu variyari wa ikhalelo sa okumi ixexe, neera: “Muringo mmoha wa etrigu onkhala edinaariyu* emoha ni miringo miraru sa esevada* sinkhala edinaariyu* emoha, ni muhinanarihe makhura, naari eviinyu!”

⁷Ehulakaru Eputtiputthi ewalelo* yanaaxexe, kaahiiwa ekhalelo ya okumi yanaaxexe yeera: “Ngweeke!”

⁸Kaaweha, ni ohoolowaka yaakhala ekavalu* yootteelela. Yoole eettiha iitthaniwa Okhwa, ni Hadesi* aamutthara vakhiviruweene. Yaavahiwa ikuru wa mpatta wanaaxexe wa elapo ya vathi weera awiive ni ekatana, etala, ikwerere ni asinama oowoopiha a ntuphini.

⁹Ehulakaru ewalelo* yanaathanu, kaahoona vathi valtaarini* minepa sa yaale yaakhwiiye niwoko na masu a Muluku, ni na onamoona yaakhalenlaaya.

¹⁰Awo yaakhuwela ni nsu ntokotoko: “Mpaka yaakhani, Namalamula, Ootteela ni Ekhaikhai nnoowehereraahuni weera mwaathorihe atthu amanke elapo ya vathi ni mwiinlele ikuhu ephomaahu?”

¹¹Vano khula mutthu a yaale aahaakhela mukaandyo wootteela, ni yaaheereliwa weera ewehereretho vakhaani, mpaka okwanele waatta wa asikhwaaya ni axunnaya yeera ekhweeke ntoko yaawo.

¹²Kaahoona Eyo yaahunlaaya ewalelo* yanaathannamosa. Waakhumelela otetereya otokotoko. Nsuwa naariipa ntoko makhala oohisiwa; mweeri waaxeera ntoko ephome,

¹³ni ithenyeeri sa wiirimu saamorela vathi ntoko ifiigu sikithi simmoraaya mmwirini waapukunyiwaka ni epheyo etokotoko.

¹⁴Wiirimu waapindiwa ntoko elivuru yookhuniwa, ni nyaako ni icurumba sootheene saasusihiwa mmapuronimwaya.

¹⁵Vano, mamwene a elapo ya vathi, asitokweene, ahooleli a anakhotto, mathadyiri, alipa a ikuru — ootheene, hata ipottha, hata maneethi — yaahiipitha mmakhukuni ni nnyattani sa nnyaakoni.

¹⁶Awo yaakhuwelela nyaako ni nyala: “Munimorele ni munivithe wa ekhove ya Yoole okilaathiye vahiceni ni wa isara sa Eputtiputthi!

¹⁷Vano, noophiya nihukunaya ntokotoko na isara, ni taani anaawere ovilela?”