Read Makhuwa-Shirima Ethupululo 8 Bible Online

Ethupululo 8 - Makhuwa-Shirima bible

Ethupululo 8

¹Eyo ehulakaru ewalelo* yanaathannapiili, waakhala omaala wiirimu wa eriyari ya ewoora emoha.

²Kaawoona andyelo athanneeli yeemenleene ohoolo wa Muluku, ni awo yaavahiwa mapalapatta mathannameeli.

³Ndyelo mukina aahaattamela ni aaheemela valtaarini*. Aakhalano mwaapu wa eyuuma yoorikaxa waarino mwiixi woowunkhela. Wa yoowo aavahiwa mwiixi woowunkhelaxa mwincipale weera aveleele, vamoha ni mavekelo a atthu ootteela ootheene valtaarini* a eyuuma yoorikaxa ari ohoolo wa ehice.

⁴Ni mmatatani mwa ndyelo waawela mwiixi wunkhelaxa vamoha ni mavekelo a atthu ootteela ohoolo wa Muluku.

⁵Ndyelo aakuxa mwaapu ole, aasariha mooro wa altaari*, anavonyera elapo ya vathi, ni vano saakhala itari, oruma, overunya ni otetereya.

⁶Vano, andyelo athanneeli yaarino mapalapatta mathannameeli yaareherera weera yiipe.

⁷Ndyelo oopacera aahiipa nipalapattanawe, ni yaakhala maralala ni mooro wootakanseriwa ni ephome mwa seiyo saavonyeriwa vathi. Waahisiwa mpatta wanaararu wa elapo, mipatta sanaararu sa nyiri ni malaxi makithi ootheene.

⁸Ndyelo anaaveeli aahiipa nipalapattanawe, ni etthu yoolikana ni mwaako mutokotoko ovarelaka yaavonyeriwa mphareiyani. Mpatta wanaararu wa ephareiya waathatuwa ephome,

⁹saahookhwa sanaararu sa soopattuxiwa sa okumi mphareiyani, ni mpatta wanaararu wa makula waaphwatiwa.

¹⁰Ndyelo anaararu aahiipa nipalapattanawe, ni ethenyeeri etokotoko, evarelaka ntoko muthuko, yaamora wiirimu wa mpatta wanaararu wa nyooloko ni wa anaattuuttu.

¹¹Nsina na ethenyeeri ti Absinto. Vano mpatta wanaararu wa maahi waathatuwa woowaawa, ni ancipale yaahookhwa niwoko na maahi yaathatungwe oowaawa.

¹²Ndyelo anaaxexe aahiipa nipalapattanawe, ni mpatta wanaararu wa nsuwa, wa mweeri, ni wa ithenyeeri waamaniwa, moota wooweera mpatta wanaararuwaaya waariipa ni mpatta wanaararu wa othana ni wa ohiyu khawaanre.

¹³Miyo kiwehaka hiihaale, kaamwiiwa xaaka aavamve eriyari ya erimu, eeraka ni nsu ntotokotoko: “Ii! Ii! Ii! Anoohaawa yaawo ankhala elapo ya vathi niwoko na oruma wa mapalapatta a andyelo araru akina ahanle vakhaani wiipiwa!”