Read Makhuwa-Shirima Ethupululo 9 Bible Online

Ethupululo 9 - Makhuwa-Shirima bible

Ethupululo 9

¹Ndyelo anaathanu aahiipa nipalapattanawe, ni kaahoona ethenyeeri yaamorenle vathi ekhumaka wiirimu. Ethenyeeri yaavahiwa exaavi ya ehime yoowiixera*.

²Ehulakaru ehime yoowiixera*, waatthuwa vaavaale mwiixi, ntoko wa niikho ntokotokoxa. Nsuwa ni wiirimu waariipa niwoko na mwiixi waatthuwa wa ehime yoowiixera*.

³Wa mwiixi ole saakhuma misoope saarwiiye mweelaponi, ni saavahiwe ikuru, ntoko ikuru sa awalisi a mweelaponi.

⁴Iyo saalamuliwa weera sihinanarihe hata malaxi a elapo ya vathi, naari nyiri, hoye hoye itthu sikina sa ntuphini, mene paahi atthu yahaakhanleno eneneero ya Muluku vayuuciniwaya.

⁵Khasaavahiwe ikuru soowiiva, mene aani, weera saahasule wa nyeeri mithanu. Vano, ohasuliwa eneeraaya ehasuliwe ori ntoko ohaawa wa mutthu aalummwaka ni walisi.

⁶Wa mahuku awo, atthu eniyaasaase okhwa, mene kheerwa ephwanya; eniihaawele okhwa, mene okhwa oniwaatthawe yaawo.

⁷Misoope saalikana ni ikavalu* soorehereriwa weera siwane ekhotto. Mmurumwaya saakhalano etthu yoolikana ni ecireemba ya eyuuma yoorikaxa, ni ekhovaaya yaalikana ni ekhove ya mutthu.

⁸Mayihaaya yaari ntoko mayihi a asithiyana, ni maino ntoko maino a mwatto.

⁹Saakhalano etthu yoowiixaakihera ekakasa ntoko yoowiixaakihera ekakasa ya eyuuma, ni oruma wa mapuphaaya waari ntoko oruma wa ikavalu* ni ikaaro sa ikavalu* sincipale sitthimakelaka okhottoni.

¹⁰Saakhalano nyiila ni mipuule ntoko sa awalisi, ni nyiilasaya saakhalano ikuru soowaahasula atthu wa nyeeri mithanu.

¹¹Saakhalano mwene ori ndyelo a ehime yoowiixera*, nsinanawe vaHeberi ti Abadoni ni vaGrego orino nsina na Apoliyoni.

¹²Ii! Ohaawa woopacera woovira. Ohaawa miili ohanle okhumelela.

¹³Ndyelo anaathannamosa aahiipa nipalapattanawe, ni kaahiiwa nsu nimoha naakhumelela munnyakani valtaarini* a eyuuma yoorikaxa nri ohoolo wa Muluku.

¹⁴Nno naamweerela ndyelo anaathannamosa aarino nipalapatta: “Waataphule andyelo axexe atthukiwe wa mooloko mutokweene Efratesi.”

¹⁵Andyelo axexe yaarehereriwe wa ehuhu, nihuku, mweeri ni eyaakha ele aataphuliwa weera yiive mpatta wanaararu wa atthu.

¹⁶Waatta wa anakhotto yeettiha ikavalu* waari wincipalexa. Kaahiiwa waatta iwe.

¹⁷Ikavalu* ni anamweettiha kaawoonnaaka kireene mMunepani yaakhalano ekhaleloweene ela: Yowiixaakiheraaya ekakasa yaari yooxeera ntoko mooro ni yooriipela ni yancaano ntoko enxofre*. Nyuru sa ikavalu* saalikana ni nyuru sa amwatto, ni mmwaanomwaya waakhuma mooro, mwiixi ni enxofre*.

¹⁸Mpatta wanaararu wa atthu waahookhwa niwoko na sohooxa seiya tthaaru sa mooro, mwiixi ni enxofre* saakhumme mmwaanomwaya.

¹⁹Ikuru sa ikavalu* saari mmwaanomwaya ni mmiilanimwaya, niwoko miilasaya saari ntoko inowa, ni saakhalano nyuru mwa seiyo saananarihaayano.

²⁰Yaawo yaahanle ehiiviwe ni sohooxa iye, waarookhalaru hiiho, khayaarukunxale murimaaya wa miteko sa matataaya. Awo khayaahiyale olapa minepa soonanara ni miluku sikina sa iyuuma soorikaxa soohiyanahiyana; sa maluku ni sa nyiri; seiyo sahaawera woona, wiiwa, naari weetta.

²¹Khayaarukunxaletho murimaaya wa omwiiva mutthu, wa okhwiraaya, wa olavilavaaya, naari wa soowiiyasaya.