Read Makhuwa-Shirima Ruuti 2 Bible Online

Ruuti 2 - Makhuwa-Shirima bible

Ruuti 2

¹Vano, Nawomi aakhalano mmusi mmoha a nihimo na Elimeleki, nsinanawe Bowazi. Aari mulopwana oopuha ni oottittimiheya.

²mMowabe Ruuti aamweerela Nawomi: “Kinrowa ottottattotta makala a yaale eniikitthunihere.” Nawomi aamwaakhula: “Oroweke, mwanaka.”

³Hiiho aarowa, anapacera ottottattotta makala ottuli wa anamahepha. Yaahereya weera, attottattottaka hiihaale, Ruuti aavolowa mmatta mwa Bowazi aari a nihimo na Elimeleki.

⁴Aavolowaawe mmatta mwa Bowazi, owo aathitanela awaaka oBeteleheemu anawuulumiha anamahepha eeraka: “Yave akhale ni nyuwosa,” ni awosa yaamwaakhula: “Yave ooreeliheni!”

⁵Bowazi aamukoha namaawehaweha anamahepha: “Mwaamwali ole ti awani?”

⁶Owo aamwaakhula: “Ole mMowabe, mwa yoowo orwiiye oMowabe vamoha ni Nawomi.

⁷Owo ookivekela weera attottattotte makala eriyari ya ihupu ottuli wa anamahepha. Owo orwiiye oxeexelo ni onuurura mwemmo mpaka vano eemenle vakhaani paahi weera iitthuuwe vamunttuusini.”

⁸Vanonto Bowazi aamweerela Ruuti: “Okiiwe nnenesene mwanaka. Ohirowe ottottattotta ematta ekina hata ohivenyeru va. Okhaleke ni arumeiyaaka asithiyana.

⁹Waawehexexeke anghephaayamo asilopwana ni waatthareke ottuli vamoha ni asithiyana anrowa ohepha. Kohaalamula amiravo weera ehooxupe. Waavoliwaka ntthona, wawureke maahi mukhalini arikiwe ni asilopwana.”

¹⁰Iiwaka yeeyo ahuurama, aneera: “Kireeriwe moota heeni vamaithoniwanyu mpaka pwiiya okipwattha miyo namarwa?”

¹¹Bowazi aamwaakhula: “Kooleeliwa sootheene seiyo waapakenlaawo apwiyamwaanaawo vahoolo wa okhwa wa aiyawo ni moota waahingyaawo atithawo, amayawo ni elapwaawo weera okhale ni muloko wahaasuwenlaawo.

¹²Yave oolive niwoko na yeeyo opankaawo. Otthuvelaxiwe ni Yave, Muluku a aYixrayeli. Woothanla okosoopiwa ni Yoowo.”

¹³Ruuti aamwaakhula: “Pwiiyaaka kipwaherere waakheliwa nnenesene. Mookihakalaliha ni moomulipiha murima murumeiyaanyu kiroohikhalaru mmoha a arumeiyaanyu asithiyana.”

¹⁴Ehuhu ya oca, Bowazi aamweerela Ruuti: “Oweeke wenno. Okuxe ekapatthi ya epaawu ni oruweye muviinyuni yoonyuunya. Owo akilaathiyeene vamoha ni anamahepha, Bowazi aamvaha etrigu yoowaarikiwa. Aahooca, anavona mpaka ohala.

¹⁵Vano, Ruuti avenyaka weera attottattotte makala, Bowazi aahaalamula arumeiyaawe: “Naari owo attottattottaka variyari wa ihupu, muhimuhiihe.

¹⁶Ohiyanawaya, mwaahephasaka, munghawulele makala makina a ihupu ni mmoroxe weera owo attotte. Muhimuhiihe.”

¹⁷Hiiho Ruuti aattottattotta mmatta mpaka wiila. Vahoolowaya aaheepettha wookwana ikiilu* miloko miili niithanu sa yeeyo uukenlaawe.

¹⁸Owo aarowano omuttettheni ni apwiyamwaanaawe yaahoona yeeyo Ruute aattottattonttaawe. Ruuti aaruuhatho mvithe wa yeeyo aaciiyaawe mpaka ovona, anaavaha.

¹⁹Apwiyamwaanaawe yaamukoha: “Olelo waattottattotta woowi? Muteko owo waavara woowi? Ooreelihiwa akhale mulopwana owo oopwantthe weyo!” Vano Ruuti aahaathalihera apwiyamwaanaawe yoowo aamvaranaawe. Aaheera: “Olelo kivanre muteko mmatta mwa mulopwana oniitthaniwa Bowazi.”

²⁰Nawomi aamweerela Ruuti: “Yave amureelihe! Khanghiya owoonihera murima wooreera akumi ni akhwiiye. Mulopwana owo ti mmusaahu, mmoha a anamakosoopa a emusi*.

²¹Vanonto mMowabe Ruuti aapwaherera: “Owo ookeerelatho: ‘Okhale ni anamahephaaka mpaka ommaleloni wa ohephiwa esevada*.’”

²²Nawomi aamweerela Ruuti: “Mwanaka, fataari weyo waarowano arumeiyaawe asithiyana. Orowa imatta sikina, onoowereya oveihiwa.”

²³Hiiho Ruuti aari ni arumeiyi asithiyana a Bowazi mpaka ommaleloni wa ohephiwa esevada* ni etrigu akhalaka ni apwiyamwaanaawe.