Read Makhuwa-Shirima Ruuti 3 Bible Online

Ruuti 3 - Makhuwa-Shirima bible

Ruuti 3

¹Nihuku nimoha Nawomi, apwiyamwaanaawe Ruuti, yaamweerela: “Mwanaka, kiwaasere etthoko yoowiitthuuwa weera yoohakalalihe.

²Vano Bowazi, pwiiya a arumeiyi asithiyana waaraaweno, ori mmusaahu xaxaxa. Ohiyuweene yoola owo onrowa oveera esevada* vanipuroni nimveeriwa.

³Oraparape, wiixunkhelihe owarele ni orowe vanipuroniwawe nimveeriwa. Vaheera ohirowe wiixoonihere, wiisuwelihaka, mene waweherere mpaka owo amalihaleene oca ni owura.

⁴Owo aarowaka okona, wangwehexexe nnenesene nipuro onrowaawe okona. Vahoolowaya akonneene wamwaattamele ni wamukhunule ninta waametto ni wiixaatalelewo. Owo onimooleela yoopaka.”

⁵Ruuti aamwaakhula: “Kinoopaka sootheene mukileenlaanyu.”

⁶Vano aarowa wa nipuro nimveeriwa*, anapaka sootheene apwiyamwaanaawe yaamuleenlaaya.

⁷Bowazi amalihakaru oca ni owura aahakalala, anarowa wiixaatalela mukerekhere wa suukelingwaaya sooveeriwa. Ruuti aamwaattamela woohooneleliwa, anamukhunula waamettowawe, aniixaatalela.

⁸Ohiyu eriyari, Bowazi aavenyerera mukhoveni, anarukunuwa, anatuthuwa woomoona muthiyana mmoha iixaatalenleene waamettowawe.

⁹Owo aamukoha: “Nyuwo taani?” Ruuti aamwaakhula: “Miyo murumeiyaanyu muthiyana Ruuti. Mukikhuneele ni mukaandyowaanyu mweenre mukhalaka namakosoopa a emusaaka*.”

¹⁰Bowazi aamwaakhula: “Yave ooreelihe, mwanaka. Onnenaawo ola wootepaxa opwaha woopacera, niwoko weyo khoopwantthe otheliwa ni amiravo oopuha hoye hoye oohaawa.

¹¹Vano, mwanaka, ohoove, kinimoopakela sootheene okivekenlaawo. Asilopwana ootheene a esidadaaka aasuwela weera weyo muthiyana a mukhalelo wooreeraxa.

¹²Ettiitthu, miyo namakosoopa emusaawo*, mene ookhala namakosoopa emusaawo mukina xaxaxa ookipwaha miyo.

¹³Oviriheke vaava ohiyu. Nnoone omaalo: Owo atthuna okhala namakosoopaawo*, wooreera — ookosoopeke. Vaheera aahitthuna, kinlipela mwa Nsina na Yave weera miyo nkikhale namakosopa emusaawo*. Okone va mpaka omaalo.”

¹⁴Ruuti aahiixaatalela waamettowawe mpaka oxeexelo, mene aapeherera ovenya nsuwa nihinaaye okhuma weera ahooniwe. Bowazi aahuupuwela: “Ahikhale aneera asuwele weera muthiyana ola aari vanipuroni nimveeriwa*.”

¹⁵Aamweerelatho: “Okiruuhele mukaandyo ongwaraawo ni ovareleleke.” Aapaka hiiho ni Bowazi aahiitthelamo ikiilu* miloko miili niithannapiili sa esevada*, anamureya. Vahoolowaya owo aahokoleela osidade.

¹⁶Ruuti aphiyaka vaate wa apwiyamwaanaawe Nawomi, yaamukoha: “Weentte hai mwanaka?” Ni owo aamuthalihera sootheene Bowazi aampakenlaawe,

¹⁷aandyeereraka: “Ookivaha ikiilu* miloko milii niithannapiili sa esevada* eeraka: ‘ohihokoleele wa apwiyamwaanaawo matataru.’”

¹⁸Nawomi aamweerela: “Opixe murima mwanaka mpaka osuwela eniikhumelele. Woohihovela mulopwana owo khiitthuuwa olelo ahinaaye otthokiha etthweene yeela.”