Read Makhuwa-Shirima Ruuti 4 Bible Online

Ruuti 4 - Makhuwa-Shirima bible

Ruuti 4

¹Eyo eri hiiho, Bowazi aarowa wa mulako wa esidade, anakilaathiwo. Ehuhuweene yeele namakosoopa* emusi ya Nawomi aahimmwa ni Bowazi aavirawo. Bowazi aamweerela: “Nthamwenaaka, orwe okilaathi va.” Hiiho aarowa, anakilaathi.

²Bowazi aahaathukumanyiha ahooleli muloko a esidade, anaweerela: “Mukilaathi va.” Awosa yaakilaathisa.

³Vanonto aamweerela namakosoopa emusi ya Nawomi mukina: “Nawomi, mwa yoowo ohokolongwe oMowabe, onoothumiha mpatta wa ematta yaari ya munnihu Elimeleki.

⁴Kohuupuwela weera fataari woosuweliha mwaha ola vamaithoni wa ahooleli a muloko ni wooleela weera okuxe ematta. Watthuna okuxa, okuxe. Waahitthuna, okileele weera miyo kisuwele, woonaka weera khaawo emphwanenle ohipacenre weyo, vahoolowaya miyo.” Mulopwana ole aamwaakhula: “Paahi, kinookuxa.”

⁵Bowazi aamweerelatho: “Nihuku muneeraanyu mukuxe ematta ya Nawomi ni mMowabe Ruuti, ontthuneya omukuxatho naamukhweli weera murandele nsina na mulipa oorimeela mwa yoohiyeriwaawe.”

⁶Vano mulopwana ole aamwaakhula: “Waari hiiho, nkingwera okuxa niwoko eniikiruuhele ohasuwa. Okuxeke yoowe, niwoko miyo nkingwera.”

⁷Vanonto, yaari ekhovelelo ya ehuhuweene yeele weera mukina aarula ekwakwattaawe amweemexerelaka mukhwaawe ntoko eneneero ya okuxiwa wa ematta. Hiiho maronda yannaakhuleleya oYixrayeli.

⁸Hiiho namakosoopa emusi ya Nawomi mukina aamweerela Bowazi: “Okuxexe yoowe,” aarula ekwakwaatta.

⁹Vanonto, Bowazi aaweerela ahooleli ni atthu ootheene yaari vaavaale: “Olelo nyuwosa ti anamoonaaka weera kinkuxa mmatatani mwa Nawomi ilapo sootheene sa Elimeleki, Kileyoni ni Maheloni.

¹⁰Kimpwahereratho okhalano mMowabe Ruuti, naamukhweli a Maheloni, weera kirandele nsina na mulipa oorimeela mwa yoohiyeriwaawe ni weera nsinanawe nihilakaseye variyari wa emusaawe naari wa elivuru ya masina a esidade. Olelo muri anamoona a yeela.”

¹¹Ahooleli ni ootheene yaari vamulako yaaheera: “Hiyo anamoona. Yave ampake muthiyana owo omvolowa mweemusinimwanyu ntoko aampankaawe Rakheli ni Leya, mwa yaawosa aakhaliha ipuumba sa aYixrayeli. Mukhale oottittimiheya wEfrata ni mukhalane epili oBeteleheemu.

¹²Emusaanyu mwa anamwane Owo aneeraawe oovaheeni, ekhale ntoko ya nikholonaka Perezi, mwaana mulopwana a Tamari aamuyarenlaawe Yuda.”

¹³Bowazi aamuthela Ruuti ni owo aakhala mwaariye. Owo aamukonano ni Yave aangweriha orupala, anamuyara mwaana mulopwana.

¹⁴Asithiyana yaamweerela Nawomi: “Atthapeliwe Yave ohoohingyeni olelo woohikhala namakosoopa a emusi*. Nsinanawe nikhale na epili variyari wa aYixrayeli!

¹⁵Mwaana anoohakalaliheni anoociheeni ngwuuluvalani, niwoko mwaana a mwaara a mwaninyu onoosivelani ni onooreerelani waapwaha anamwane asilopwana athanneeli.”

¹⁶Vano Nawomi aamwaakanda mwaana, anamukosoopaka.

¹⁷Asithiyana oowaattamanano yaaheera: “Nawomi ookhalano mwaana mulopwana!” Yaamutteha Obedi. Owo aari tiithi a Yixai, tiithi a Davide.

¹⁸Vano ekhapira ya Perezi ti ela: Perezi aamuyanre Hezeroni;

¹⁹Hezeroni aamuyanre Rami; Rami aamuyanre Aminadabi;

²⁰Aminadabi aamuyanre Nahexoni; Nahexoni aamuyanre Salemoni;

²¹Salemoni aamuyanre Bowazi; Bowazi aamuyanre Obedi;

²²Obedi aamuyanre Yixai ni Yixai aamuyanre Davide.