Read Makhuwa-Shirima 1 Samuweli 1 Bible Online

1 Samuweli 1 - Makhuwa-Shirima bible

1 Samuweli 1

¹Aakhala mulopwana mmoha a oRamatayimi — muZufi a mmanyaakoni sa wEfrayimi, nsinanawe Elikana, mwaana mulopwana a Yerohami, mwaana mulopwana a Elihu, mwaana mulopwana a Tohu, mwaana mulopwana a Zufi, ngwEfrayimi.

²Aathenle asithiyana eeli — mmoha iitthaniwa Hana ni mukina Penina. Vano Penina aayara vaheera Hana khaayanre.

³Khula eyaakha mulopwana ole annavenya esidadaawe arowaka oXilo weera amulape Yave a ikuru sootheene ampakelaka sooveleela. Vano Hofeni ni Pinehasi, anamwane asilopwana a Eli, yaari asaserdoti* a Yave oXilo.

⁴Khula nihuku yaaraaya emaara ya Elikana opaka yooveleela, annamvaha mwaariye Penina mpatta wa enama nitho wa anamwanaawe asilopwana ni asithiyana ootheene.

⁵Vaheera annamvaha Hana mipatta miili, niwoko aamusivela aarookhalaru mwali eekupa.

⁶Eenre akhalaka mwali eekupa, Penina annamutannya weera amunyoonyihe.

⁷Eyo yanneereya khula eyaakha. Emaara ti emaara Hana aarowaawe wa Empa ya Muluku, Penina annamutannya ni owo anniinla, akhoottaka oca.

⁸Va mwaha ola aiyawe Elikana yannamweerela: “Hana, muniinlelani? Heeni muhincaanyu? Weeraka miyo nkooreerenleni waapwaha anamwane asilopwana muloko?”

⁹Ekwaha emoha awosa emalihaleene oca ni owura oXilo, Hana aaheemela. Vano, Eli, musaserdoti* eera akilaantheene vahiceni vamulako wa Empa ya Muluku.

¹⁰Oothananaxeene Hana aahiinla, anamvekela Yave.

¹¹Owo aaroromeliha eeraka: “Ii! Yave a ikuru sootheene, dyoontte moone othanana wa murumeiyaanyu muthiyana ni mukuupuwelele. Muhikittiwale; mukivahe mwaana mulopwana. Mwakivaha, kinoowinnyererani wa mahuku ootheene a okumaawe ni mayihaawe ni irerusawe khasimetthiwaru.”

¹²Owo amvekelaka hiihaale Yave, Eli aaweha eyaanowaawe.

¹³Hana eera avekelaka mmurimanimwawe ni eyanowaawe yaamwaasa otannyeya wohiiwanyeya nsunawe. Eli uupuwela weera ola oohapaliwa,

¹⁴anamweerela: “Mpaka yaakhani nyuwo mpwahereraka ohapaliwa? Muhiye owura!”

¹⁵Hana aamwaakhula: “Hoye, apwiyaaka, miyo muthiyana oothananaxa. Nkiwunre eviinyu hata yakhalaru yoowura yoohapala; miyo kiniithananela ohoolo wa Yave.

¹⁶Muhuupuwele weera murumeiyaanyu ti muthiyana a ololo. Keera kivekelaka mwaha wa othananaxawaka ni oriipiwawaka.”

¹⁷Eli aamwaakhula: “Murowe mmuretteleni ni Muluku a aYixrayeli oovaheeni yeeyo mumvekenlaanyu.”

¹⁸Hana aamweerela: “Kaakheleliwe nnenesene mahuku ootheene ni nyuwo pwiiyaaka. Vahoolowaya aapwaha, anaca etthu ni ekhovaawe enatikithereya.

¹⁹Oxawaya oxeexelo yaavenya, enalapa vamaithoni wa Muluku, enahokoleela owannyaya oRama. Elikana aamukonano mwaariye Hana ni Yave aamuupuwelela.

²⁰Hiiho, eviraka ehuhu ekina, Hana aarupala, anamuyarela mwaana mulopwana. Aamutteha Samuweli, eeraka: “Miyo kaamvekenle Yave.”

²¹Vano mulopwana owo Elikana aarowaawe vamoha ni emusaawe yootheene weera ampakele Yave sooveleela sa khula eyaakha ni weera akwanihere yoororomelihaawe, Hana khaarongwe.

²²Owo aaweerela aiyawe: “Mwaana ola ahiyaleene waamwa, kineeraaka kimukuxe weera kamoonihere Yave ni ola onookhalawo mahuku ootheene.”

²³Aiyawe Elikana yaamwaakhula: “Mpake yeeyo enooreerelani. Mukhale nno mpaka aneeraawe ahiye waamwa. Yave aakhulele yoororomelihaawe.” Hiiho Hana aahala owaani, amuhuwaka mwanawe mpaka aahiyaawe waamwa.

²⁴Amuhiihaleene waamwa, nlelo areene mukhaanene, aamurongha Empa ya Yave oXilo vamoha ni emombe elopwana yaarino iyaakha tthaaru, efa* ya ephepa ni kacikhi a eviinyu.

²⁵Yiivakaru emombe, yaamuroiha mwaana wa Eli,

²⁶ni Hana aamweerela: “Pwiiyaaka, munnakuupuwela? Vekhaikhai ti yoomi kaari va mpattaanyu kimvekelaka Yave.

²⁷Kaamvekela okivaha mwaana mulopwana ola, ni Yave ookivaha yoovekaaka.

²⁸Tivawo miyo olelo kinimvahaaka Yave. Owo anaakhale a Yave wa mahukwaawe ootheene.” Hiiho owo aamulapawo Yave.