Read Makhuwa-Shirima 1 Samuweli 10 Bible Online

1 Samuweli 10 - Makhuwa-Shirima bible

1 Samuweli 10

¹Vahoolowaya Samuweli aakuxa nipoottoro na makhura, anamiinela mmuru wa Sawuli, anambeca amweerelaka: “Yave ohoottikitthelani ntoko muhooleli a yoohiyeraawe.

²Olelo nyuwo mwaattimulaka, munimwaaphwanya asilopwana eeli vakhiviru wa nihiye na Rakheli, oZeleza, mmwiinanoni wa oBenyamini. Awosa anooweerelani: ‘Abuuru mwa yaawo mungwaasaanyu aaphwanyiwa. Vano atithinyu aahiya waatthukuruwela abuuru anootthukuruwelani nyuwosa. Awo ankohakoha yeeraka: “Nkimphwanye hai mwanaka?”’

³Okhuma vaavaawo munoopwaherera mpaka muneeraanyu mwaphiye vamwirini mutokotoko oTabori. Mmwawoone asilopwana araru erowaka vaNipuroni Nootteela* na Muluku oBeteleheemu ni mmwaaphwanyewo. Mmoha areeneno ipuri tthaaru, mukina ipaawu tthaaru ni ookisera kacikhi a eviinyu.

⁴Awosa anoowuulumihani yoovahasakani ipaawu piili ni nyuwo mwaakheleke.

⁵Vahoolowaya munoorowa oGibeya wa Muluku araayawo anakhotto akina a aFilisti. Mwaattamelaka esidade, munoophwanya mukuttula wa maprofeeti okhuruwaka vanttumuxani owiipaka atthakare, akarakaxa, ampetta ni amakita. Vano awosa anoothalihera otthuna wa Muluku.

⁶Munepa wa Yave onimoorweelani mukuruni ni nyuwo munoothaliheratho otthuna wa Muluku. Munookhala mulopwana munyowani.

⁷Hiiho sineeraaya sikwanihereyeke ineneero iyo, mwapake yeeyo eniyooreereleni, niwoko Muluku ori ni nyuwo.

⁸Muhooleke mpaka oGibeya. Vekhaikhai kinimoowa wa nyuwo weera kapake sooveleela soohisa ni sa murettele. Mwakiwehererewo mahuku mathannameeli mpaka kineeraka kaphiyewo ni vano kinimooleelani yeeyo entthuneya opaka.”

⁹Samuweli arukunuwaka weera amulaxere Sawuli, Muluku aaceendya murima wa Sawuli ni ineneero sootheene iye saakwaniheriwa nihuku nenenenne.

¹⁰Owo aphiyakaru oGibeya, mukuttula mmoha wa maprofeeti waamuciceera; Munepa wa Muluku waamurweela mukuruni ni aapacera othalihera otthuna wa Muluku eriyaraaya.

¹¹Ootheene yaale yaamusuwenle khalayi yoonaka weera eera athaliheraka otthuna wa Muluku vamoha ni maprofeeti, yaakohana: “Emukhumelenle eheeni mwaana mulopwana a Kixi? Weeraka Sawuli mprofeetitho?”

¹²Mulopwana mmoha a nipuro nne aakoha: “Atithawe taani?” Hiiho eriyari ya muloko yaapacera yoohimmwa ela: “Sawuli mprofeetitho?”

¹³Sawuli amalihakaru othalihera otthuna wa Muluku, aarowa vanttumuxani.

¹⁴Vano atatawe Sawuli yaamukoha yoowo ni murumeiyaawe: “Nyuwosa mwaari woowi?” Owo aawaakhula: “Naawaasaasa abuuru, mene noonaka weera khanaaphwanya, naarowa wuuluma ni Samuweli.”

¹⁵Atatawe Sawuli yaamukoha: “Samuweli ooleenleni eheeni?”

¹⁶Sawuli aawaakhula: “Owo oonileela weera abuuru aaphwanyiwa.” Vano, Sawuli khaathalihenre atatawe yeeyo Samuweli aamuleenlaawe mwaha wa ovariwa omwene.

¹⁷Vano Samuweli aahiitthana muloko wa aYixrayeli weera othukumane oMizepa,

¹⁸aneerela: “Yave, Muluku a aYixrayeli oneera ha: ‘Kaahaakhumiha aYixrayeli wExipitu ni kohoovuluxani mwa mukuruni sa awExipitu ni mamwene ootheene yoohooxani.

¹⁹Wa soothesene, nyuwosa moomukhootta Mulukwaanyu, mwa Yoowo ongwoopolani mwa sookacamihasanyu sootheene ni othananawanyu. Moheera: ‘Hoye, munivarele mwene.’ Vano mwiixoonihere vamaithoni wa Yave muttharihaka ipuumbasanyu ni mahimwaanyu.’”

²⁰Samuweli akhuveelihaleene ipuumba sootheene sa aYixrayeli, epuumba ya Benyamini yaathanliwa.

²¹Vahoolowaya aarongha ohoolo epuumba ya Benyamini wa khula nihimo, ni naathanliwa nihimo na Materi. Woomalihera Sawuli, mwaana mulopwana a Kixi aathanliwa. Vanonto, yaamwaasansaaya, khaaphwanyingwe.

²²Vano yaamukohakoha Yave: “Mulopwana owo ohoorwa?” Yave aawaakhula: “Aani, owo iipithihiwe variyari wa mirindi.

²³Yaatthimaka, enamukhumihawo. Eemelakaru variyari wa muloko, oorakamaxa yaamukotela mmakhatani.

²⁴Samuweli aaweerela atthu ootheene: “Mmoone mulopwana oothanliwa ni Yave. Mmulokoni wootheene khaawo omulikananne yoola.” Vanonto muloko waakhuwela: “Mwene akhale ni okumi wa mahuku mancipale!”

²⁵Samuweli aathalihera muloko malamulo a omwene. Aalepa mulivuruni, anahela vamaithoni wa Yave. Vahoolowaya Samuweli aalamulela muloko ohokoleela mmawannyaya.

²⁶Sawulitho aahokoleela owannyawe oGibeya ahooliweene ni anakhotto ooweraxa, mwa yaawo Muluku aatamvaawe mirimasaya.

²⁷Vaheera alavilavi akina yaaheera: “Anaanitapuxe hai mulopwana owo?” Yaamveihera ehimuruuhelaka samahala. Mene Sawuli aamaala.