Read Makhuwa-Shirima 1 Samuweli 13 Bible Online

1 Samuweli 13 - Makhuwa-Shirima bible

1 Samuweli 13

¹Sawuli apaceraka olamula aarino iyaakha miloko miraru, anaalamula aYixrayeli iyaakha miloko mixexe ni piili.

²Owo aahaathanla asilopwana macira miloko miraru a oYixrayeli; owo aahalanne asilopwana macira miloko miili oMikemaxi ni elapo ya nyaako sa oBeteli, ni akinaawo macira muloko yaahanle ni Yonatani oGibeya, elapo ya Benyamini. Asilopwana yaahanlaawotho aahaahokoloxera mmaheemanimwaya.

³Yonatani aawanano mpatta wa anakhotto a aFilisti oGeba ni aFilisti akinaawo yaaleeliwa yeeyo. Vano Sawuli aalamulela wiipiwa nipalapatta mweelaponi yootheene, aneera: “aHeberi esuwele yeeyo!”

⁴aYixrayeli ootheene yaahiiwa ihaali: “Sawuli ohaawanano aFilisti ni vano aYixrayeli aanitathela manyaanya wa aFilisti.” Vanonto, atthu yaahiitthaniwa weera ethukumane ni Sawuli oGiligali.

⁵Afilisiti yaathukumana weera yaawaneno aYixrayeli. Yaarino ikaaro sa ikavaalu macira miloko miraru; anamweettiha ikaarosene seiye macira miloko mithannamosa ni waatta wa anakhotto waari ntoko ehaava ya mphareiya. Awo yaarowa oMikemaxi, mpatta ninkhuma nsuwa wa Beti-Aveni, enakonelawo.

⁶Asilopwana a aYixrayeli yoonaka weera aaxanga, ni weera anakhottwaahu aakacamiheyaxa, yaahiipithasa mmakhukuni ni mmalittini; variyari wa nyala, mmahimeni ni mmattankhini.

⁷Akina a yaale mpaka yaamulapuwa Yordanu erowaka elapo ya oGadi ni oGiliyade. Sawuli aahala oGiligali ni anakhotto ootheene aaraaweno yaahoovaxa.

⁸Owo aaweherera wa mahuku mathannameeli — ehuhu yaalamuleliwaaya ni Samuweli, mene Samuweli khaaphingye oGiligali ni anakhotto a Sawuli yaapacera omwaramwareya.

⁹Vano Sawuli aaweerela: “Mukiruuheleke sooveleela soohisa ni sa murettele.” Ni owo aapaka sooveleela soohisa.

¹⁰Amalihakaru opaka soohisa, Samuweli aaphiya ni Sawuli aarowa omuulumiha.

¹¹Samuweli aamukoha: “Mumpakani?” Sawuli aamwaakhula: “Kohoona weera anakhotto yeera emwaramwareyaka ni weera nyuwo khamwaaphiyale ehuhu yiiwananiwe nitho weera aFilisti yaathukumana oMikemaxi.

¹²Vanonto, kohuupuwela: ‘aFilisti anookiwanano oGiligali ni miyo nlelo kihaasaanse ekhavihero wa Yave.’ Tivawo koonnaaka weera fataari opaka sooveleela soohisa.”

¹³Samuweli aamwaakhula: “Moheetta ololo! Khamwiiwelenle nlamulo Yave Mulukwaanyu oovanghaaweni. Mwiiwelenle, saano akhalihaleene omwenaanyu mwaalamulaka aYixrayeli mahuku ootheene.

¹⁴Vaheera, vano omwenaanyu khoorwa opwaherera. Yave oomuthanla mulopwana oomusiveliha, anamukhaliha muhooleli a mulokwaawe, niwoko nyuwo khamwiiwelenle Nlamulo na Yave.”

¹⁵Vano Samuweli aavenya oGiligali, anarowa oGibeya, elapo ya Benyamini ni Sawuli aawaalikela anakhotto aaraaweno. Yaaphiyera wookwanaka macira mathannamosa.

¹⁶Sawuli aakhala oGibeya, elapo ya Benyamini, vamoha ni Yonatani ni anakhotto yaahanle, vaheera aFilisti yaakonenle oMikemaxi.

¹⁷Mukuttula wa anakhotto waavenya yaakonenlaayawo aFilisti ekawanaka mipatta miraru. Mmoha waarowa wOfera, vakhiviru wa Xuwali,

¹⁸mukina wookela oBeti-Horoni ni wookisera wookela muttetthe wa omwiinanoni ottuttuwani wa nreyareya na oZeboyimi, ohoolo wa nikare.

¹⁹Vanonto ehuhuweene yeele khaariworu namahana a iyuuma mweelaponi yootheene ya aYixrayeli, niwoko aFilisti yaaheera: “Weera aYixrayeli ehihane ikatana ni mavaka!”

²⁰Tivawo waatthuneyaaya aYixrayeli ootheene orowa wa aFilisti weera yanone ixaruwa, ihipa, ipaso ni icikwaakhwasaya.

²¹Ononiwa wa ixaruwa ni ihipa waalamuliwa nikhoobiri nikhaanene nimoha ni ononiwa wa ipaso, poxoro a maino mararu ni ikaruma seettiheriwa imombe waalamuliwa makhoobiri meeli makhaanene.

²²Hiiho, vanihukuni naawaniwa, khaariworu nakhotto a Sawuli aarino ekatana hoye hoye nivaka mmatatani — paahi Sawuli ni mwaniye Yonatani ti yaarino.

²³Vano mpatta wa anakhotto a aFilisti waarowa okhatoni yaari oMikemaxi.