Read Makhuwa-Shirima 1 Samuweli 16 Bible Online

1 Samuweli 16 - Makhuwa-Shirima bible

1 Samuweli 16

¹Yave aamweerela Samuweli: “Mpaka yaakhani muneeraanyu mmwiinlele Sawuli, keenre kimukhootta okhala mwene a aYixrayeli? Musarihe nnyakananyu makhura ni mpwaheke oBeteleheemu. Kinimoorumihani wa Yixai. Koomuthanla mmoha a anamwanaawe asilopwana weera avariwe omwene.”

²Vano Samuweli aamwaakhula: “Kiroweke hai? Sawuli asuwela yeeyo, onookiiva.” Yave aamweerela: “Munkuxe mwaaputtiputthi ni mwamweerele: ‘Kaakenle ompakela Yave yooveleela.’

³Wuuveleelani iwo, mwamulattule Yixai ni Miyo kinimooleelani yoopaka. Mwamuttikitthele yoowo kineeraaka koothoonyereni.”

⁴Samuweli aapaka yeeyo Yave uulummaawe. Aphiyakaru oBeteleheemu, asitokweene a esidade yaamuciceera ethukumelaka ni woova. Awosa yaamukoha: “Munrwa mmuretteleni?”

⁵Samuweli aamwaakhula: “Aani, mmuretteleni. Kirweenle ompakela Yave yooveleela. Mwiitteelihase ni murwe wa miyo wuuveleelani.” Vano aamutteeliha Yixai ni anamwanaawe, anaalattula wuuveleelani.

⁶Awosa ephiyakaru, Samuweli aamoona Eliyabi, anuupuwela: “Vekhaikhai, oottikittheliwa a Yave ti yoola.”

⁷Vano Yave aamweerela Samuweli: “Muhiwehexexe ekhalelowaawe naari orakamawawe, niwoko Miyo koomukhootta. Yave khangweha ekhove ntoko mutthu: Mutthu ongweha ekhove, vaheera Yave ongweha murima.

⁸Vahoolowaya Yixai aamwiitthana Abinadabi, amulamulaka ovira ohoolo wa Samuweli. Vaheera Samuweli aaheera: “Yave khanimuthanlatho yoola.”

⁹Vahoolowaya Yixai aamulamula Xama ovira ohoolo wa Samuweli, mene owo aaheera: “Hata yoola.”

¹⁰Mooteene yoowo Yixai aahaalamula athanneeli a anamwanaawe asilopwana wiixoonihera wa Samuweli, mene owo aamweerela Yixai: “Yave khamuthanlaleru a yaala.”

¹¹Vano aamukoha Yixai: “Anamwane muraanyuno ti yaala paahi?” Yixai aamwaakhula: “Ookhalatho neetthaako, mene owo onciha ikhondoolo.” Samuweli aamweerela: “Aruuhiweke wenno. Hiyo khanica owo ahirwiiye.”

¹²Hiiho Yixai aalamulela wiitthaniwa, anarwa. Owo aari ooyareya, a maitho ooreera ni oophwaneliwa. Vanonto, Yave aamweerela Samuweli: “Ti yoola — mweemele, munttikitthele.”

¹³Vano Samuweli aakuxa nnyaka noosareya makhura, anamuttikitthela vamaithoni wa axunneiye ni okhuma nihuku nenenenne Munepa wa Yave waamurweela Davide mukuruni. Vahoolowaya Samuweli aahokoleela oRama.

¹⁴Munepa wa Yave waamuhiya Sawuli ni munepa woonanara wa Yave wannamuhasula.

¹⁵Arumeiyi a Sawuli yaamweerela: “Moone, munepa woonanara wa Muluku onimoohasulani.

¹⁶Apwiya yaalamuleleke arumeiyaaya omwaasaasa mmoha ongwera omwiipa makita. Hiiho woorweelakani munepa woonanara wa Muluku, mulopwana owo onoowiipelani makita ni nyuwo munookhurunuwa.”

¹⁷Sawuli aaweerela arumeiyaawe: “Mwamphwanye mutthu oomwiipa nnenesene ni munruuhe nno.”

¹⁸Mmoha a arumeiyaawe aamwaakhula: “Koomusuwela mwaana mulopwana mmoha a Yixai a oBeteleheemu ongwera omwiipa makita. Owo ti nakhotto oowera, onnuuluma nnenesene ni oophwaneliwa. Ni Yave ori ni yoowo.”

¹⁹Vano Sawuli aamurumihela Yixai anamitthenga amweerelaka: “Mukirumihele mwaninyu Davide, mwa yoowo onciha ikhondoolo.”

²⁰Hiiho Yixai aamukuxa buuru alemeliweene sooca, nipoottoro noosareya eviinyu ni epuri emoha, anamurumihela Sawuli vamoha ni mwanawe Davide.

²¹Davide aahiixoonihera wa Sawuli, anapacera omurumeela. Sawuli annamusivelaxa ni Davide aathatuwa mmoha a amiravowaawe yaamukuxera kapwitthi.

²²Vano Sawuli aamurumihela Yixai mutthenga ola: “Munghiyeke Davide apwahereraka okirumeela, niwoko koomuhakalalela.”

²³Imaara sootheene munepa woonanara wa Muluku waamurweelaaya Sawuli, Davide aamukuxa makitaawe, anamwiipa. Vano, Sawuli annakakhamuwa, akhurunuwaka ni munepa woonanara wannamuhiya.