Read Makhuwa-Shirima 1 Samuweli 18 Bible Online

1 Samuweli 18 - Makhuwa-Shirima bible

1 Samuweli 18

¹Davide amalihakaru wuuluma ni Sawuli, Yonatani ni Davide yaathatuwa asinthamwene xaxaxa. Yonatani aamusivela Davide ntoko aasivelaawe okumaawe.

²Okhuma nihuku nenenenne Sawuli aalamula weera Davide akhale ni yoowo ahimutthuniheraka ohokoleela wa atithawe.

³Vano Yonatani aahiiwanano opaka onthamwene ni Davide niwoko aamusivela ntoko aasivenlaawe okumaawe.

⁴Owo aarula mukaandyowaawe ni soowarela sa ekhotto aakunxaawe, anamvaha Davide, mpakatho ekatanaawe, muupa ni laamba.

⁵Davide annakwanihera miteko sootheene Sawuli aamulamulelaawe opaka moota wooweera Sawuli aamukhaliha vanipuroni noottittimiheyaxa variyari wa anakhotto. Eyo yaasiveliha muloko nitho asitokweene a anakhotto a Sawuli.

⁶Anakhotto yaahokoleelaaya owaani Davide amwiivaleene muFilisti, asithiyana ootheene a isidade sa oYixrayeli yaamuciceera mwene Sawuli. Yaakhuma yiipaka ni yiinaka ni akarakaxa, icipo soohakalaliha ni makita a ifiiyu tthaaru.

⁷Awosa yiinaka, yaahiipa: “Sawuli oowiiva ancipale ni Davide oowiiva woopwahaxa.”

⁸Sawuli aanyoonyiwa niwoko na ecipo ele ni atoxengyeene aahuupuwela: “Awosa aneera weera Davide oowiiva atthu oopwaha yaale kiwiivalaaka. Owo onghaleela omvara omwene!”

⁹Vano okhuma ehuhuweene yeele Sawuli annamukhalela nrima Davide.

¹⁰Oxaawaya munepa woonanara waarumihiwe ni Muluku waamukhuruwela Sawuli ni ikuru ni aamuttittimuwa mpaanimwawe. Davide eera amwiipaka makita ntoko aakhovelenlaawe. Vano Sawuli avarenleene nivaka,

¹¹aamvonyera eeraka: “Kimphitaanyere Davide vaxirini.” Vaheera Davide aarapela veeli.

¹²Sawuli ammoova Davide, niwoko Yave aari ni Davide, vaheera aamuhiya Sawuli.

¹³Hiiho aamurumiha Davide ottaiwawe, amukhalihaka mutokweene a anakhotto macira muloko, mwa yaawo Davide aaweettanaawe mukhottonimwawe.

¹⁴Sootheene Davide aapakaawe sannamweettela nnenesene, niwoko Yave aari ni yoowo.

¹⁵Sawuli oonaka moota itthu sootheene saamweettelaaya nnene, annamoova Davide.

¹⁶Vaheera atthu ootheene a oYixrayeli ni oYuda yannamusivela, niwoko owo annaweettiha mukhottonimwaya.

¹⁷Sawuli aamweerela Davide: “Ori va mwanaka muthiyana a ntthaara, Merabi. Kinimoovaha weera omuthele, keerelaka weera okirumeeleke paahi ntoko nakhotto oolipa murima ohoolelaka ikhotto sa Yave.” Vanonto, Sawuli mmurimanimwawe uupuwela: “Kihimwiive; aFilisti emwiiveke!”

¹⁸Vano Davide aamweerela Sawuli: “Miyo ni emusaaka khaninttittimiheya oYixrayeli. Tivawo kihiphwanenlaaka okhala mukamwene a mwene.”

¹⁹Vaheera yaaphiyeraaya ehuhu ya Merabi mwaana muthiyana a Sawuli otheliwa ni Davide, Sawuli aamvaha Aderiyeli a oMehola.

²⁰Vanonto Mikali, Mwanawe muthiyana mukina a Sawuli, aamusivela Davide. Sawuli aaleeliwaawe yeeyo, aahakalala,

²¹uupuwelaka: “Miyo kinoomvaha Mikali weera owo akhale ntapha na Davide ni weera aFilisti engwaneno.” Hiiho Sawuli aamweerela Davide: “Vano mookhalano ehuhu yanaaveeli othatuwa mukamwenaaka.”

²²Sawuli aahaalamulela arumeiyaawe: “Muulumeke ni Davide muxiirini ni mwamweerele: ‘Moone, mwene ohoosivelani ni anamalakaawe ootheene annoottittimihani. Vano muthatuwe mukamwenaawe.’”

²³Awosa yaamuphithelela masu ale Davide, mene owo aaheera: “Othatuwa mukamwene a mwene ti etthu etokotokoxa. Miyo ti mulopwana oohaawa ni oohisuwanyeya paahi.”

²⁴Anamalaka a Sawuli emuthaliherakaru yeeyo aahimalaawe Davide,

²⁵Sawuli aawaakhula: “Mwamweerele Davide: Yeeyo mwene ontthunaawe ntoko yoomulivano Mikali ti matusu ncira a aFilisti weera aarulele ikukuttula aFilisti.’” Miruku sa Sawuli saari sooweera Davide iiviweke ni aFilisti.

²⁶Anamalaka emuthaliherakaru Davide itthu iye, owo aahakalalela woothatuwa mukamwene a mwene. Tivawo, ehinaaye omala ehuhu yaavaaneliwe,

²⁷Davide ni asilopwanaawe yaarowa, enawiivasa aFilisti macira meeli. Aaruuha matusu, anamvaha mwene weera athatuwe mukamwenaawe. Vano Sawuli aamutheliha mwanawe muthiyana, Mikali.

²⁸Sawuli asuwelakaru weera Yave aari ni Davide ni weera Mwanawe muthiyana, Mikali annamusivela,

²⁹Sawuli aatepaxatho omoova apwahereraka okhala mwiittanaawe mookuminimwawe wootheene.

³⁰Asitokweene a anakhotto a aFilisiti yannapwaherera orowa waawanano aYixrayeli ni imaara sootheene Davide annaakupha yaawo aapwahaka asitokweene akina ootheene a Sawuli. Hiiho aakhalatho ni epili.