Read Makhuwa-Shirima 1 Samuweli 27 Bible Online

1 Samuweli 27 - Makhuwa-Shirima bible

1 Samuweli 27

¹Vanonto Davide aahuupuwela: “Nookhala nihuku aneeraawe akiive Sawuli. Fataari otthawela elapo ya aFilisti. Hiiho Sawuli anaahiye okaasaasa mweelaponi ya oYixrayeli yootheene, ni miyo kinimoopowa mmatatanimwawe.”

²Tivawo Davide ni asilopwanaawe macira mathannamosa yaarowansaaya mpaka wa mwene Akixi, mwaana mulopwana a Mawoki, oGati.

³Davide ni asilopwanaawe yaahiitekiha oGati yaakheliwaka ni Akixi. Khula mutthu aarino emusaawe ni Davide aarino axaariye ooweeli: Ahinowami oYizereyeli ni Abigayili oKarameli, naamukhweli a Nabali.

⁴Sawuli aleeliwaka weera Davide aatthawela oGati, aahiya omwaasa.

⁵Vano Davide aamweerela Akixi: “Mwakoonihera ni murima wooreera, vano mukivahe nipuro variyari wa isidadesanyu weera kamakewo. khoontthuneya weera murumeiyaanyu akhale ni nyuwo musidadeni ya emwene.”

⁶Nihuku nenenenne Akixi aamvaha oZikalagi, tivawo oZikalagi oraaya wa mamwene a aYuda mpaka olelo.

⁷Davide aakhala mweelaponi ya aFilisti wa eyaakha emoha ni nyeeri mixexe.

⁸Vanonto Davide ni asilopwanaawe yaarowa, enaawanano aGexuri, aGirizi, ni awAmaleki. Okhuma khalayi miloko iye saamaka mweelaponi mpatta wa oXuri ni wExipitu.

⁹Khula emaara Davide aawananaawe muttetthe, aawiiva ootheene, mene aakuxa ikhondoolo, imombe, abuuru, ikamelu* ni ikuwo. Vahoolowaya aahokoleela wa aKixi.

¹⁰Akixi aakohaawe: “Olelo waawana woowi?” Davide annaakhula: “oNegebi, elapo ya oYuda,” hoye hoye “mpatta wa ohitto wa aKeni.”

¹¹Owo khaamuhiyaru ni okumi mulopwana hata muthiyana weera ehironghasiwe oGati, niwoko uupuwela: “Apaale awosa anookihima.” Eyo yaari ti epakelowaawe aakhalaawe mweelaponi ya aFilisti.

¹²Akixi aamuroromela Davide iixuupuwelaka: “Owo ohiinanano mulokwaawe aYixrayeli, tivawo aneeraawe akhale murumeiyaaka wa mahuku ootheene.”