Read Makhuwa-Shirima 1 Samuweli 29 Bible Online

1 Samuweli 29 - Makhuwa-Shirima bible

1 Samuweli 29

¹aFilisti yaahaathukumanyiha anakhottwaaya ootheene wAfeki ni aYixrayeli yaakonenle ephattuwelo ya oYizereyeli.

²Asitokweene a aFilisti yeera yeettaka ni mikuttulasaya sa anakhotto ncira hoye hoye macira muloko, Davide ni asilopwanaawe aatthara ottuliwaya ni Akixi.

³Asitokweene a aFilisti yaakoha: “Ankha aHeberi ala?” Akixi aawaakhula: “Ola Davide, mwa yoowo aari mutokweene a anakhotto a Sawuli, mwene a aYixrayeli. Owo ori ni miyo woopwaha eyaakha okhuma nihuku nenenenne aamuhiyalaawe Sawuli ni kheewo opankaawe yookwana omuhovela.”

⁴Wa soothesene, asitokweene a aFilisti yaamunyoonyeriwa, enamweerela: “Munghokoloxere nipuro nne mumvanghaanyu. Ahivolowe okhottoni vamoha ni hiyo, niwoko yaapaceraka ekhotto, onooniwanano. Owiiva asilopwanaahu onuukhale moota wooreeraxa wa yoowo weera areereliwe ni apwiyaawe.

⁵Ti ola mwa yoowo aYixrayeli yaamwiipelaaya yiinaka: “Sawuli aawiiva ancipale, vaheera Davide oopwahaxa.”

⁶Vano Akixi aamwiitthana Davide, anamweerela: “Kinlipela mwa Nsina na Yave weera weyo woororomeleya ni kaatthuna weera weyo okirumeele okhottoni. Okhuma nihuku weyo waarwiiyaawo wa miyo mpaka olelo nkinoohovele, mene asitokweene khaangwoona nnene.

⁷Ohokolowe ni orowe mmuretteleni. Ohipake etthu ehinaasiveliha asitokweene a aFilisti.”

⁸Davide aamukoha: “Kipanke eheeni? Okhuma nihuku kirwiiyaaka mpaka olelo murumeiyaanyu mmoonelenle eheeni? Kintthuna waawanano amwiittana a apwiyaaka mwene.”

⁹Akixi aamwaakhula: “Koosuwela weera weyo woopaka enkisivela, ntoko ndyelo a Muluku. Wa soothesene, asitokweene a aFilisti yaaheera: ‘Owo ahinihoole okhottoni.’

¹⁰Vano opeherere ovenya vamoha ni arumeiyi a apwiiyaawo waarwaannaawo, ni opwaheke oxeexelo nsuwa nikhumaleene.”

¹¹Vanonto Davide ni asilopwanaawe yaapehererasa ovenya weera ehokoleele elapo ya aFilisti, vaheera aFIlisti yaarowa oYizereyeli.