Read Makhuwa-Shirima 1 Samuweli 3 Bible Online

1 Samuweli 3 - Makhuwa-Shirima bible

1 Samuweli 3

¹Mmiravo Samuweli annarumeela vamaithoni wa Yave alamuleliwaka ni Eli. Mahuku ale waakhala woothowathowa waakhela mutthu mutthenga wa Yave, ni nyoonelotho sannahaleela.

²Ohiyu omoha, maitho a Eli ekotakonteene ahoonaka nnenesene, owo aahiixaatalela aakonaawewo.

³Onyaari wa Muluku nlelo weera ohicimphe, ni Samuweli aari yiixaatalelelo Mpaani mwa Muluku, yaaraayamo Arka* a Muluku.

⁴Vano Yave aamwiitthana mmiravo. Samuweli aamwaakhula: “Kiri va.”

⁵Owo aatthimakela wa Eli, anamweerela: “Kiri va — pwiiya mookiitthana?” Vaheera Eli aamwaakhula: “Nkiwiitthanne. Ohokoloweke, wakoneke.” Hiiho aarowa, anakona.

⁶Yave aamwiitthanatho: “Samuweli.” Owo aavenya, anarowa wa Eli eeraka: “Kiri va — pwiiya mookiitthana?” Eli aamwaakhula: “Nkiwiitthanne mwanaka. Ohokoloweke, wakoneke.”

⁷Vano Samuweli nlelo khaamusuwenle Yave. Eera ahinaaye wooniheriwa masu a Yave.

⁸Yave aamwiitthana Samuweli emaara yanaararu. Samuweli aavenya, anarowa wa Eli eeraka: “Kiri va — pwiiya mookiitthana?” Vano Eli aahoona weera ti Yave aamwiitthana mmiravo ole,

⁹anamweerela: “Oroweke, wakoneke. Owo awiitthanatho, weere: ‘Muluume, Yave, niwoko murumeiyaanyu onimwiiwa.’” Samuweli aarowa okona.

¹⁰Vanonto Yave aamwiitthanatho ntoko imaara soopacera: “Samuweli, Samuweli!” Owo aamwaakhula: “Muluume, Yave, niwoko murumeiyaanyu onimwiiwa.”

¹¹Yave aamweerela Samuweli: “Moone, Miyo kihanle vakhaani opaka etthu mmulokoni mwa aYixrayeli yoottiiha iphumu yaathalihiwaka.

¹²Ehuhuweene yeeyo kinookwanihera mweemusini ya Eli sootheene kaahimmaaka — okhuma ompacereroni mpaka ommaleloni.

¹³Kaamuleela weera kinoothoriha emusaawe wa mahuku ootheene niwoko na soottheka sa anamwanaawe mwa seiye owo aasuwenlaawe. Eli aasuwela weera anamwanaawe yannatannya isarasaka vaheera owo khaattaruxa.

¹⁴Tivawo kilipelenlaaka emusi ya Eli: ‘Khanileveleliwaru nthowa na emusi ya Eli mwa sooveleela hoye hoye soovaha.’”

¹⁵Samuweli aakona mpaka oxa, anahula milako sa Empa ya Yave. Aahoova omuleela Eli moonelo ole.

¹⁶Vanonto, Eli aamwiitthana, amweerelaka: “Mwanaka, Samuweli!” Samuweli aamwaakhula: “Kiri va.”

¹⁷Eli aamukoha: “Yave ooleenle eheeni? Ohikikhuwe. Muluku oothorihe vancipale wakikhuwa yakhalaru etthu ooleenlaawe.”

¹⁸Vano Samuweli aamuthalihera soothesene ahimukhuwaka etthu. Vahoolowaya Eli aaheera: “Owo ti Yave — apakeke yeeyo enimureerela.”

¹⁹Samuweli unnuwaka hiihaale Yave aari ni yoowo akwaniheraka maswaawe ootheene.

²⁰aYixrayeli ootheene okhuma oDani mpaka oBerxeba yaahoona weera Samuweli aahaakhuleliwa ntoko mprofeeti a ekhaikhai a Yave.

²¹Yave aapwaherera iixooniheraka oXilo, mwa weiwo aamukhumelenlaawe Samuweli mmasunimwawe.