Read Makhuwa-Shirima 1 Samuweli 6 Bible Online

1 Samuweli 6 - Makhuwa-Shirima bible

1 Samuweli 6

¹Saakwanelaaya nyeeri mithannamiili Arka* a Muluku ereene mweelaponi ya aFilisti,

²aFilisti yaawiitthana asaserdoti* ni anahako, enaakoha: “Niweeriheke hai Arka* a Yave? Munileele moota nneeraahu naahokoloxere onipuroniwaya.”

³Awosa yaawaakhula: “Nyuwosa mwaahokoloxaka Arka* a Muluku a aYixrayeli, muhaarumihe woohikhala etthu, mene murumiheketho yoovaha yooleveleelela nthona. Vano munoolamihiwa ni munoosuwela etthu oohooxenraaweni Muluku.”

⁴aFilisti yaahaakoha: “Yoovaha heeni yoolivela yoottheka nneeraahu naarumihele?” Awosa yaawaakhula: “Murumihe moota mithanu sa anantthweenye a eyuuma yoorikaxa ni makhule mathanu a eyuumeene yeeyo muttharihaka waatta wa asitokweene a aFilisti ni mahooxoweene yaawo yoophwanyanseni nyuwosa ni asitokweenaanyu.

⁵Mpatthe icaambulo sa anantthweenye ni makhule, mwa yaawo amwareenle mulaponi ni munttittimihe Muluku a aYixrayeli. Apaale Owo anaakurunuxe woohooxani nyuwo, milukusanyu ni elapwaanyu.

⁶Munuumela heeni mirimasanyu ntoko awExipitu ni Farawu*? Muluku aattarunxeene wootepaxa, yaahingyaaya aYixrayeli epwahaka.

⁷Vano, mureherere ekaaro enyowani entthukeleliwa imombe piili sooyara vaanaanoru mwa seiyo sihitonke ovarihiwa muteko. Mwatthukelelemo ekaaro, mene mwaavenxewo axaana mwaavoleihaka munikhoolani.

⁸Hiiho mwaawelihe Arka* a Yave mukaaroni, muhelaka itthu icaambulo sa eyuuma yoorikaxa mukerekhere ekaaxa ntoko yoovaha yoolivela soottheka. Vano murumihe ekaaro,

⁹ni ngwehexexeke. Eyo yarowa mulaponimwaya, eyo tiiyo oBeti-Xemexi, vano ti Yave oniruuhenle nihooxo ntokotoko nna. Vaheera, eyo yaahirowa, nnoosuwela weera khanihiyono ntata na Yave ninihooxiye, ni weera itthusene seiye saanimorenle ni erisa.”

¹⁰Vanonto yaapaka yeeyo. Yaavara imombe ithiyana piili sa axaana, enatthukelela vakaaroni, enaawalela axaanaaya munikhoolani.

¹¹Yaahaaweliha Arka* a Yave mukaaroni vamoha ni ekaaxa ya makhule a eyuuma yoorikaxa ni icaambulo sa anantthweenye.

¹²Imombe iye saarowa oBeti-Xemi siveelaka musewe ni sikhuwelaka ehuhu yootheene. Iye khasaahapuwela otthu. Asitokweene a aFilisti yaatthara mpaka omwiinanoni wa oBeti-Xemexi.

¹³Amaki a oBeti-Xemexi yeera ehephaka etrigu vanreyareyani ewoonakaru Arka*, yaahakalalaxa.

¹⁴Ekaaro yaaphiya mmatta mwa Yoxuwa a oBeti-Xemexi ni iwe yaaheemela mukerekhere mwala mutokotoko. Atthu yaathikila itthaabwa sa ekaaro eniiva imombe ntoko sooveleela soohisa wa Yave.

¹⁵aLeevi yaahaakuruxa Arka* a Yave vamoha ni ekaaxa yaarino icaambulo sa eyuuma yoorikaxa, eniikaathi vamwala mutokweene. Nihuku nenenenne amaki a oBeti-Xemexi yaampakela Yave sooveleela soohisa ni soohihisa.

¹⁶Asitokweene athanu a aFilisti yaahoona sootheene seiye, enahokoleela wEkeroni nihuku nenenenne.

¹⁷aFilisti yaamurumihenle Yave ntoko yooveleela mwa nthowa anantthweenye ale a eyuuma yoorikaxa: Mmoha mmoha wAxidoti, oGaza, wAxekeloni, oGati ni wEkeroni.

¹⁸Waatta wa makhule a eyuuma yoorikaxa waattharihiwa waatta wa isidade sa aFilisti, saari sa asitokweene athanu — okhuma isidade soolipihiwa mpaka mittetthe sa mmamattani. Vamwala mutokweene vaavaawo yaawiikaathiyaayawo Arka* a Yave mpaka olelo ti namoona mmatta mwa Yoxuwa a oBeti-Xemexi.

¹⁹Vanonto, Yave aawiiva akina a amaki a oBeti-Xemexi. Asilopwana miloko mithannamiili yaahookhwa niwoko na othurumela mwa Arkani* a Yave. Muloko waalalamika niwoko na omala wa atthu Yave aapankaawe.

²⁰Asilopwana a oBeti-Xemexi yaakoha: “Taani anaawere opwaherera okhala vamaithoni wa Yave, Muluku ootteela ola? Nnimurumihele taani Arka* ala weera ekhale ottaiwahu?”

²¹Vano yaahaarumihela anamitthenga oKiriyati-Yeharimi yeeraka: “aFilisti ahaahokoloxa Arka* a Yave. Ngweeke ni mwaakuxe.”