Read Ibibiliya mu Shimakonde Imbodi Yaambi na dimbande dya Imbodi Yakala Mateu 10 Bible Online

Mateu 10 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 10

¹Napanelo Yesu akavashema vakwoda vake kumi na mbili kuvapa madalaka kwamajini mashapu, akuvakumulanga, akuponia vilwele na mauvilo uti.

²Mena avamyombe avo kumi na mbili ni ala: ntandi, Simoni wavanshema Patulu pamo na nung'une walina Andaleya, kwatika Tiyagu mwanagwe Shebedeu pamo na nung'une walina Nshuwau,

³kwida Pilipo namu Balutolomeu, naida Tome namu Mateu aijá nkúkatisha-ukodi, naatika Tiyagu mwanagwe Alupeu namu Tadeu,

⁴kwida Simoni wa ku Kanaa, namalilila Yudashi Shikaliyote aijá e annimídye Yesu.

⁵Napanelo Yesu andívatuma avalá kumi na mbili avalaililila doni, “Kwavamidi, hamunauke na ata minjini vyavashamaliya, hamunainjile

⁶ila vaukile vanaishilaeli, vo vangandolo vajaikénge vo.

⁷Mwamulota kupita mo, valanganga ntenga au, ‘Utawala wakuwa undivandika.’

⁸Valwele vaponie, vakupela vadyuwe, vamalemba vatadye vatakate na majini kumulanga. Mwenu mupatilé monyo, namwenu momo jaula monyo.

⁹Mmikaka myenu mo hamunanyukate njuluku woe kwali padyoko.[26]

¹⁰Hamunanyukate ikoba, dikanju mbili, vilatu na ata ipimbo. Mmádengo inimmaikila apate shakulya shake.

¹¹“Panjini woewoe kwali palikaja lyoelyoe lyamulota kwinjila, nnambele munu ávaikidile mutwale mwikale paing'ande pake mpaka muliduva lyamulota kutumuka.

¹²Pamuwika paing'ande po, vaudyange vene ing'ande.

¹³Ikava kenga vanu vaing'ande ayo vandivaikila, amani yenu ipagwe na vanavo. Ikanava davo, amani yo imuujile mmene.

¹⁴Napanelo munu woewoe ákalota kumpwashalela kwali kumwigwilila malove enu, pamuma paing'ande po kwali panjini po, pumunanga litutunga mmadodo mwenu.

¹⁵Ninkumwaulila mwiu doni, muliduva lyaukumu shilambo sha ku Shodoma na sha ku Gomola vindadyanga kuliko likaja alyo.

¹⁶“Mwenu, nangu ninkuntumidya kenga mmangandolo shing'ati mavinji. Napavedoni ava mmajanja kenga dinyoka na múkavele makukulu kenga ding'unda.

¹⁷Lilaledye kwavanu. Vanavo vanantwala mwenu kumuukanavo mudikamati na muvitala vyave vyakulipudidya, vananshapa viboko.

¹⁸Vandamuukanavo kwavanang'olo vamajimbo na kwavaumu kwamwaa wangu nangu pakulota muve mmashuda vangu kwavanavo na kwavamidi.

¹⁹Napane vakankamudya kwavanavo, hamunajugulange mukumbukila mwakutangalela kwali shakutangola. Shakutangola sho, mundapata muwakati wowo

²⁰mwaa hamunava shinu mwenu múlota kutangola ila ni Imumu watatagwenu átangola mmitima myenu.

²¹“Nung'unumunu anannimya nung'unumunu pakulota vampedye. Tatamunu anannimya mwanamunu. Vana vandavatenda ing'ondo vatatamunu na kuvabyaa.

²²Vanu uti vanammangedya kwamwaa wangu nangu napane aijá álota kulipililila mpaka kumwisho andaambwalegwa.

²³Panjini umo vakampapata tukutila njini unji. Ninkumwaulila mwiu doni, hamumalila shinu minjini uti vya ku Ishilaeli Mwana Wamunu ákanava kwida.

²⁴“Nkwóda hanalangalela kumpunda mwalimu wake na ntumika hanalangalela kumpunda nang'olo wake.

²⁵Nkwóda akava kenga mwalimu wake panditosha na ntumika akava kenga nang'olo wake panditosha. Napanelo ikava kenga tatamunu wapaing'ande vaninshema kuva Beelishebuli, kushi avalá valikola vapaing'ande pake i nimpomo?

²⁶“Napavedoni vanavo hamunavajope. Hashipali shinu shilipiídye shíkaundukuka na hashipali shinu shashipii shíkaumilila kulangele.

²⁷Vyandimwaulila kushii tangalela kulangele na vyamwigwa kumatu valangangila panantutuvilo.

²⁸Hamunavajope avalá vabyáa mili vákaulula kubyaa ungumi ila njope jo áulula kubamola uti mili ungumi kushena.

²⁹Da hamunashumidya vyuni vivili kwaidoshi imo? Kanji vovo vo hapali ata jumo álota kugwa pai bila mwene Tatagwenu kuungila nkono.

³⁰Ata wo ugwimbu wammyuti vyenu Nnungu andimanya ishabu yake.

³¹Napavedoni hamunajope mwaa mwenu ni múvenavo mana namene kuliko vyuni vité kwinjipa.

³²“Napanelo kula munu álota kunguvalanganga nangu pamevo pavanu, nanangu nammalanganga pamevo pake Atata ávele kuwa.

³³Napane aijá álota kungukana pamevo pavanu nanangu nankana pamevo pake Atata ávele kuwa.

³⁴“Hamunakumbukile kenga nangu ngwidinavo amani mushilambo amu. Hangwidinavo amani, ngwidinavo ing'ondo.

³⁵Nangu ngwidilé ndatadya, “ ‘Mwana nnume ammangedye tatamunu, mwana nkongwe ammangedye jujumunu, nannombwa ammangedye navyalamunu.

³⁶Vammongo vamunu vandava vo valikola vake jo mwene.’[27]

³⁷“Aijá ánnagwaledya namene tatake kwali anyoke kuliko mwangunagwaladyedya nangu, ajo kwangu nangu havaikidile. Namomo aijá ánnagwaledya namene mwanagwe nnume kwali nkongwe kuliko mwangunagwaladyedya nangu, ajo momo kwangu nangu, havaikidile.

³⁸Munu ákalitika nshalaba wake kungwoda nangu, kwangu nangu havaikidile.

³⁹Aijá ánamatila shingumi shake andakatoka na aijá ákatoka shingumi shake kwamwaa wangu nangu andanamatila.

⁴⁰“Ámpwashalela mwenu, angupwashalela nangu na ángupwashalela nangu, ampwashalela aijá ángutumididye.

⁴¹Aijá ámpwashalela nkúlava kwamwaa wakuva nkúlava andapata inudyo kenga nkúlava. Namomo ámpwashalela munu waishaliya kwamwaa wakuva waishaliya andapata inudyo kenga waishaliya.

⁴²Ninkumwaulila mwiu doni, munu álota kumupa luwene vela alu lwamedi akukumbila ndyoko jumo pakati pavadyoko ava kwamwaa wakuva nkwóda wangu nangu, ajo mwiko hakatoka inudyo yake.”