Read Ibibiliya mu Shimakonde Imbodi Yaambi na dimbande dya Imbodi Yakala Mateu 11 Bible Online

Mateu 11 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 11

¹Napanelo Yesu pamalidile kuvapa malailililo vakwoda vake kumi na mbili avalá, andyúma kuka ndapundisha na ndavalanganga ntenga mumakaja aisemu ayo.

²Nshuwau jo àvele nkalaboshi, paigwite uti vinu vyashitenda Klistu andívatuma vakwoda vake

³vakamudye doni, “Da wako ni aijá úshilota kwida kwali tunnindile junji?”

⁴Yesu kushidoni, “Wena mukamwaulile Nshuwau jo vyamwigwa na vyamwona avi.

⁵Vakuputala mevo vankupata kulola, vakudidimanga madodo vankuwena, vamalemba vankuvatadya kutakata, vákaigwa vankwigwa, vakupela vankuvadyuwa na vamashikini vankuvalangangiligwa ntenga wambone.

⁶Andijaligwa aijá ákangunyatila nangu.”

⁷Napanelo vakwoda vake Nshuwau akuno vauma, Yesu andítunduvanga kumanyiya imbumba yavanu ing'ano imwe Nshuwau aashidoni, “Da mwenu muukile ndalola nyamani kushimbweshe akulá? Muukile ndalola udani úshipunga imepo?

⁸Da muukile ndalola nyamani? Nannola munu ágwalidile dinguvo dyabei? Mwenu, vanu vagwalíla dinguvo dyabei vaikala muding'ande dyavaumu.

⁹Kanji napanelo muukile ndalola nyamani? Muukile nannola nkúlava? Elo, ninkumwaulila doni, nae pankulava po, andipunda.

¹⁰Aju ni aijá wavamwandike doni, “ ‘Mushu mwako, nannangaledya múntenga wangu, nae andakukandyangidya indila yako.’[28]

¹¹“Ninkumwaulila mwiu doni, pakati pavanu vamushilambo shapai ashi, haumilidile nkúlava ámpundile Nshuwau Wakubatisha. Ata ive davo aijá ndikidiki muutawala wakuwa wo, nae ni nang'olo ámpundile Nshuwau jo.

¹²Kutunduvangila wakati umwe Nshuwau Wakubatisha mpaka ambi apa, utawala wakuwa unkuka na dimongo na valikanyilídya vankwinjila.[29]

¹³Mwaa Vakulava uti pamo na Lilamulo vandilava mpaka Nshuwau

¹⁴napane ikava kenga munkuulula kwamini, bai nae ni jojo Liyashi áshilindiligwa kwida.

¹⁵Aijá ávenavo matu akwigwidya, aigwe.

¹⁶“Napanelo vanu vaimbula ai ndivalinganiange na nyamani? Vanavo vavelé kenga vadyoko vaikalénge mumautu aumbala vaulanila doni,

¹⁷“ ‘Tundimwambela magoma, mwenu hamuvinile. Tundimba dimu dyashililo, mwenu hamulidile.’

¹⁸“Shapo lola, andida Nshuwau pakalya na pakakumbila, mwenu muushidoni, ‘Anintawala lijini ajo.’

¹⁹Andida Mwana Wamunu alya na akumbila, mwenu muushidoni, ‘Nnole munu wakululuka na lilevi, njave vakukatisha-ukodi na vakutega.’ Kanji napane limanyilo lyake Nnungu linkulilodya kuva lyashaliya nkati muvitendo vyake.”

²⁰Yesu napane kutwala kutunduvanga kutangadikanga minjini vyatandile makango oe mwaa havalotíle kulijugulanga,

²¹“Upambale wako Kolashimu! Upambale wako Beteshaida! Makango atandéke kwenu leka àtandeke ku Tilu namu ku Shidoni, vanavo doni vàlijugulenge tangu kala. Doni vàlitaenge maguni na vàpakalenge liu.

²²Nangu ninkumwaulila mwiu doni, muliduva lyaukumu vatilu namu vashidoni vandadyanga kuliko mwenu.

²³Nawako Kapalanaumu! Da ulota kulikwedya mpaka kuwa? Bai vandakupandamwalela kumoka. Makango atandéke kwako wako leka àtandeke ku Shodoma, njini awo ukandipagwa mpaka nelo.

²⁴Napane nangu ninkukwaulila mwiu doni, muliduva lyaukumu shilambo sha ku Shodoma shindadyanga kuliko mwenu.”

²⁵Napanelo muwakati awo Yesu andítangola kushidoni, “Ninkukulambwalela[30] Atata, UMU wakuwa na pai, pakuvapiyanga vinu avi vanu valimanyilo na valipundishídye kuvalodya vanu vila.

²⁶Elo Atata, mwaa amu ni momo mwaulatalele umwene.

²⁷Vinu uti aningukamudya Atata. Hapali junji ámmanyite Mwana ila Atata na hapali ámmanyite Atata ila Mwana pamo namu aijá walota kunnodya mwene Mwana.

²⁸“Idananga kwangu mwenu uti díndabadabyenge dibasha, nangu nampumudya.

²⁹Lyunge likangoti lyangu na lipundishe kwangu. Nangu ni wakulimaladya na wantima wakulishapeya na mwenu mundapata kupumula kwaungumi wenu.

³⁰Mwaa likangoti lyangu halinapwateka shinu na ibasha yangu inkugaluka.”