Read Ibibiliya mu Shimakonde Imbodi Yaambi na dimbande dya Imbodi Yakala Mateu 12 Bible Online

Mateu 12 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 12

¹Napanelo muwakati awo Yesu apita mulishamba lyangano muliduva lyakupumula, vakwoda vake indívakola indala kutwala kumpulula ngano kumamena.

²Mapalishayo pavagwene davo vakaashidoni, “Wako, vakwoda vako vankutenda shinu shilaéka muliduva lyakupumula.”

³Yesu kushidoni, “Da mwenu hamunava kushomya vyatandíle Daudi painkodíle indala pamo na avalá vavenavo?

⁴Nae jo andíinjila nng'ande mwake Nnungu kulya alalá magung'u avashimuumidya Nnungu, magung'u áshilaeka kulya nae pamo na vavagwe ila gweka vakulangalalela-shadaka.

⁵Kwali hamunava kushomya mu Lilamulo pavaandike doni, vakulangalalela-shadaka vankunyatyanga liduva lyakupumula nng'ande mwake Nnungu pavakavanavo makosha?

⁶Bai nangu ninkumwalila doni, apa apali nang'olo kuliko ing'ande yake Nnungu.

⁷Mwenu leka mumanyite mana amalove ala, ‘Shangulota ni shididi i shadaka,’ hamukanavaukumu vanu vákave makosha.

⁸Mwaa kwaliduva lyakupumula, Mwana Wamunu, Umu.”

⁹Paumile apo andyúka ndainjila mushitala shave shakulipudidya.

¹⁰Mwe! Mo mushitala mo kupagwa munu jumo wakudidimanga nkono. Vanavo valota vapate shakunkanidyanga Yesu, vandímudya, “Da lilamulo linkutuleka kumponia munu muliduva lyakupumula?”

¹¹Yesu kushidoni, “Da wakwashi pakati penu álota kutenda akavanavo ngandolo wake, ngandolo ajo kulijela mulipondo muliduva lyakupumula kutwala nae mene kuka ndamumya?

¹²Kushi munu jo i nimpomo kuvanavo mana makumene kuliko ngandolo. Napavedoni muliduva lyakupumula lyo, linkutuleka tutende wambone.”

¹³Nae kutwala kumwaulila munu jo kushidoni, “Nyalodya nkono wako wo!” Nae kunyalodya kutwala nkono wo kupona kuva kenga mo mwauvalalele unji.

¹⁴Bai mapalishayo pavaumanenge nshitala amulá, vandíikala shemba pakulota vammalidye.

¹⁵Yesu pamanyite nnugu wave, mulyutu alyo andílyumadyanga kutwala imbumba ing'umene yavanu kumwoda, nae valwele uti kuvaponia.

¹⁶Napanelo andívaduma havanatadye kummanya vanu

¹⁷pakulota liwikile popo lilove litangaléke na nkúlava Ishaiya doni,

¹⁸“Nnole ntumika wangu wanintandwele, nae ni wakunagwaleka wangulitamangila muungumi wangu. Nammika Imumu wangu, na nae andavalanganga kwavamidi ishaliya yangu.

¹⁹Jojo jo hapwatana na munu na ata hakugwanga, hapagwa munu wakwigwa mudibalabala lidi lyake.

²⁰Nae lupambai lupwajikénge hatema, lutambi lututuma lyoi hadima, mpaka atadye ishaliya iteme.

²¹Kwake nae vamidi vandavanavo lilindilililo.”[31]

²²Napanelo vanu vandímwidanavo kumwe Yesu munu jumo walijini, wakuputala mevo na bubu nae kumponia, munu jo kutangola na kulola.

²³Imbumba uti yavanu indishanga iishidoni, “Da aju, ava jo mwanagwe Daudi?”

²⁴Kanji mapalishayo pavaigwite davo kushidoni, “Munu aju mwakumulangila majini ni kwaindila imwe Beelishebuli nang'olo wave majini.”

²⁵Yesu amanya makumbukililo avo andívaulila kushidoni, “Kula utawala ukalijavanianga ubyaananga shivenevene, utawala awo undatimbikanga. Haupali njini kwali likola lilijavaniánga kutandana ing'ondo shivenevene lilóta kulikukumula.

²⁶Shatwani akalikumulanga jo mwene, ankulijavanianga, napane utawala wake ulota kulikukumula dashi?

²⁷Ikava kenga nangu ninkukumulanga majini kwaindila imwe Beelishebuli, kushi vadyoko venu vakumulanga kwaindila imwe nyani? Bai vovo vandava vakuukumu venu.

²⁸Napane ikava kenga ninkukumulanga majini kwaindila ya Imumu wake Nnungu, bai manya doni utawala wa Nnungu mwenu po, undimwikila.

²⁹“Da mwashi munji mwakwinjilila nng'ande mwamunu wadimongo ndakuunganga vyang'ande mwake mukanave shitandi kumunga mwene ing'ande jo? Ni apo palota kuulula kukuunganga vyang'ande.

³⁰Aijá ákalyunganianga namu nangu, ankunguvangedya na aijá ákakungaila pamo namu nangu, ankumwadilanga.

³¹Napavedoni ninkumwaulila, madambi na kukupulu uti kundalivalivigwa napane kunkupulu Imumu Wanashwe hakulivalivigwa.

³²Munu álota kuntangola kunyata Mwana Wamunu, analivalivigwa napane áija álota kuntangola kunyata Imumu Wanashwe, halivalivigwa ata muwakati au na ata muwakati ulóta kwida.

³³“Nnandi wakukonda upa vyepo vyambone, nnandi wakunyalanyalanga upa vyepo vyakunyalanyalanga. Kwaindila yavyepo vyake ni paulota kumanya nnandi awo.

³⁴Mmanu mmashinankulaba mmakunyata mitima mwe! Mwenu mulota kutangola dashi malove ambone akuno mùvele mmanu mmakunyata mitima? Munu atangola vimuumbéle muntima mwake.

³⁵Munu wakwalala ntima, mulipeta lyake lyambone aumya vinu vyambone. Munu wakunyata ntima, mulipeta lyake lyakunyata aumya vinu vyakunyata.

³⁶Nangu ninkumwaulila doni, muliduva lyaukumu vanu vandajang'ulanga malove uti akudidimanga.

³⁷Kwamalove ako undapata shaliya na kwa lo malove ako undaukumigwa.”

³⁸Napanelo pakati pamapalishayo na vamwalimu vadishaliya vandímwaulila Yesu, “Mwalimu, tulota wako ututandele shimanyikilo twone.”

³⁹Nae akavajang'ula kushidoni, “Ni imbula yaukalau na yakulavalava ijúgwa shimanyikilo. Havalodya munu shimanyikilo shinji ila ashilá shankúlava Janashi.

⁴⁰Mo mwapagwidídye Janashi munda mwasamaki maduva matatu shilo na mui, yadavo andapagwa Mwana Wamunu maduva matatu shilo na mui pai po muulongo.

⁴¹Avalá vanenive paukumu vandatakatuka kwimila kuvaukumu vanu vaimbula ai. Vanenive vo, pavaigwite kuvalanganga kwantenga kumwe Janashi vandílijugulanga. Mwenu! Apa apali nang'olo kuliko Janashi.

⁴²Namomo paukumu andatakatuka umu nkongwe wakwina shilambo kwimila pakati pavanu vaimbula ai kuvaukumu. Nae pakulota kwigwilila limanyilo lyake Shalomoni, aaleké kumwisho shilambo. Mwenu! Apa apali nang'olo kuliko Shalomoni.

⁴³“Lijini nshapu panauma mumili mwamunu apita adumbadumba kushimbweshe alambela lyutu lyakupumulilila napane hanakodya,

⁴⁴kanji aashidoni, ‘Kudyanga nguujile kwing'ande kwangu kwangwaleke.’ Pawika ako akodya ing'ande yo akapali munu, vàpyailenge shana na vinu uti vàpangenge shana.

⁴⁵Nadoni nae andauja kuka ndavatwala majini anji saba akumamodya kubanga kumpunda nae kutwala kwinjilanga nng'ande mo kwikala. Bai shinamidyo shamunu ajo shindava shakumamodya kunyata kupunda shamwanda utandi. Nimumo momo mwailota kuvalela kwaimbula ai yaukalau.”

⁴⁶Napanelo Yesu akuno atangola na imbumba yavanu, mwe! Anyoke pamo na vanung'unuvake kwida panda ndajugwa vatangonavo.

⁴⁷Munu jumo kumwaulila Yesu, “Panda po, andida anyoko pamo na vanung'unuvako valota vatangole namu wako.”

⁴⁸Nae kushidoni, “Da ajala ni wakwashi na vanung'unuvangu ni vakwashi?”

⁴⁹Akanyalodya nkono kuvaalota vakwoda vake kutwala kushidoni, “Ajala na vanung'unuvangu ni ava apa.

⁵⁰Aijá átandedya mwalatela Atata ávele kuwa, ajo ni mwanetu, numbwangu na ajala.”