Read Ibibiliya mu Shimakonde Imbodi Yaambi na dimbande dya Imbodi Yakala Mateu 13 Bible Online

Mateu 13 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 13

¹Muliduva lyolyo Yesu paumidile panda andyúka ndaikala nanyenje litanda.

²Popo po dindyúmbalanila dimbumba dyavanu, kuntang'anedya mpaka kuntadya nae kukwela mwingalava kwikala kuvaleka vanu uti vàimidile kumwangu.

³Nae andívaulila vinu vyoe kwamikong'o aashidoni, “Mwenu! Nkúpanda jumo andyúma kuka ndamwadilila imbeju.

⁴Pashimwadilila kupagwa igwilidíle nanyenje indila vyuni kwida ndadadola.

⁵Inji kugwilila padinyanga pauvéle ulongo padyoko kwodamwaa ulongo wo hauvele woe, yanavo kumalenneu.

⁶Palikamadile liduva, milandi vyo kujuminneu mwaa dinyija hadilitavalakadíle.

⁷Inji kugwilila padimiva, dimiva dyo kukulumuka kutwala kushinya milandi vyo.

⁸Inji kavili kugwilila paulongo walutuba, yanavo kulundula vyepo; imo imiya, inji sitini na inji yo salasini.

⁹Aijá ávenavo matu akwigwidya, aigwe.”

¹⁰Napanelo vakwoda vake vanímmandika kumudya doni, “Mwaa shani unkutangola na venentete kwamikong'o?”

¹¹Yesu akavajang'ula kushidoni, “Mwaa mwenu vanintadya mumanye vipii vyautawala wakuwa kanji vanavo mene.

¹²Kula munu ávenavo vandamwanjadyedya kuvanavo vyoe. Ákavenavo ata sho shavenavo sho, vanampoka.

¹³Ni ashi shandivatangalela kwamikong'o mwaa, “ ‘Vanavo ata valola avi, havanona shinu, vaigwa avi, havanaigwa shinu ata havanamanya shinu shaambíka.’

¹⁴Kwavanavo ankuwikila popo malove ankulava Ishaiya atédoni, “ ‘Mwenu ata mwigwa avi, mundaigwa kanji mwiko hamumanya shaambíka, mulola avi, mundona kanji mwiko hamwanalela.

¹⁵Mitima vyavenentete ava vindinanopa, kwigwa vankwigwa kanji matu ave andidivana, na mevo ave andyulugwala. Leka ikavé davo vakandyona na mevo ave, vakandigwa na matu ave, kwanalela mmitima myave, kutwala kushiliuka na nangu ndikandivaponia.’[32]

¹⁶“Kanji mevo enu mwenu andijaligwa mwaa ankulola na matu enu mwaa ankwigwa.

¹⁷Ninkumwaulila mwiu doni, vakulava na vaishaliya voe vashindalota vone vyamwona mwenu avi kanji havagwene na vaigwe vyamwigwa mwenu avi kanji havaigwite.

¹⁸“Mwenu napanelo igwilila mana ankong'o wankúpanda.

¹⁹Munu akaigwilila lilove lyámba utawala, akanaigwa shana, andáaloka nkalau kumpokenneu lilove lyavapandile muntima mwake. Aju ni imbeju igwilidíle nanyenje indila.

²⁰Imbeju igwilidíle padinyanga ni munu áigwilila lilove kutwala kupwashalela na lipuwilo.

²¹Kwodamwaa havé dinyija, hanalikiniya. Kupata kwene mauvilo kwali kupapatigwa, kuujinneu kunyuma.

²²Imbeju igwilidíle padimiva ni munu áigwilila lilove kanji mangaikangilo awakati au pamo na lung'unuku lwamali, avyo vindáshinya lilove kutwala nae mene kupa vyepo.

²³Napanelo imbeju igwilidíle paulongo walutuba, aju ni aijá áigwilila lilove na kwigwa shana, álundula mwiu vyepo; munu jumo miya, junji sitini na junji jo salasini.”

²⁴Yesu kuvakang'ela nkong'o unji aashidoni, “Utawala wakuwa uvelé kenga munu ápandile imbeju yambone mulishamba mwake.

²⁵Napane shilo vanu vàlalenge lwono, mmongo kwida ndapanda imbeju yanashitani mo mmapondo angano kutwala kulyukila.

²⁶Bai ngano aijá kumela kukulumuka, nanae nashitani jo kumela.

²⁷Napanelo vatumika vake kuka ndamudya, ‘Nang'olo, da wako haupandile imbeju yambone mulishamba amulá? Kushi nashitani jo, aalakadilé kwashi?’

²⁸Nae kushidoni, ‘Vinu avyo atandilé mmongo.’ Vatumika do, ‘Napane unkulota tuke tukandabwalange?’

²⁹Nae kushidoni, ‘Mene! Mwaa mukandabola inkuulukika kumpambanianga na ngano.

³⁰Leka vikulumuke pamo mpaka muwakati wamapuno. Bai muwakati wowo ndavaulila vakupuna kushidoni, shitandi mwangange nashitani jo mumuungange vitinda muntae moto, mutwale mumwangange ngano muke mukammike mushidimbi mwangu.’ ”

³¹Kutwala kuvakang'ela kavili nkong'o unji aashidoni, “Utawala wakuwa uvelé mwaimbeju yanshupi yatwete munu kuka ndapanda mulishamba mwake.

³²Imbeju ai idikidiki namene kuliko dimbeju dinji uti, napane paimela po undáuma nnandi ukumene wakupunda milandi vinji mpaka vyuni vyakuniania kwida ndadenga vyanda mudinavi dyake.”

³³Kavili kuvakang'ela nkong'o unji aashidoni, “Utawala wakuwa uvelé mwankukumuku watwete nkongwe kupiya mudipishi nnatu dyaunga wangano mpaka unga uti kukumuka.”

³⁴Vinu avi uti Yesu ashindaulila imbumba yavanu atumila mikong'o. Hashipali shashivaulila kwabila kutumila mikong'o

³⁵pakulota liwikile popo lilove litangaléke kwaindila yankúlava aashidoni, “Ndatangola ngutumila mikong'o, ndavalanganga vinu vilipiídye tangu kukandyangigwa shilambo.”[33]

³⁶Napanelo Yesu palakile imbumba yavanu ailá, akauka ndainjila nng'ande. Vakwoda vake vakamuukila ndanjugwa, “Twaulila mana ankong'o wanashitani mulishamba.”

³⁷Nae akavajang'ula kushidoni, “Aijá ápandile imbeju yambone, Mwana Wamunu

³⁸na lishamba lyo, shilambo. Ailá imbeju yambone, avo ni vana vamuutawala, nashitani jo vanavake nkalau na

³⁹mmongo ámpandile nashitani ni Ndamoni. Kupuna ni mwisho wawakati, vakupuna kuva vanjelo.

⁴⁰Nadoni kenga mo mwavanankungailila nashitani kuntaa moto, nimomo mwaulota kuvalela mwisho wawakati.

⁴¹Mwana Wamunu andavatuma vanjelo vake kutwala vanavo kukungailila pamo muutawala wake avilá uti vitádya lipagwe lidambi na avalá uti vatandédya ungave-lilamulo.

⁴²Vovo vo, vandavajela kulitungulu, kushinu kulota kupagwa shililo na kutuka shulu nkanywa.

⁴³Bai avalá vaishaliya vandashenga kenga liduva muutawala watatagwave. Aijá ávenavo matu akwigwidya, aigwe.

⁴⁴“Napanelo utawala wakuwa uvelé mwamali alipiídye mulishamba, aanaladíle munu jumo kutwala nae kupiya kavili. Napane kwamwaa wakumuumbala lipuwilo, andyúka nashulusha vinu vyake uti vyavénavo kuka ndashuma lishamba alyo.

⁴⁵“Namomo utawala wakuwa uvelé mwankushulusha jumo áshilambela majanga amali oe.

⁴⁶Nae pakadidye lijanga limo livénavo mali oe andyúka ndashulusha uti vyavénavo kuka ndashuma lijanga alyo.

⁴⁷“Namomo utawala wakuwa uvelé mwalungau lwavatajile mmedi kutwala kujola dyomba dyakula namuna.

⁴⁸Dyomba dikajole dyoe vene kuutidya lungau kumwangu kutwala kwikalanga, kutandola dyomba dyambone kujela muvikapu vyave dyomba kaligwa dyo, kujaa ako.

⁴⁹Amu nimomo mwailota kuvalela mwisho wawakati; vanjelo vandaida ndavaapula vakalau mushipinga shavanu vaishaliya.

⁵⁰Vakalau vo kuvajela kulitungulu kushinu kulota kupagwa shililo na kutuka shulu nkanywa.”

⁵¹Napanelo Yesu andívaudya, “Da mundigwa shana vinu avi uti?” Vanavo do, “Elo tundigwa.”

⁵²Nae kuvaulila kushidoni, “Doni napanelo kula mwalimu álitandile nkwóda wautawala wakuwa ankuva mwatatamunu wapaing'ande áumya mulipeta mwake vinu vyaambi na vyakala.”

⁵³Napanelo Yesu pamalidile kukong'a mikong'o avyo andyúma palyutu alyo.

⁵⁴Akawika kwave kutunduvanga kuvapundisha venentete mushitala shave shakulipudidya. Vanavo kutwala kushanga, “Da limanyilo ali na makango ala apatilé kwashi?

⁵⁵Aju da i jo mwanagwe nkúveda aijá? Anyoke aju i Maliya? Vanung'unuvake i Tiyagu, Yoshe, Simoni, namu Yudashi?

⁵⁶Valumbuvake da i vo vatwikanavo wetu ava? Kushi napane vyatenda avi apatilé kwashi?”

⁵⁷Nadoni vanavo vashinammikila shitundi. Yesu kutwala kushidoni, “Nkúlava havanamwiludyanga ila mushilambo shake na pakaja pake.”

⁵⁸Bai palyutu alyo, Yesu hatandíle makango oe kwamwaa waungakulupila wave.