Read Ibibiliya mu Shimakonde Imbodi Yaambi na dimbande dya Imbodi Yakala Mateu 15 Bible Online

Mateu 15 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 15

¹Napanelo Yesu vandímwidila mapalishayo pamo na vamwalimu vadishaliya vakwalakela ku Yelusalemu ndamudya,

²“Mwaa shani vakwoda vako havanaodedya shinu yadi yavatulakalele vanyakala vetu? Mwaa vanavo pavalya, havananavanga shinu medi mmakono.”

³Nae akavajang'ula kushidoni, “Mwaa shani namwenu na yadi yenu yo, hamunaodedya shinu malamulo ake Nnungu?

⁴Mwaa Nnungu atédoni, ‘Mwishimu tatako na anyoko’[34] na ‘Aijá álota kumwiludyanga tatake kwali anyoke inimmaikila vammalidye.’[35]

⁵Kanji mwenu munkupundisha doni, ‘Munu woewoe akamwaulila tatake kwali anyoke kushidoni, Sho shangushilota ndikupe sho, ni shadaka shakumupa Nnungu,

⁶bai munu ajo hainammaikila shinu kavili kumwishimu tatake kwali anyoke.’ Nadoni pamwodedya yadi yenu ai inkuntadya mwiludyange lilove lyake Nnungu.

⁷Mmanu mmamalambi mwe, Ishaiya animmalanganga shana patédoni,

⁸“ ‘Venentete ava po pakanywa apa vankungutumbyanga, ila ntima wave uvelé kushu namu nangu.

⁹Vanavo vankulipudya bule, vapundisha kenga mapundisho shii malamulo avanu vene.’ ”[36]

¹⁰Bai andíshema imbumba yavanu kwaulila doni, “Igwilila na mumanye shaambíka.

¹¹Shinu shintáa munu ushapu i ashilá shinjilíla pakanywa ila ni ashilá shúma pakanywa. Asho mwiu shinkuntaa munu ushapu.”

¹²Napanelo vakwoda vake vandímuukila ndamudya doni, “Da unkumanya kenga mapalishayo pavaigwite vyautangwele avilá indivanyatila?”

¹³Nae kushidoni, “Kula nnandi wakapandile Atata wakuwa undabubuligwa.

¹⁴Valeke, vanavo ni vananagalaledi vakuputala mevo vavalangalaléla vakuputalamwave. Munu wakuputala akannangalalela wakuputalamwagwe, vanu avo uti vandagwilangila mulipondo.”

¹⁵Napanelo Patulu anínjugwa aashidoni, “Mana ankong'o au, twaulila.”

¹⁶Yesu kushidoni, “Da namwenu momo hamunava kumanya?

¹⁷Da hamumanyite kenga vinu uti vinjilíla pakanywa vyuka mmunda kutwala kuka nshoo?

¹⁸Napane ashilá shúma nkanywa shaaloka muntima. Asho ni shintádya munu kuva nshapu.

¹⁹Muntima mwamunu munkuma makumbukililo akunyata, kubyaa, kunama nankongwe waukannambile, kulavalava, kwiva, ushuda waushwang'a na kukupulu.

²⁰Vinu avi ni vintádya munu ave nshapu. Napane kulya ukanavenge medi mmakono mo hakunantadya munu kuva nshapu.”

²¹Napanelo Yesu paumile palyutu alyo andyúka kwisemu ya ku Tilu na ya ku Shidoni.

²²Mwenu! Nkongwe jumo nkanaani waisemu ayo kumuukila akugwa pashanya po aashidoni, “UMU, mwanagwe Daudi, ngwanangila shididi! Mwanangu nkongwe anintawala lijini kupunda apo.”

²³Yesu nae kulamana na kunjang'ula. Vakwoda vake vakamuukila nanjugwa, “Nkumulange auke, ankupita atwoda akuno anyakonya.”

²⁴Yesu do, “Nangu havangutumididye kwavanu vanji ila kwavangandolo vajaikenge va ku Ishilaeli bai.”

²⁵Bai nkongwe aijá kuwika kunguguvalila kushidoni, “UMU, ngupwashela.”

²⁶Yesu, “Hashinava shambone kutwala ligung'u lyavana kuvajalela vang'avanga.”

²⁷Nkongwe jo doni, “UMU, shinu asho mwiu! Napane ata vo vang'avanga vo vandálya dingalamwamwa digwilangíla mulyungu imesha yanakulugwave.”

²⁸Yesu kutwa kushidoni, “Ajaló, likulupililo lyako likumene namene! Nadoni vikutandeke kenga mo mwaulatadile.” Bai muwakati wowo mwanagwe jo kuponenneu.

²⁹Napanelo Yesu akaume apo andyúka mpaka nanyenje litanda lya Galileya kutwala kukwela palishinga kwikala.

³⁰Bai popo po kumwidila dimbumba kwadimbumba dyavanu vavaidanavo vakulamala, vakuputala mevo, vakukwava, vabubu na vanji vaté kwinjipa, kuvavika mmadodo mwake, nae kutwala kuvaponia.

³¹Dimbumba dyavanu dikavone vabubu vatangola vakulamala vapona vakukwava vawena na vakuputala mevo valola, dyanavo dindímupa lishangelo Nnungu umwe Ishilaeli.

³²Yesu akavashema vakwoda vake kuvaulila, “Nangu ninkuvaanangila shididi vanu ava mwaa ankupita maduva matatu vàvele namu nangu na vovo vo havavé shakulya. Nadoni kulailananganavo vàdobile indala, hangutamwa ngwonadavo vandadilikanga ndila.”

³³Vakwoda kutwa kumudya, “Da pakulota kuvalisha vanu ava munu apata pashi magung'u akuvatosha panalugwangwa apa?”

³⁴Yesu, “Muvenavo magung'u mangapi?” Vanavo do, “Saba na dindemba padyoko do.”

³⁵Nae akavalamulila vanu uti vaikalange pai,

³⁶akatwala magung'u saba alalá na dindemba adilá akannambwalela Nnungu, kumajanianga kuvapa vakwoda vake vanavo kutwala kuvajavila venentete.

³⁷Vanu uti kulya mpaka kwikuta. Vakatwalange makombo, vandyúmbadya makalala saba.

³⁸Napanelo vanu ve valíle vavele valume dyalupu nsheshe kwabila kuvavalangila vakongwe na vadyoko.

³⁹Bai Yesu akavalaile venentete vo, andíkwela mwingalava kuka isemu ya ku Magadana.