Read Ibibiliya mu Shimakonde Imbodi Yaambi na dimbande dya Imbodi Yakala Mateu 16 Bible Online

Mateu 16 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 16

¹Napanelo mapalishayo pamo na mashadukayo vandímuukila Yesu nanninga kunjugwa avalodye shimanyikilo shakwalakela kuwa.

²Nae kushidoni, “Mwenu ukawika wakati wayalyulo pamunona kuwa ko maundi akunduvalenge muushidoni, ‘Imepo ilota kuva yambone.’

³Namomo linyeiku muushidoni, ‘Nelo indatonya imbula mwaa maundi andikunduvala na lyundi lindidimbya.’ Mmanu mmamalambi mwe! Mwenu munkumanya kujavanianga vyamwona kumaundi napanelo munkutatakela kujavanianga vimanyikilo vyawakati.

⁴Eti vanu vaimbula yakunyata mitima na yakulavalava vajugwa shimanyikilo! Bai hashipali shimanyikilo shavalota kwona ila shimwe nkúlava Janashi.” Bai nae andívaleka kutwala kulyumadyanga kuka.

⁵Napanelo vakwoda vake pavaukile mwangu nkono unji walitanda, vandílivaliva kunyukata magung'u.

⁶Yesu kuvaulila kushidoni, “Ava mevo na lishunge kwamwaa wankukumuku wamapalishayo na wamashadukayo.”

⁷Vanavo vashindataukananga shivenevene vaashidoni, “Ni mwaa wetu wetu watukanyukete magung'u.”

⁸Yesu amanya makumbukililo ave andívaulila kushidoni, “Mmanu mmalikulupililo lidikidiki, mwaa shani munkutaukananga ing'ano yakumwova magung'u?

⁹Da mpaka ambi hamunava kumanya? Hamunakumbukila shinu magung'u mwanu alalá avalíle vanu dyalupu mwanu avalá? Makombo lo, muumbadidye makalala mangapi?

¹⁰Kwali magung'u saba alalá avalíle vanu dyalupu nsheshe avalá? Makombo ake muumbadidye makalala mangapi?

¹¹Da mwaa shani hamunamanya shinu do nangu haninamba shinu magung'u? Napane lilaledye kwamwaa wankukumuku wamapalishayo na wamashadukayo.”

¹²Bai vanavo vandímanya shana kenga nae hashamba nkukumuku wamagung'u; ashamba mapundisho amapalishayo na amashadukayo.

¹³Napanelo Yesu akawika isemu ya ku Shashaleya imwe Pilipo, akavaudya vakwoda vake kushidoni, “Da vanu vamwona Mwana Wamunu kuva nyani?”

¹⁴Vanavo do, “Vanji Nshuwau Wakubatisha, vanji Liyashi na vanji Yelemiya kwali nkúlava jumo pakati pavakulava vakala.”

¹⁵Nae kuvaudya vanavo, “Kushi mwenu po, nangu mungwona kuva nyani?”

¹⁶Simoni Patulu patwete kujang'ula akaashidoni, “Wako Klistu mwanagwe Nnungu mumi.”

¹⁷Yesu akanjang'ula kushidoni, “Undijaligwa wako Simoni Bali-Janashi! Hanava shinu munu ákupundishidye vinu avi ila ni Atata ávele kuwa.

¹⁸Namomo ninkukwaulila doni, wako Patulu[37] na nangu pashanya lijanga lyolyo ali, ndadenga liganisha lyangu na liganisha alyo milango vyakumoka havyulula kutema.

¹⁹Nangu ndakukamudya myungulilo vyautawala wakuwa; uti vyaulota kunga mushilambo shapai, kuwa momo vindaungigwa, shaulota kuungula mushilambo shapai, kuwa shindaunguligwa.”

²⁰Bai nae andívaduma vakwoda vake pakulota havanammalangange kwamunu woewoe.

²¹Napanelo kutwala apo Yesu kutunduvanga kuvamanyiya ngala vakwoda vake doni, nae inimmaikila auke ku Yelusalemu, koko ko akapate mauvilo oe kwavanang'olo, kwavakulangalalela-shadaka vanang'olo na kwavamwalimu vadishaliya, apele na muliduva lyantatu lyake adyuke.

²²Patulu akanshamela Yesu kwagweka kutwala kunduma, “UMU, ata padyoko! Shinu asho hashikutandeka.”

²³Yesu kushiliuka kushidoni, “Tumuka mushu mwangu Shatwani! Wako ni lijanga lyakungutadya ngulikuvale. Wako haunakumbukila shinu mwakumbukilila Nnungu, ukumbukila mwavakumbukilila vanu.”

²⁴Bai kutwala kuvaulila vakwoda vake doni, “Munu akalota kungwoda nangu, alishukulu jo mwene anyukate nshalaba wake angwode.

²⁵Mwaa woewoe álota aposhe shingumi shake andakatoka na woewoe álota akatoke shingumi shake kwamwaa wangu nangu, andaposha.

²⁶Da munu alota kupata wambone shani akapata shilambo ashi uti kutwala kukatoka shingumi shake sho? Kwali shinu shani shalota kuulula kumya munu abadilishe na shingumi shake?

²⁷Nadoni Mwana Wamunu andaida mulishangelo lyatatake pamo na vanjelo vake, napane apo anannipa kula munu kwodana na matendo ake.

²⁸Nangu ninkumwaulila mwiu doni, po pakati penu apa vanji mwiko havapela vakanava kumwona Mwana Wamunu aida muutawala wake.”