Read Ibibiliya mu Shimakonde Imbodi Yaambi na dimbande dya Imbodi Yakala Mateu 17 Bible Online

Mateu 17 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 17

¹Napanelo akapite maduva sita, Yesu akantwala Patulu, Tiyagu namu Nshuwau nung'une Tiyagu kuvaukanavo gwekayavo ndakwela palishinga lyakulepa.

²Popo po, nae kujalukanga pamevo pave, ing'ope yake kushenga kenga liduva, dinguvo dyake kung'ala kenga lilangadyo.

³Mwenu! Popo po kwaneka Musha namu Liyashi vatangola namu nae.

⁴Patulu kutwa kumwaulila Yesu kushidoni, “Nang'olo ni shambone kupagwa po papa. Napanelo ukalota, ngukandyange mautu matatu, limo lyako, linji Musha na linji lyo limwe Liyashi.”

⁵Patulu akuno atangola, kuwa kwaloka lyundi lyakushenga kuvainikidya, mo mulyundi mo kwigwinika lidi liishidoni, “Aju ni mwanangu waninnagwaledya, ángupa lipuwilo, jojo jo, mwigwilile.”

⁶Vakwoda vake pavaigwite malove alo vandígwanga ding'ope kutindya pai na kujopa doni.

⁷Nae akavavandika apalá, kuvakwaa kutwa kushidoni, “Takatukanga, hamunajope.”

⁸Vanavo pavang'amwile mevo vangwené gweka jo Yesu aju bai.

⁹Pavashishuluka palishinga apalá Yesu andívaleya vakwoda vake vo doni, “Hamunamwaulile munu vyamugwene avilá mpaka padyuka Mwana Wamunu pakati pavakupela.”

¹⁰Napanelo vakwoda vake vo kumudya, “Mwaa shani vamwalimu vadishaliya vaashidoni ivaikidile Liyashi ave ntandi kwida?”

¹¹Nae do, “Mwiu Liyashi andava ntandi kwida na andapanganianga vinu uti.

¹²Bai ninkumwaulila doni, Liyashi jo andída ila vanavo havammanyite, vaníntenda uti vyavalatíle vantende. Nadoni momo Mwana Wamunu andauvauvanga mmakono mwave.”

¹³Bai apo vakwoda vake vandímanya doni amwamba Nshuwau Wakubatisha.

¹⁴Napanelo vakawika paimbumba yavanu munu jumo kumuukila Yesu kunguguvalila

¹⁵kutwala kushidoni, “Nang'olo mwanangile shididi mwanangu, nae ankuvanavo ulwele washikoko na ankuvauvanga namene. Myanda vyoe andágwilila pamoto kwali mmedi.

¹⁶Nangu ndimwidanavo kwavakwoda vako, vanavo havamuulwile kumponia.”

¹⁷Yesu kutwala kushidoni, “Mmanu mmaimbula íkakulupila na yakudumbadumba! Da nangu ndapagwa namu mwenu mpaka duvani? Nannaga mwenu mpaka duvani? Mwidenavo apa ndyoko jo!”

¹⁸Bai Yesu kushulanga lijini lyo, lyanavo kuma mundyoko mo kutwala muwakati wowo ndyoko jo kupona.

¹⁹Napanelo vakwoda vake vakamuukila àvele kwagweka ndamudya, “Mwaa shani wetu hatuulwile kukumulanga lijini lyo?”

²⁰Nae kushidoni, “Ni kwamwaa walikulupililo lyenu lidikidiki. Ninkumwaulila mwiu doni, mukavanavo likulupililo kenga imbeju yanshupi mundalamulila lishinga ali do, ‘Tumuka apa wena apalá,’ lyanavo kuka. Hashipali shilóta kunkamadyangidya.”

²²Napanelo vàvele pamo ku Galileya, Yesu andívaulila vakwoda vake kushidoni, “Mwana Wamunu vanannimya kunkamudya kumakono kwavanu,

²³vanavo vanampedya napane muliduva lyantatu lyake andadyuka.” Bai vakwoda vake vandívanavo shipalodi shoe.

²⁴Yesu pamo na vakwoda vake vakawika pa Kapalanaumu. Napanelo vanu váshipwashalela ukodi wamwing'ande ya Nnungu vandímuukila Patulu ndamudya, “Da mwalimu wenu jo andáumya dishingo mbili dyo?”

²⁵Nae do, “Elo andáumya.” Bai Patulu po painjidile nng'ande akanava kutangola shinu, Yesu kumuudidyanneu, “Simoni, da wako po wona dashi? Vaumu vamushilambo vo vavatwalangila vananyanyi ada kwali ukodi? Vavatwalangila vanavave kwali vamidi?”

²⁶Patulu do, “Vamidi.” Yesu kutwa kushidoni, “Napavedoni vanavave vo vava muunaiti.

²⁷Kanji napanelo pakulota havanashimwe, wena kulitanda ukajele indawana mmedi. Yomba ntandi waulota kunkangola njamye ikanywa yo undakodya dishingo nsheshe utwale ungulipile nangu pamo namu wako umwene.”