Read Ibibiliya mu Shimakonde Imbodi Yaambi na dimbande dya Imbodi Yakala Mateu 18 Bible Online

Mateu 18 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 18

¹Muwakati wowo vakwoda vake vandímuukila ndamudya kushidoni, “Nyani álota kuva nang'olo muutawala wakuwa?”

²Yesu kunshema ndyoko ndikidiki, kunkamula kumwimidya shing'ati shave

³kutwala kushidoni, “Ninkumwaulila mwiu doni, mwenu mukanaujiyanga mitima vyenu kulitenda kenga mmadyoko mmadikidiki, mwiko hamwinjila muutawala wakuwa.

⁴Napavedoni woewoe álota kulishapeya kutwala kuva mwandyoko ndikidiki, aju andava nang'olo muutawala wakuwa.

⁵Woewoe álota kumpwashalela ndyoko ndikidiki kenga aju palina lyangu munu ajo angupwashalela nangu.

⁶Napane woewoe álota kuntadya kukuvala ndyoko jumo pakati pavadikidiki ava vangukulupíla nangu, kudyanga munu ajo kumuungangila lijanga lyakwidopa pang'ulo kuntitimidya mwimanga kumedi makumene.

⁷Shipambale shilambo kwamwaa wavitendo vivatádya vanu vatege. Ngwengwe vyakunyata vivatádya vanu vatege vindaumilila napane apambale aijá álota kwidanavo vyakunyata avyo!

⁸“Napanelo ikava kenga nkono wako kwali lidodo lyako vinu avyo vinkukutadya ukuvale, lumula ujae kushu ko. Kudyanga kwinjila mushingumi ùlamele kuliko kuvanavo makono uti mavili kwali madodo uti mavili kutwala kuka kushena kwauvele moto úkamalilika.

⁹Namomo ikava kenga liu lyako linkukutadya ukuvale usha ujae kushu ko, kudyanga winjile mushingumi ùlamele kuliko kuvanavo mevo uti mavili kutwala kuka kumoto wakushena.

¹⁰“Lilaledye kwambangidya hamunamwiludyange ata ndyoko jumo pakati pavadyoko ava! Nangu ninkumwaulila doni, vanjelo vave kuwa ko, ngwengwe vankwonana namu Atata ávele kuwa.

¹²Da mwenu mwona dashi? Ikava kenga munu ankuvanavo dingandolo miya anjaika jumo, haleka adilá tisini na tisa ko kumashinga kuka annambela jumo ánjaike?

¹³Akankodya, ninkumwaulila mwiu doni, anampuwangila namene kuliko adilá tisini na tisa dikanjaíke.

¹⁴Nimumo momo Tatagwenu ávele kuwa hanalota shinu ata padyoko kunjaika ndyoko jumo pakati pavadyoko ava.

¹⁵“Napanelo nung'unumunu akakutagela muukile ukandume mùvele mmavili yenu. Ikava kenga andakwigwilila, unimposha.

¹⁶Kanji akanakwigwilila, ntwale munu jumo kwali vavili pakulota ‘likosha lyoelyoe vaakikishe vashuda vavili kwali vatatu.’[40]

¹⁷Ikava kenga havaigwilila vanu avo, mmalangange kuliganisha. Ikava kenga navanavo havaigwilila momo, bai mmalangile kuva mmidi kwali nkúkatisha-ukodi.[41]

¹⁸Ninkumwaulila mwiu doni, uti vyamulota kunga pai apa, kuwa momo vindaungigwa na avilá vyamulota kuungula pai apa, kuwa momo vindaunguligwa.

¹⁹Namomo ninkumwaulila doni,[42] vanu vavili pakati penu vakaigwania mushilambo amu kwashinu shoeshoe shakujugwa, Atata ávele kuwa andavapa.

²⁰Mwaa poepoe pavakadyanianga vanu vavili kwali vatatu palina lyangu nangu, nangu ngupali popo.”

²¹Bai Patulu akamuukila ndamudya, “UMU, da nung'unumunu akangutagela ninnivalive myanda mingapi? Myanda saba?”

²²Yesu kushidoni, “Mene, nakwaulila shinu kuva myanda saba ila myanda sabini kuujila myanda saba.

²³Nadoni utawala wakuwa wo uvelé mwaumu jumo áshilota atende shikonda na vatumika vake.

²⁴Patunduvenge kutenda shikonda sho, vandímwidanavo munu jumo e avénavo udeni wanjuluku woe.

²⁵Kwodamwaa havenavo shakunnipa nang'olo wake, nang'olo wake jo kulamulila vanshulushe nae, ndyagwe, vanavake na vinu uti vyavénavo pakulota udeni wo, amalidye.

²⁶Ntumika aijá kunguguvalila kulipudya aashidoni, ‘Nang'olo wangu ngwanangila shididi nangu ndakulipa uti udeni awo.’

²⁷Bai nang'olo wake andímwanangila shididi kutwala kunneka auke na udeni wo, kunnivaliva.

²⁸“Kanji napane ntumika aijá paumile apo anínkodya ntumikamwagwe washindai dinali miya. Nae apalá kunkamula, kunkaba kabali kutwa kushidoni, ‘Njuluku wangu wo, ngulipa popo apa!’

²⁹Muje jo kunguguvalila kunjugwangila aashidoni, ‘Ngwanangila shididi, nangu ndakulipa.’

³⁰Nae kwita kuntwala kuka nanjela nkalaboshi mpaka udeni wo, alipe.

³¹Napanelo vatumikamwagwe vanji vakone shitendo asho, vandívanavo shipalodi shoe kutwala kuka nammanyiya nang'olo wave vinu uti vitandéke.

³²“Nang'olo wave akanshema kumwaulila doni, ‘Wako ni untumika wakubanga namene. Nangu udeni wako uti ndikulivaliva mwaa wako uningujugwangila.

³³Da napane hainaululike nawako kumwanangila mujo jo shididi kenga mo mwandikwanangilidile wako?’

³⁴Bai nang'olo wake jo àshimwidye namene anínkamudya kwavakushunga-kalaboshi mpaka udeni wo uti, alipe.

³⁵Napavedoni Atata wakuwa anantandela momo ikava kenga namwenu mmitima myenu mo, kula munu hannivaliva nung'unumunu.”