Read Ibibiliya mu Shimakonde Imbodi Yaambi na dimbande dya Imbodi Yakala Mateu 2 Bible Online

Mateu 2 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 2

¹Napanelo Yesu pavalakwadidye mulikaja lya Beteleemu kulijimbo lya Yudeya muwakati washilangalela Umu Elode, vandíwika pa Yelusalemu vakumanya-dinondo vakwalakela kwalyaloka liduva

²kutwala kudya, “Da aijá ávalakwadidye Umu Wavayuda avelé kwashi? Wetu tugwene inondo yake nkono wakwalyalakela liduva, twidilé ndalipudya kwake.”

³Bai Umu Elode pamo na vanu uti váshinama pa Yelusalemu pavaigwite malove alo, vandyángaikanga.

⁴Nae andívalalika vanang'olo vavakulangalalela-shadaka pamo na vamwalimu vadishaliya vavayuda kuvaudya, “Da Klistu vammalangenge kuvalakwedya kwashi?”

⁵Vanavo kushidoni, “Mulikaja lya Beteleemu mulijimbo lya Yudeya mwaa kwaindila yankúlava yandikigwé doni,

⁶“ ‘Wako Beteleemu úvele mushilambo sha Yuda, mwiko haunava shinu undikidiki pakati pavananangalaledi vavayuda mwaa kwako wako andaumililila nanangalaledi álota kuvashunga venentete vangu vanaishilaeli.’ ”[3]

⁷Napanelo Elode andívashema kwashipii avalá vakumanya-dinondo kuvaudyangidya wakati wavagwanalele inondo

⁸kutwala kuvaulila vauke ku Beteleemu avalaililila kushidoni, “Mwenu wena mukamanyange shana ing'ano ya nunu ajo, mukankodya ida mungumanyiye pakulota nanangu nguke ndikalipudye.”

⁹Vanavo vakaigwe malaililo amwe umu, vandyúmananga kuka. Mwe! Ailá inondo yavagwéne nkono wakwalyalakela liduva indívalangalalela mpaka ndaimila lyutu lyavéle nunu.

¹⁰Nadoni vanavo pavagwene inondo yo ìmidile, vandímamodya kupuwanga.

¹¹Pavainjilenge nng'ande vandímwona nunu jo pamo na jujumunu Maliya, vanavo kunguguvalila kulipudya kutwala kuutukulanga vituvi vyave kumupa dinudyo adi: shaabu, ubani na mila.

¹²Napanelo pavalinguligwe mwindoti pakulota havanaujile kumwe Elode, vanavo vandyúka kwave vapitila indila inji.

¹³Vakumanya-dinondo avalá vakauke, andímuumililila Yoshe mwindoti njelo wake UMU kutwala kushidoni, “Takatuka! Ntwale nunu pamo na anyoke utukutile ku Mishili. Koko ko, ikala mpaka pangulota kukumanyiya uje mwaa Elode alota kunnambela nunu ammyae.”

¹⁴Yoshe kutakatuka kuntwala nunu jo pamo na anyoke kuma shilo shosho kuka ku Mishili.

¹⁵Koko ko, nae andíikala mpaka papadile Elode. Vinu avi vinditandeka pakulota liwikile popo lilove lyatangwéle UMU kwaindila yankúlava doni, “Ku Mishili, ninshema mwanangu.”[4]

¹⁶Napanelo Elode pamanyite doni vakumanya-dinondo vaninduwanga, nae andíshimwa namene akalamulila vavabyange vana valume uti va pa Beteleemu pamo na vammakaja anyenjemwake, vana avo vavyaka vivili kwida mwina kwodana na wakati wapatilile dyabali na vakumanya-dinondo.

¹⁷Nadoni vindíwikila popo avilá vyatangwéle nkúlava Yelemiya aashidoni,

¹⁸“Ku Lamaa lindiigwinika lidi, shililo na kutangadikanga kukumene. Ajo ni Lakeli ávalilila vanavake, nae ankwita kupambadyangigwa, mwaa uti vandibyaigwa.”[5]

¹⁹Napanelo ling'oto lyakupela Elode, andímuumililila Yoshe ku Mishili mwindoti njelo wake UMU

²⁰ndamwaulila doni, “Takatuka, ntwale mwana jo pamo na anyoke uke kushilambo sha ku Ishilaeli mwaa avalá váshilota kwovya shingumi shamwana, vandipalanga.”

²¹Bai nae andítakatuka kuntwala mwana pamo na anyoke kuka kushilambo sha ku Ishilaeli.

²²Yoshe napane paigwite doni Alikalau ankulangalalela ku Yudeya adiva lyutu lyatatamunu Elode, nae andíjopa kuka kwanavo. Palinguligwe mwindoti andyúka kwisemu ya ku Galileya

²³ndaikala panjini umo wavashema Nashaleti pakulota liwikile popo lilove litangaléke kwaindila yavakulava doni, “Vananshema kuva Nnashaleti.”