Read Ibibiliya mu Shimakonde Imbodi Yaambi na dimbande dya Imbodi Yakala Mateu 20 Bible Online

Mateu 20 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 20

¹“Mwaa ivé doni, utawala wakuwa uvelé mwatatamunu áumile paing'ande pake lyamba linyeiku kuka ndavalambela vamadengo vakulima mulishamba mwake.

²Nae akaigwananavo kuvalipa dinali imo[47] kutwala kuvatumidya kulishamba lyake.

³Napanelo muwakati wasatatu yalyamba, nae akauma akavona vanu vanji vàimilenge vila pashiwanja

⁴nae kutwa kushidoni, ‘Namwenu, wena kulishamba mukalime nangu nannipa njuluku uvaikidíle.’

⁵Vanavo kuka. Muwakati wasasita na wasatisa akauma kutwala kutandela momo.

⁶Muwakati wasakumi akauma kavili kuvakodya vanu vanji vàimilenge vila nae kuvaudya, ‘Mwaa shani mwimilengé vila apa tangu lyamba?’

⁷Vanavo kushidoni, ‘Hapali munu átupele madengo.’ Nae do, ‘Namwenu, wena koko kulishamba ko mukalime.’

⁸“Napanelo paiwikile yalyulo aijá mwene lishamba andímwaulila mmádengo wake áshikondya njuluku kushidoni, ‘Vashamange vamadengo uti uvalipe njuluku wave uvatunduvangila vamwisho uvamalilila vatandi.’

⁹Vakawika avalá vasakumi kula munu kupata dinali imo imo.

¹⁰Avalá vatandi pavawikile vashona kenga vandapata njuluku woe kanji navanavo kutwala kupata dinali imo imo tu.

¹¹Pavapatile vanavo vandítunduvanga kuntangadikanga tatamunu mwene lishamba aijá

¹²vaashidoni, ‘Vanu ava vamwisho vakadilé madengo isaa imo, napane wako nang'olo mwaa shani uvalinganianga namu wetu túlipililidile madengo makumene na lítutimbile liduva?’

¹³“Nae kutwala kumwaulila munu jumo pakati pave kushidoni, ‘Mbwana nangu haninakwanela shinu. Da hatupakanidile ndikulipe dinali imo?

¹⁴Twala vyako uke! Nangu ngulota ninnipe aju wamwisho kenga mo mwandikulipidile wako.

¹⁵Da hanguvenavo shaliya yakutumila mali angu mwangulatela nimwene? Kwali uvénavo ing'ou mwaa nangu ni wambone?’

¹⁶Nadoni vamwisho vandava vatandi na vatandi vandava vamwisho.”

¹⁷Napanelo Yesu pashuka ku Yelusalemu andívashamela kwagweka vakwoda vake kumi na mbili kuvaulila kushidoni,

¹⁸“Tunkuka ku Yelusalemu. Koko ko, Mwana Wamunu vanankamudya kumakono kwavanang'olo vavakulangalalela-shadaka na kwavamwalimu vadishaliya. Vovo vo, vandaumya ukumu yakumpedya

¹⁹namomo vanankamudya kwavamidi vanniule, vanshape viboko, vankamele panshalaba napane muliduva lyatatu lyake nae andadyuka.”

²⁰Napanelo nkongwe jumo jujugwave vanavake Shebedeu andímuukila Yesu pamo na vanavake nanguguvalila kutwala kunjugwa amwangangole shinu shimo.

²¹Yesu kutwala kumudya, “Ulota nyamani?” Nae doni, “Ninkukujugwa ulivikile kuvavika vanavangu vavili ava muutawala wako, jumo kunkanakono junji kunshanda.”

²²Yesu kushidoni, “Mwenu hamumanyite shamujugwa. Da mwenu mundaulula kukumbila luwene lwolwo lwangulota kukumbila nangu?” Vanavo do, “Tundaulula.”

²³Yesu kushidoni, “Mwiu mwenu mundakumbila luwene lwangu kanji yakwikala kunkanakoko kwali kunshanda kwangu, ayo hainava shinu yakujava nangu. Vene mautu alo ni avalá vavapanganiangididye mwene Atata.”

²⁴Bai avalá vakwoda vake vanji kumi pavaigwite davo, vandívashimwidya vanung'unumunu avalá vavili.

²⁵Yesu kuvashema vakwoda vake kutwala kuvaulila kushidoni, “Mwenu munkumanya kenga avalá vakutawala vavamidi vandálitumbudya kwavenentete na vakumene vave vandátumila madalaka kwavanavo.

²⁶Kwenu mwenu hainave davo. Aijá ágambela ave nang'olo pakati penu inimmaikila ave ntumika wenu

²⁷na aijá ágambela ave ntandi pakati penu ave ntumwa wenu.

²⁸Nimumo momo Mwana Wamunu haidile pakulota vantumike; nae aidilé ndatumika na kujaula shingumi shake shive lyambolelo lyavanu voe.”

²⁹Napanelo pavashuma pa Yeliko, ishindamwoda imbumba yavanu.

³⁰Mwenu! Vandípagwa vanu vavili vakuputala mevo ve vaikéle nanyenje indila. Vovo vo, pavaigwite kenga Yesu ankupita vanditangola pashanya po vaashidoni, “UMU, mwanagwe Daudi, twanangila shididi!”

³¹Imbumba yavanu kuvashulanga vavaulila vamalale kanji vanavo vashindamamodya kutangola pashanya po vaashidoni, “UMU, mwanagwe Daudi, twanangila shididi!”

³²Yesu akaimila kutwala kuvashema kuvaudya, “Da mulota nintandele nyamani?”

³³Vanavo kushidoni, “UMU, tulota mevo etu, alole!”

³⁴Yesu kuvaanangila shididi, kuvakwaa mevo ave, muwakati wowo vanavo kulalenneu kutwala kumwoda.