Read Ibibiliya mu Shimakonde Imbodi Yaambi na dimbande dya Imbodi Yakala Mateu 21 Bible Online

Mateu 21 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 21

¹Vanavo vakavandika pa Yelusalemu. Napane vawika pa Betepashi, palishinga lyamilandi vya Ulivela, andívatuma vakwoda vake vavili avaulila kushidoni,

²“Wena kulikaja livéle mushu. Pamwinjila nkaja mo, munankodya punda vàmuungangidile mwanagwe àvele popo, mwenu muungule muvaidenavo.

³Ikava kenga andapagwa wakumudya shamumuungulila mwenu mwaulile doni, ‘UMU ankuvalota, andavaujiya.’ ”

⁴Vinu avi uti vinditandeka pakulota liwikile popo lilove litangaléke kwaindila yankúlava kushidoni,

⁵“Mwaulile Shiyau, ‘Lola, UMU wako ankukwidila. Nae ni wakulishapeya na ankwadilé punda, punda ndikidiki, mwanagwe punda.’ ”[48]

⁶Namwiu vakwoda vake vakauka na vakatandela mo mwavalamulidile.

⁷Vanavo kumwidanavo punda jo pamo na mwanagwe, kuvatandikanga dinguvo pashanya pave, Yesu kutwa kwikala pashanya po.

⁸Napanelo imbumba yavanu ishindapita itandikanga dinguvo dyave nndila, vanji kupanyulanga dinavi kupita vatandikanga.

⁹Imbumba íshuka mushu na íshimwoda, dishindatangola pashanya po diishidoni, “Kushibika kupagwe na mwanagwe Daudi. Aalaligwe aijá áida palina limwe UMU. Kushibika kupagwe kushanya-uti.”[49]

¹⁰Bai akainjila nkaja mu Yelusalemu, nkaja mo uti ni kupagwa shititimbu kutwala vanu kudya, “Da aju nyani?”

¹¹Imbumba yavanu kutwala kushidoni, “Aju ni aijá nkúlava,[50] Yesu wa ku Nashaleti ya ku Galileya.”[51]

¹²Napanelo Yesu andíinjila mwing'ande ya Nnungu kutwala kuvakumulanga vanu uti nng'ande mo váshishumidya na váshishuma vinu, kugang'alanga dimesha dyavakushenji-njuluku na dikiti dyavakushumidya-ding'unda

¹³kutwala kuvaulila doni, “Vandyandika doni, ‘Ing'ande yangu indashamegwa ing'ande yakushwalidya,’[52] napane mwenu munditenda kuva shivava shavakwiva.”[53]

¹⁴Mo mwing'ande ya Nnungu mo, kumwidila vakuputala mevo na vakulamala nae kuvaponia.

¹⁵Napane vanang'olo vavakulangalalela-shadaka pamo na vamwalimu vadishaliya pavagwene vyamakango vyashitenda na pavavaigwite vadyoko mwing'ande ya Nnungu vatangola pashanya po vaashidoni, “Kushibika kupagwe na mwanagwe Daudi,” vanavo vandíshimwanga

¹⁶kutwala kumudya, “Unkwigwa vyavatangola ava?” Nae kushidoni, “Elo! Da mwenu hamushamidye, ‘Mmakanywa avadyoko na avanunu undilipanganiangidya lutumbyango lwako’?”[54]

¹⁷Bai nae andívaleka kuma panjini po kuka ku Betaniya ndalala.

¹⁸Lyamba linyeiku pashuja auka kunjini inínkola indala.

¹⁹Bai akone nnandi uvéle mwankuju[55] nanyenje indila nae kuukila mene kukodya shinu ila mamba gweka nae kushidoni, “Unnandi wako, mwiko haunape kavili.” Nnandi muwakati wowo wo, kujuminneu.

²⁰Vakwoda vake pavagwene shitendo asho vanavo kushanga kutwa kumudya, “Da nnandi wo ujumililé mwashi shipajelo?”

²¹Yesu kushidoni, “Ninkumwaulila mwiu doni, mukavanavo likulupililo na mukanaambambidya, mundatenda i gweka vitandéke munnandi au. Ata lishinga ali apa mukalamulila doni, ‘Bubuka apa uke ukalijele mwimanga,’ vindatandakela momo.

²²Namomo shinu shamulota kujugwa kwaindila yakushwali, mukakulupila mundapata.”

²³Yesu akainjila mwing'ande ya Nnungu. Napanelo nae apundisha, kumwidila vanang'olo vavakulangalalela-shadaka pamo na vanang'olo vavenentete ndamudya, “Vinu avi utenda kwamadalaka shani na madalaka ene lo akupelé nyani?”

²⁴Nae kushidoni, “Nanangu momo ndamudya shinu shimo mukangwaulila, nanangu madalaka angutandela vinu avi, ndamwaulila.

²⁵Da ubatisho umwe Nshuwau walakadilé kwashi? Walakadilé kuwa kwali kwavanu?” Vanavo kwaulanila shivenevene vaashidoni, “Tukaashidoni, ‘Walakadilé kuwa,’ nae andatudya, ‘Mwaa shani hamunkulupidile?’

²⁶Ata tukaashidoni, ‘Walakadilé kwavanu,’ tuvajopa venentete mwaa vanavo uti vankumwamini Nshuwau kuva nkúlava.”

²⁷Bai vanínjang'ula doni, “Hatumanyite.” Yesu kutwa kushidoni, “Nanangu momo madalaka angutandela vinu avi, hanimwaulila.

²⁸“Napane da mwenu mwona dashi? Munu jumo andívanavo vanavake vavili. Nae akamuukila mwana ntandi ndamwaulila doni, ‘Mwanangu, wena ukakole madengo nelo kulishamba lyamilandi vyavinyu.’

²⁹Mwana jo kutwa kwita, ‘Hangutamwa,’ kanji ling'oto andílilingulanga muntima mwake kutwala kuka.

³⁰Tatamunu akamuukila mwana wambili ndamwaulila momo, mwana ajo kushidoni, ‘Ndauka nang'olo,’ kanji haukíle.

³¹Napanelo pakati pavana ava vavili, wakwashi átandadidye malotelo atatamunu?” Vanavo do, “Jo ntandi jo.” Yesu kushidoni, “Bai ninkumwaulila mwiu doni, vakukatisha-ukodi namu vakulavalava vankulangalela kwinjila muutawala wa Nnungu kunneka mwenu.

³²Mwaa Nshuwau andímwidila mwenu nannodya indila yaishaliya[56] kutwala mwenu me kunkulupila. Vakukatisha-ukodi na vakulavalava vo vaninkulupila, napane mwenu ata mwona avi, hamulijugulenge pakulota munkulupile.

³³“Napanelo igwilila nkong'o unji! Andípagwa ntajili jumo e alimíle lishamba lyake lyamilandi vyavinyu. Lishamba alyo nae andítang'anedya na lingongo kwimba shima shakuminyangila vinyu, kudenga libodo lyakulepa kutwala kuvakodisha vakulima mwene kutwala mwanda kuka.

³⁴Pauwikile wakati wamapuno nae kuvatumidya vatumika vake kwavakulima ko vakatwale isemu yake yavyepo.

³⁵Vakulima kuvakamula vatumika vo, jumo kunkoma, junji kummyaa na junji jo kumwamanga majanga.

³⁶Nae kuvatumidya vanji voe kupunda mwavalalele vatandi, navanavo kuvatandela momo.

³⁷Kumwisho kwake nae kuntumidya mwanagwe aashidoni, ‘Mwanangu aju vandamwishimu!’

³⁸Kanji avalá vakulima po pavangwene mwanagwe, vanavo vandyáulanila vaashidoni, ‘Aju ni walota kunkamudya vinu uti, idananga tummyae lishamba lyo live lyetu.’

³⁹Nadoni vanavo vanínkamula kumumya mulishamba mo, kumpedya.

⁴⁰“Napavedoni paida mwene lishamba alota kuvatandela mwashi vakulima avo?”

⁴¹Vanavo kushidoni, “Andavamalidya uti kwaukalau kutwala lishamba lyo kuvakamudya vanji valóta kwidanavo vyepo ukawika wakati wake.”

⁴²Yesu kushidoni, “Da mwenu hamushamidye mmaandiko, “ ‘Vakudenga lijanga lyavaitile lyo, lindyuka ndava lijanga lyapalitununa. Átandile davo ni UMU, ni vyamakango kwetu wetu.’[57]

⁴³“Napavedoni ninkumwaulila, utawala wa Nnungu mwenu vanampoka kuvapa venentete vanji valóta kulodya vyepo vyake.

⁴⁴Aijá álota kugwilila palijanga ali, andapandakanga na aijá walilota kungwilila, andatipulikanga.”

⁴⁵Bai vanang'olo vavakulangalalela-shadaka pamo na mapalishayo pavaigwite mikong'o avyo, vandímanyinneu do, avamba vanavo.

⁴⁶Vanavo vashindalambela dindila dyakumuungila kanji vashindavajopa venentete mwaa vanavo vashindamwamini nae kuva nkúlava.