Read Ibibiliya mu Shimakonde Imbodi Yaambi na dimbande dya Imbodi Yakala Mateu 22 Bible Online

Mateu 22 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 22

¹Napanelo Yesu andítangolanavo kavili atumila mikong'o aashidoni,

²“Utawala wakuwa uvelé mwaumu jumo e apanganiénge shitamo shamwanagwe.

³Nae kuvatumidya vatumika vake vapite vavashema vakulalikigwa kanji vakulalikigwa vo, kwitananga.

⁴“Nae kuvatuma kavili vatumika vanji avalaililila kushidoni, ‘Kavaulile vakulalikigwa doni, “Mwenu! Nangu ndipanganianaga tayali shitamo sho. Ding'ombe dyangu pamo na vanavave vakunyeta, ndishindanga. Nadoni vinu uti vivelé tayali. Idananga kushitamo akuno.” ’

⁵Vanavo mene kutanana kutwa myanda kuka, jumo kundila kwake, junji kumipango vyake.

⁶Napane vanji vo kuvakamula vatumika vo kuvakamanga na kuvabyaa.

⁷Bai umu kutwala kushimwa. Nae akavatumidya vaing'ondo vake ndavabamola avalá vakubyaa na kutaa moto njini wave.

⁸“Napanelo nae kuvaulila vatumika vake kushidoni, ‘Shitamo ashi mwiu shivelé tayali kanji napanelo vakulalikigwa havavaikidile.

⁹Napavedoni wena mudibalabala, uti vamulota kuvakodya vo, valalike vaide kushitamo.’

¹⁰Bai vatumika vakauka ndindila uti kupita vavakunganga vanu uti vavashivakodya, vakalau na vambone mpaka pashitamo po kuumbalanila vakulalikigwa.

¹¹“Napenelo umu akainjila nng'ande amulá kuvalola vakulalikigwa avalá pandamu kumwona munu jumo wavakangwadidye dinguvo dyashitamo.

¹²Nae kutwala kumudya, ‘Mbwana, wako winjidilé dashi nng'ande amu bila kugwalila dinguvo dyashitamo?’ Nae kumalala vila.

¹³Bai umu jo kuvaulila vatumika vake kushidoni, ‘Nkamule mumunge mmadodo pamo na mmakono mukanjele panda po kushii! Kushinu kulota kupagwa shililo na kutuka shulu nkanywa.’

¹⁴Nadoni vanu voe vankulalikigwa ila vakutandalegwa vavelé padyoko.”

¹⁵Napanelo mapalishayo vakaumananga apo kutwala kwikala nguguvale wakunteja ntego vampate mu lo malove ake.

¹⁶Nadoni vankuvatumidya vakwoda vave na vanu vashipinga shimwe Elode kuka ndamudya, “Mwalimu, wetu tundimanya shana kenga wako ni umunu waumwiu na unkupundisha kwaumwiu indila yalota Nnungu úkatakigwa kupundishigwa na munu mwaa haunalola ing'ope yamunu.

¹⁷Kanji napanelo twaulila, wako wona dashi? Ni shambone nkati mulilamulo lyetu kunnipa Shashali ukodi[58] kwali mene?”

¹⁸Yesu amanya vyakunyata vyave kutwala kushidoni, “Mwaa shani munkungulinga? Mmanu mmashinankulaba mwe!

¹⁹Ngulodya akuno yela yamunalipa ukodi yo.” Vanavo kunnodya dinali imo

²⁰kutwala nae kuvaudya, “Da ing'ope ai na namakong'o aju mwene nyani?”

²¹Vanavo do, “Shashali!” Nae kushidoni, “Bai vimwe Shashali mwing'e mwene Shashali na vimwe Nnungu mwing'e mwene Nnungu.”

²²Vanavo pavaigwite davo vandíshanga kutwala kunneka kuumananga kuka.

²³Napanelo muliduva lyolyo lyo Yesu vandímwidila mashadukayo vánataukanga kudyuka kwavakupela kutwala kumudya doni,

²⁴“Mwalimu, Musha atwaulidilé doni, nnume akapela bila kummalakela mwana ndyagwe, nung'une wawakujala inimmaikila ainjile ding'ande pakulota ammalakele vana wakujala.[59]

²⁵Napanelo pakati petu vandípagwa vanung'unumunu saba. Ntandi jo kulomba kutwala kupela, kwodamwaa hamalakadíle mwana, nung'une jo andíinjila ding'ande.

²⁶Nanae wambili kuntandakela momo, wantatu mpaka namalilikila wasaba.

²⁷Kumwisho kwake nanae nkongwe jo kupela.

²⁸Napanelo kushi muliduva lyakudyuka vanu lyo, mwene namwili aju shana alota kuva wakwashi pakuva vanu saba ava uti vaninnomba?”

²⁹Yesu kushidoni, “Mwenu munkuduwangika mwaa me kumanya Maandiko na ata dimongo dyake Nnungu.

³⁰Muwakati wakudyuka vapadíle hakupali kulomba kwali kulombwa, valota kuva kenga vanjelo kuwa.

³¹Da napane ing'ano ai yakudyuka vapadíle, hamushamidye mwatangaladile Nnungu?

³²Nae atédoni, ‘Nangu ni Nnungu umwe Abulaamu, Nnungu umwe Ishaki na Nnungu umwe Yakobo.’ Mwenu, Nnungu jo hanava shinu Nnungu wavakupela, nae ni Nnungu wavangumi.”

³³Bai dimbumba dyavanu pavaigwite davo vandíshanga namene mapundisho ake.

³⁴Napanelo mapalishayo vakaigwe kenga Yesu andivadima nshasholo mashadukayo, vandímwikalila shemba.

³⁵Bai pakati pave munu jumo, mwalimu wadishaliya andímudya Yesu anninga aashidoni,

³⁶“Mwalimu, lilamulo likumene nkati mu Lilamulo ni lyakwashi?”

³⁷Yesu kushidoni, “Nnagwaledye UMU, jo Nnungu wako na ntima wako uti, ungumi wako uti na ding'anong'ano dyako uti.[60]

³⁸Ali ni lilamulo litandi na likumene.

³⁹Lyambili lilinganana na alyo ni ali, Nnagwaledye mujo kenga wako umwene.[61]

⁴⁰Mumalamulo ala mavila ni mwalipandukanga Lilamulo uti na Vakulava.”

⁴¹Bai mapalishayo vakadyaniénge, Yesu andívaudya,

⁴²“Mwenu, ing'ano imwe Klistu ai mwona dashi? Jojo jo mwanagwe nyani?” Vanavo do, “Mwanagwe Daudi.”

⁴³Yesu kushidoni, “Napanelo mwaa shani jo Daudi alangalalegwa na Imumu, aninshema kuva nang'olo wake?[62] Mwaa nae atédoni,

⁴⁴“UMU andimwaulila Nang'olo wangu[63] doni, Ikala kunkanakono kwangu mpaka nangu ndivavike vamongo vako kumaulu kwako.”[64]

⁴⁵“Napanelo ikava kenga Daudi jo ankunshema Nang'olo,[65] ilota kuululika dashi kavili nae kuva mwanagwe?”

⁴⁶Bai hapagwíte munu wakujang'ula ata lilove limo na kutunduvangila muliduva alyo hapagwíte kavili munu wakulyalaveka kumudya shinu shoeshoe.