Read Ibibiliya mu Shimakonde Imbodi Yaambi na dimbande dya Imbodi Yakala Mateu 23 Bible Online

Mateu 23 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 23

¹Napanelo Yesu andítangola na imbumba pamo na vakwoda vake kushidoni,

²“Vamwalimu vadishaliya pamo na mapalishayo vandidiva lyutu lyake Musha.

³Napavedoni igwilila na tandedya uti avilá vyavatangola ila hamunavajedye vyavatenda. Vanavo vyavatangola havanatandedya shinu.

⁴Vandáunga dibasha dyakwidopa dikamadyánga mwakunyakatila kuvatika vanu vanji vene kulamana na kudabunya vela.

⁵“Vovo vo kula shinu shavatenda, ava mandole kwavanu. Ni ashi shivatádya vatumbudye vidingo vyave vyavalyunga na valapeye mapepe adikanju dyave![66]

⁶Muvikukulu kuvanagwela kwikala mumautu aishima na muvitala vyamikodyanio vaikale viteng'u vyamushu.

⁷Vanavo mumautu aumbala kuvanagwela vavaudyange na ishima na vanu vavasheme ‘Labi.’

⁸Kanji mwenu hanapagwe wakushamegwa ‘Labi’ mwaa mwalimu wenu avelé jumo bai. Mwenu apa uti mmanung'unumunu gweka.

⁹Namomo mwenu mushilambo amu hanapagwe munu wakunshema ‘Atata’ mwaa Tatagwenu wakuwa avelé jumo bai.

¹⁰Na ata hamunashamegwe ‘Mmanang'olo’ mwaa nang'olo wenu avelé jumo bai, nae ni Klistu.

¹¹Nadoni nang'olo pakati penu inimmaikila ave ntumika wenu.

¹²Woewoe álitumbudya jo mwene, vanantaa dyoni na woewoe álishapeya, vanantumbudya.

¹³“Napanelo mupambale mwenu mmamwalimu mmadishaliya na mmapalishayo. Mmanu mmashinankulaba mwe! Mushalangila maalati utawala wakuwa kwavanu! Mwenu mmene hamunainjila shinu na vainjíla avalá, munkuvaleya.

¹⁵“Mupambale mwenu mmamwalimu mmadishaliya na mmapalishayo. Mmanu mmashinankulaba mwe! Mumalila imanga na mwangu pakulota mumpate wakuliinjidyanga jumo tu bai, mukampata munkumpindula kuva mwana wakushena kumpunda mmene.

¹⁶“Mupambale mwenu mmananangalaledi múkalola muushidoni, ‘Woewoe álilapila ing'ande ya Nnungu, kulilapa ako hakuvé mana, napane aijá álilapila shaabu ivéle mwing'ande yake Nnungu, andyungigwa kwakulilapa ako.’

¹⁷Mmanu mmakubanga na múkalola davo mwe! Na apa shikumene ni shakwashi, shaabu kwali ing'ande ya Nnungu itadídye shaabu sho shiilimyangike?

¹⁸Namomo munkushidoni, ‘Woewoe álilapila alutali, kulilapa ako hakuvé mana, napane aijá álilapila shadaka shapashanya alutali, andyungigwa kwakulilapa ako.’

¹⁹Mmanu mmakubanga na múkalola davo mwe! Na apa shikumene ni shakwashi, shadaka kwali alutali lutadídye shadaka sho shiilimyangike?

²⁰Napavedoni aijá álilapila alutali, alilapila lwo alutali na vinu uti vivéle pashanya pake.

²¹Aijá álilapila ing'ande ya Nnungu alilapila kwaing'ande ayo na kwa aijá ánama amo.

²²Namomo aijá álilapila kuwa, alilapila kushiteng'u shake Nnungu na kwa aijá áikele pashiteng'u asho.

²³“Mupambale mwenu mmamwalimu mmadishaliya na mmapalishayo. Mmanu mmashinankulaba mwe! Mumya lipungu lyakumi lyamamba akunung'ila, linjano na inakilo kutwala vinu vikumene vya Lilamulo yani ishaliya, shididi na likulupililo, me kwodedya. Mwenu inimmaikila mwodedye vinu avi bila kwiludyanga vinji vyo.

²⁴Mmananangalaledi múkalola davo mwe! Mmanu múnanshinyina njanjema mmedi kutwala kummila ngamila.

²⁵“Mupambale mwenu mmamwalimu mmadishaliya na mapalishayo. Mmanu mmashinankulaba mwe! Munáukanga diwene pamo na vyani panda gweka nkati mo muumbele lung'unuku na ulavilavi.

²⁶Mmapalishayo múkalola davo mwe! Shitandi diwene pamo na vyani, ukanga nkati mo pakulota panda po napanavo, patakate.

²⁷“Mupambale mwenu mmamwalimu mmadishaliya na mmapalishayo. Mmanu mmashinankulaba mwe! Muvelé mwavyonga vyavapakenge lila. Panda apa mwiu kwaneka kuva vyakwalala, nkati mwake mo muumbele magwangwa na dinamuna uti dyaudagwa.

²⁸Ni kenga mwenu panda apa vanu vankumwona kuva mmanu mmaishaliya napane nkati mo, shindimuumbala shinankulaba na ungave-lilamulo.

²⁹“Mupambale mwenu mmamwalimu mmadishaliya na mmapalishayo. Mmanu mmashinankulaba mwe! Muumbila vyonga vyavakulava na kupita munemya vyonga vyavanu vaishaliya.

³⁰Mutangola doni, ‘Wetu leka tùpagwite muwakati wavanyakala vetu, hatunaliinjidyange na vanavo mukujaa myadi vyavakulava.’

³¹Napavedoni munkulyumidya mwemwe mmene ushuda wakuva mmana va avalá vavabyénge vakulava.

³²Bai napanelo mwenu dududila madengo avatunduvenge vanyakalavenu.

³³“Mwenu mmanyoka, udukulu wadinyoka dyaishumu mwe! Mulota kutila dashi ukumu yakushena?

³⁴Napavedoni nangu ninkuntumididya mwenu vakulava, vanu valimanyilo na vamwalimu. Napane mwenu vovo vo, vanji mundavabyaa, vanji kuvapambilila, vanji muvitala vyenu vyakulipudidya kuvashapa viboko na vovo vo, kula likaja mundavalumbata.

³⁵Nadoni mwenu mundapakala makosha amyadi vijaíke muulongo vyavanu vaishaliya. Mundapakala kutunduvangila kumyadi vimwe Abeli munu waishaliya mpaka kumyadi vimwe Shakaliya mwanagwe Balakiya wamummyee pakatipakati akuno kwalutali ako kulyutu lyakujowa.

³⁶Ninkumwaulila mwiu doni, shaushanga ashi shindavawikila vanu vaimbula ai.

³⁷“Yelusalemu, wako Yelusalemu! Aijá ávabyaanga vakulava na kuvaamanga majanga uti avalá vanimpalakadedya. Myanda mingapi nangu vyangulingangidile kuvavika pamo vanavako kenga mwanavautamilila ng'uku vanavake, mwenu me kulota!

³⁸Mwenu! Likaja lyenu lindava lidembe.

³⁹Ninkumwaulila doni, mwiko hamungwona kavili mpaka muwakati wamulota kutangola kushidoni, ‘Aalaligwe aijá áida palina limwe UMU.’ ”