Read Ibibiliya mu Shimakonde Imbodi Yaambi na dimbande dya Imbodi Yakala Mateu 24 Bible Online

Mateu 24 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 24

¹Yesu akauma mwing'ande ya Nnungu. Nae auka, vakwoda vake vandímuukila kutwala kunnangudyanga vashanga ding'ande adilá dyapaing'ande ya Nnungu.

²Yesu kushidoni, “Mwenu munkwona uti vinu avi? Ninkumwaulila mwiu doni, mwiko haliikala lijanga pashanya lijangamwagwe palikabamolegwa.”

³Nae akaikala palishinga lyamilandi vya Ulivela kutwala vakwoda vake kumuukila àve gweka ndamudya, “Twaulila! Da vinu avi vilota kutandeka duvani? Shimanyikilo shani shilóta kulilodya kwida kwako na mwisho wawakati?”

⁴Nae kutwala kuvaulila kushidoni, “Lilaledye pakulota hanapagwe wakunduwanga.

⁵Vandaida vanu voe vatumila lina lyangu vaashidoni, ‘Nangu Klistu,’ vovo vo vandavaduwanga vanu voe.

⁶Mundaigwa ding'ondo na manyinyi ading'ondo, mwenu po, hamunajope. Vinu avyo vindivaikila vitandeke ila haunava shinu mwisho.

⁷Venentete vandatandana ing'ondo na venentetemwave, utawala undatandana ing'ondo na utawalamwagwe. Indaumilila indala na shindangenda mumautu akuvilingananga.

⁸Vinu avyo uti ni shitunduvangilo tu shamauvilo akushuluwa.[68]

⁹“Napanelo vanavo vanankamula kumuukanavo ndamuuvyanga na vanammyaa. Mwemwe mundavangadika kwavenentete uti kwamwaa walina lyangu.

¹⁰Muwakati awo voe vandavainjidyanga mulidambi, vanji vandavalimya na vanji vandavangadika.

¹¹Vandaumilila vakulava voe vakushang'apa na vovo vo, vandavaduwanga voe.

¹²Linagwaledyo lyavanu voe lindapunguka kwamwaa wakwanjadyeka ungave-lilamulo,

¹³napane aijá álota kulipililila mpaka kumwisho, ajo andaambwalegwa.

¹⁴Nadoni ntenga wambone wautawala undavalangangigwa mushilambo uti pakulota uve ushuda kwavenentete uti kutwala kuwika mwisho.

¹⁵“Napanelo pamulota kwona shakudabukanga shiídanavo kubamola shávalangenge nkúlava Daniele shìimidile palyutu lyakwilimyanga,[69] munu áshomya amanye mana ake.

¹⁶Bai vavéle ku Yudeya vatukutile kumashinga.

¹⁷Ávele panda apumula hanatakatuke kwinjila nng'ande ndatwala shinu shoeshoe.

¹⁸Namomo ávele kumagwelu hanauje kuka ndatwala dinguvo dyake.

¹⁹Vapambale vakongwe valóta kuvanavo vitumbo na valóta kujang'edya mumaduva alo.

²⁰Shwali pakulota hamunatile muwakati washipwepwe kwali muliduva lyakupumula.

²¹Muwakati awo andapagwa mauvilo makumene ainamuna íkaumilidile tangu kukandyangigwa shilambo mpaka nelo apa na lolo lo, mwiko hapagwa shinu kavili.

²²Leka UMU akapungwile maduva alo hanapagwe ata munu jumo e akambwalégwe, napane kwamwaa wavakutandalegwa, maduva lo, andipungula.

²³“Napanelo munu akamwaulila doni, ‘Mwenu, Klistu aju apa,’ kwali, ‘Apali aju,’ hamunankulupile.

²⁴Mwaa vandaumilila vaklistu vakushang'apa na vakulava vakushang'apa. Vovo vandatenda vimanyikilo vikumene na vyakutikinikanga kwambangidya vavaashadyange ikaululika ata mpaka vakutandalegwa.

²⁵Ngwigwa! Vinu avi nimwaulila kaladavo.

²⁶“Napavedoni vanu vakamwaulila kushidoni, ‘Mwenu! Nae apali kushimbweshe akulá,’ hamunauke. Kwali vakaashidoni, ‘Apali nng'ande amulá,’ hamunakulupile.

²⁷Kenga mo mwakunatandela kumeta kúnalangadya kula kushinu kwamwanda umo ni momo mwailota kuvalela kwida kwa Mwana Wamunu.

²⁸Pauvele ntui, malembo andaumbalanila popo.

²⁹Po palota kumalilikinneu mauvilo amaduva alo, ‘Liduva lindadimba, mwedi hauvala, dinondo kuwa ko dindagwanga na vyadimongo vyakuniania vindating'inigwa.’[70]

³⁰“Bai muwakati wowo kuwa shindaaneka shimanyikilo shake Mwana Wamunu kutwala makola uti amushilambo kutangadikanga. Vovo vo vandamwona Mwana Wamunu aaloka mumaundi na dimongo pamo na lishangelo lyoe.[71]

³¹Muwakati wowo nae andavatumidya vanjelo vake vaditalumbeta dyakuma namene vauke vakavatwalange vakutandalegwa vake mudisemu nsheshe dyamushilambo kutunduvangila nkono unji wakuwa ndamalilila nkono unji.

³²“Napanelo kwankungu lipundishe nkong'o au. Paunaipukila mwenu mumanyinneu doni, shipondo shindiwika.

³³Namomo mukona vinu avyo vitandeka, manyinneu doni, mwisho uwikile, uvé mo mmilango myenu.

³⁴Ninkumwaulila mwiu doni, vanu vaimbula ai havamalilika vinu avi vikanava kutandeka.

³⁵Kuwa na pai kundapita ila malove angu mwiko hapita.

³⁶“Napane liduva lyene lyo na isaa, hapali ámanyite, ata vanjelo kuwa havamanyite, ata Mwana hamanyite ila ámanyite ni Atata bai.

³⁷Kenga mo mwaivalaléle muwakati umwe Noe nimumo momo mwailota kuvalela kwida kwa Mwana Wamunu.

³⁸Ni kenga momo likanava kuwika livambwe, vanu vashindalya, vashindakumbila, vashindalomba na kulombwa mpaka muliduva lyainjidile Noe mwingalava

³⁹vanavo pavakamanya shinu kudabanga kwida vila livambwe ndavalya do kobo! Nadoni kwida kwake Mwana Wamunu kulota kuvalela momo.

⁴⁰Vanu vavili vàvele mulishamba, jumo andatwaligwa junji kulakegwa.

⁴¹Vakongwe vavili vatipula, jumo andatwaligwa junji kulakegwa.

⁴²Napavedoni ava mevo mwaa hamumanyite liduva lyalota kwida UMU wenu.

⁴³Kanji napanelo manya doni, tatamunu wapaing'ande leka àmanyite wakati wakwida nkwíva, akandiikala mevo na hanaleke ing'ande yake vatutumula.

⁴⁴Napavedoni namwenu momo lipanganiange mwaa Mwana Wamunu andaida muwakati wamukalindila mwenu.

⁴⁵“Da ntumika shani wakukulupilika na wading'ano wammikile nang'olo wake kuva nanangalaledi wapaing'ande pake na kuvapa shakulya muwakati uvaikidíle?

⁴⁶Andijaligwa ntumika aijá walota kunkodya nang'olo wake pauja atandela momo.

⁴⁷Ninkumwaulila mwiu doni, anankamudya vyake uti.

⁴⁸Kanji napanelo ntumika aijá nkalau akatangola shintimatima doni, ‘Nang'olo wangu ankutima kuja,’

⁴⁹bai kutunduvanga kuvakamanga vatumikamwagwe, kulyanga gwamba na kukumbila pamo na vakwambalwa,

⁵⁰nang'olo wake andaida muliduva lyakalindila na wakati wakamanyite.

⁵¹Nae anannumulanianga kutwala shingumi shake ndaanganianga na shavamalambi. Kushinu ako kundapagwa shililo na kutuka shulu nkanywa.